هاذي اول مره اكتب فيها شي على الانترنت مع العلم اني استخدمها قبل لاتجي هنا في ديرتنا واللي شدني للكتابه هو الرغبه في مشاركه اخواني واخواتي في هذا المنتدى الرائع اللي خلى ربعنا يتحركون يد وحده ضد الجشع من بعد ماكنت انا فاقد الامل ان ربعنا ممكن يتحدون ضد اي شي....على العموم.....مادام فيه تحّرك...نتحرك احنا بعد....ونشرح بعض النقاط اللي انشاالله راح تجاوب على عدد من الاستفسارات اللي قريتها في المنتدى وتخلي الواحد يشوف السوبر ماركت او الهايبر ماركت بعيون مختلفه وتفيده في تسوقه وتوفر عليه:

استراتيجيه قتل السلعه (Kill Item Strategy or Kill It Strategy): اخترعوها البريطانيين وفيها يجي السوبر ماركت او الهايبر ماركت على التجار اللي يتعامل معهم ويقول لكل تاجر انا اتعامل معك في اصناف كثيره ولازم تبيعني في كل شهر او اسبوعين صنف باقل من سعر التكلفه (تكلفه التاجر)...يعني ياتاجر اخسر في صنف معي لكن اربح في الاصناف الاخرى (غصب على التاجر يسويها او الهايبر ماركت يوقف التعامل معه). الهايبر ماركت يجمع كل الاصناف المخفضه من جميع التجار ويحطها في الاوراق (البروشورات) اللي تشوفونها ويخلي الناس تتصور انه رخيص جداً بينما هو اغلى في اصناف اخرى من البقاله اللي جنب بيتكم. بالنسبه للمستهلك هاذي حاجه كويسه ولا تضره اذا شرا من هاذي الاصناف اللي في البروشورات.

استراتيجيه القائد الخسران (Loss Leader Strategy): وفيها يجي الهايبر ماركت على سلعه الناس تحتاجها وتعرف سعرها زين ويكسر السعر الى النص او اكثر (ويتحمل الخساره) ويخلي هاالسلعه في اخر الهايبر ماركت علشان الناس تمر على اكبر عدد من الارفف وتشتري اشياء ثانيه يمكن مهي محتاجتها ويحدد الكميه لكل مشتري حتى يعطي الناس انطباع انه رخيص مررررره وشفناها مثال في بنده وغيرها في رمضان مع الفيمتو. وطبعاً هو يربح في اصناف ثانيه.

قبل مااكمل بوقف شوي واقولكم ان المنافسه بين الهايبر ماركتات والسوبر ماركتات تراها حرب ضروس بشكل الواحد لايمكن توقعه لدرجه ان بعضهم استخدم شعار الوطنيه والدين للعب على مشاعر الناس واجتذابهم له واولهم العثيم الي قال الرز بسعر التكلفه "في حمله وطنيه " والقصد منها جر الناس بأي طريقه (انا مااشكك انه باع بالتكلفه..لكن شوفو استخدام كلمه "الوطنيه" في اسلوب تسويقي معروف من زمان عند السوبر ماركتات ولا يحتاج يحط كلمه وطنيه ولابطيخ) وقبلها الابتداء بمقاطعه المنتجات الدانمركيه لان معظم زباينه الحاليين والمتوقعين من الرياض, القصيم وما جاورها من الناس اللي ماشاالله من الملتزمين ولا يقدر يخسرهم بل ان هذه الفرصه التسويقيه جته على طبق من ذهب لاجتذاب عدد اكبر من الملتزمين والمتحمسين اكثر لنصره حبيبنا. طبعاٌ المحلات الثانيه فهمتها وقاطعت المنتجات الدنمركيه ليست لنصره حبيبنا...بل للمحافظه على زبائنهم هم ايضاً...والدليل ان ارفف محلاتهم مليانه الحين منتجات دنمركيه وراحت غيرتهم الدينيه فجاه زي ماجت. ارجو ان لايفهمني احد انني ضد المقاطعه بل بالعكس من مؤيديها.....ولست ضد العثيم لانني من سكان الخبر ولايوجد عثيم ولا غنيم عندنا. بل ذهب الامر الى اسواق العثيم الى وضع ايات قرأنيه على افرعه للمحافظه على شريحته من المتسوقين.

المنتجات اللي تحمل شعار الهايبر ماركت: اغلب الاحيان هاذي منتجات كويسه للشراء وفرص جميله وتكون هذه المنتجات بجوده منتجات ممتازه اخرى بل وتكون في بعض الاحيان هي نفس المنتجات الممتازه.....يعني تجي شركه عافيه للزيوت لكارفور وتقوله دخيلك انا انتاجي كثير السنه هاذي وخايف يخرب من انتاجي مثلاً 20% ولا ابغى انّزل سعري واضرب منتجي في السوق...احنا راح نصنع لك ال20% ونحط عليها شعار كارفور ونبيع لك مثلاّ ب 5 ريال للعلبه بدل 10 ريال (وهم في نفس الوقت يبيعون المنتج بشعار عافيه لكارفور ب 10 ريال). يقوم كارفور ويحط عرض على هالزيت انه اذا لقيت ارخص منه بيعطيك الفرق 10 مرات.

تحقق من وجود كلمه تخفيض في اخر الرف: معظمنا تعّود بالفطره ان السلع اللي اخر الرف يكون عليها دائماً تخفيض وهذا خطا. تاكد من وجود كلمه تخفيض. بعظها تكون اسعارها اغلى.


اللعب في توزيع المنتجات داخل الهايبر ماركت لاغرائك على الشراء: هاذي تنقسم لعده نقاط واجد لكن اهمها:
1. حنا اكثرنا يمر بسرعه لاشياء بسيطه واساسيه مثل الخبز والحليب. لاحظ انهم يحطون الحليب والرز اخر الهايبر ماركت والخبز وانت طالع برا علشان يخلونك تلف المكان كله.
2. عند الكاشيرات حقت الحساب يحطون حلويات وشوكلاته وعلوك على مستوى عيون الاطفال علشان ينشبون فيك عيالك وانت قدام الناس يتنحرج وما تقدر تقول لا لهم.
3. الشركات اللي اسعارها غاليه يستاجرون الرفوف اللي على مستوى عيون المتسوقين ويدفعون مبالغ كبيره للهايبر ماركت علشان يأثرون في قرارك للشراء....انتبه من ها النقطه...ودور في رفوف اعلى وأنزل.

فيه في المنتدى مشاركه ممتازه توضح لك عروض الهايبر ماركتات كلها وهي قائمه محدثه تلقائيا من مواقع الهايبر ماركتات على النت. انا انصح بطباعتها وتحديد ماتريد من عروض كل هايبر ماركت وشرائها وتكون محظوظ لو عندك تشكيله هايبر ماركتات في منطقتك وانهاء تسوقك في كارفور للاشياء اللي ما عليها عروض واقسم بجلال الله اني مالي دخل في كارفور ولاجالس اسوق له ولامستفيد حاجه....لكن من مراقبه طويله اتضح لي انه الارخص....والارخص يستحق الدعم علشان يصير ارخص اكثر.

انا اللي اشوفه في ديرتنا ان احنا اذا ركزنا عل منتج...ركضنا كلبونا وراه وتعودنا عليه...وهاذا يخلي التاجر يرفع سعره (حتى من قبل الغلاء الاخير) ويخلي التجار الثانيين ينزلون اسعارهم (مع العلم ان منتجاتهم تضاهي هذا المنتج جوده) وللاسف يرتبط في اذهاننا انها ارخص لانها اسواء وهذا اكبر غلط....بعظ المنتجات ارخص لجذب الناس وبعضها ارخص لانها اسواء.

في النهايه ارجو ان لانظلم كل التجار...بعض التجار المستوردين ممن اعرفهم شخصياً ارتفعت عليهم الكلفه 40% ولا حل لهم الا الاغلاق او زياده الاسعار وبعظهم ممن يصطادون في الماء العكر وهولاء من نريدهم.....وسامحونا على التطّويل.

الله يحيك معنا في المنتدى ضد التجار مدعين الوطنيه وطامعين بابناء وطنهم وضد السلع مجنونه الاسعار
موضوع متعوب عليه وجزيت خيرا على مجهودك
بالنسبه للعثيم فعني مقاطعته من حكايه الدنمرك اعتقد لعبها صح وحولها من مقاطعه من سب شفيعنا الى لعبه تجار

ماشاء الله تبارك الله من أول مشاركة في المنتدى والنت

موضوع حساس وجميل وواقعي ويلفت النظر فعلا الى نقاط كثير غائبة.. واجمل ما لاحظته هنا ولم الاحظة في اغلب المواضيع ان فيه ارشادات للتجار انفسهم وكيفية تعاملهم مع الموردين ونصائح لهم في عمل وتسويق العروض

شكرا على هذه المعلومات

جزاك الله خير

ما شاء الله تبارك الله مقال أكثر من رائع ويدل على ثقافة واسعة في المجال التجاري

كلمات جداً جميلة فتحت عيوننا على أمور تحدث أمامنا ولم نكن نلقي لها حسباناً

من افضل ما قرأت في المنتدى


لك خالص الود ،،،

بسم ربى

الأخ subaaaOf

موضوع مفيد وطرح سهل..ومبسط ..يفهمه الجميع.

أحسنت أخى الكريم..يحتاج مجتمعنا لتوضيح تقنيات وألاعيب التسويق الحديث ..خاصة "موضة السوبر ماركتات والهيبر ماركتات "التى غزت وتغزوا مجتمعنا بشكل يتنامى يوميا لما تحقق من أرباح خياليه لأصحابها., لتطبيقهم القواعد التسويقيه ( الإحتياليه ) التى أشرت إليها ..وكثير منها بل أكثرها فيه مخادعه ..وضحك على الذقون..وضحك أكثر على النساء .

فى الغرب كما تعملم تصدر جمعيات ومنظمات حماية المستهلك نشرات دوريه توجيهيه وتعليميه للمتسوقين..تنبههم وتدلهم وتوضح لهم هذه التقنيات التسويقيه "الإحتياليه" وترشدهم لطرق التعامل معها ..بل وإستغلالها لصالح المستهلك.
ليتنا نقوم بمثلها أو حتى ترجمة بعضها..فطرق الإحتال التى تطبق فى أسواقنا هى نفسها التى تطبق فى الغرب..يعنى المحتالين يشاركون فى خططهم..

وأسواقنا ..الماركتيه والهايبريه ..تنفذ وتمارس التقليد ..لكل مافى الغرب..ضاربة عرض الحائط بالدين والقيم الخاصة بنا..بل تستغل الدين والوطينه كما رأينا ..وكما ذكرت..لتحقيق المزيد من الأرباح.
مستغلة عاطفيتنا وحبنا لديننا ووطننا.

شكرا لك..

Well Done

جزاك الله خير اخي على هذا الموضوع القيم والمفيد

موضوع قيم ورائع جدا جدا . يعطيك الف عافية ونحن بإنتظار المزيد منك .

موضوع رائع جداً

شكراً لك وكثر الله من امثالك