اكتشفت ان عائلتنا بس (بيتي وبيوت اخواني الي في الدمام) عندنا 22 سيارة

يعني لو كل سيارة بتغير 5 علب زيت كل شهرين

يعني كل شهرين يبغالنا 110 علب زيت

سعر العلبة عند البنشر 15 ريال وبالجملة تقريباً 8.5 ريال

يعني بحسبة بسيطة 15-8.5=6.5 ريال

6.5 ريال في 110 علب يطلع مبلغ التوفير كل شهرين 715 ريال يعني في السنة حوالي 4290 ريال ولو نقول في 10 سنوات 42900 ريال

اقول الي يعرف وين يبيعون الزيوت بالجملة في الدمام لا يبخل علي وانا بصير موزع للأخوان .

يا هلا بالشباب المقاطعين او بالاحرى الذين يستخدمون عقولهم...

تقدر اخوي تشتري زيت موبيل 1 واللي هوه افضل لك من الزيت العادي حيث ان الزيت العادي تحتاج كل 5 الاف او 10 الاف كيلوا للتبديل بينما زيت موبيل 1 هو زيت صناعي synthetic oil ما تحتاج انك تبدله الا كل 15000ك او 6 اشهر لان عمره الافتراضي اكثر ولا يتغير لونه وبالمناسبة هو نفسه الزيت اللي يجي مع السيارة لما تشتريها من الوكالة
وبحسبة بسيطة يتبين لك ان الزيت الصناعي افضل لك في جميع الاحوال حتى لو فرق السعر اشوي اعلى لان في النهاية انت ربحان كسعر وكجودة وتوفير وحفاظ على السيارة

الموقع طال عمرك

طريق الدمام الخبر -السير المحلي - لما توصل مبنى DHL -تاخذ يمين وتروح سيده الين اتعدي مركز طابة التجاري وروح بعد حتى الاشارة (تقاطع)-هناك تاخذ يمين وخلك على السير المحلي ايضا طبعا رايح تقول وين انا جاي بس ما عليك انت طريقك صح، وتمشي السير المحلي لين اتعدي ALANSARI COMPOUND وتعدي فندق هوليدي ان وتروح بعد سيده رايح تشوف قدامك لوحة كبيرة على الشارع -(حاجة تتعلق بقسطرة شرايين او علاج عند احد المستشفيات) وعند هاللوحة تاخذ يمين وتروح سيده طبعا شوي شوي واول سور على يمينك هو موبيل 1 ( سور لا يدل على انه مبنى وبوابته حديد على اليمين ) خش داخل واطلب عدد الكراتين اللي تبيها( هم يجيبوا نوع واحد من الزيوت وطبعا يمشي حاله مع جميع السيارات )

وانا كلمتهم قبل شوي دوامهم في رمضان من 10 الصباح الى 4 العصر

ينقل لقسمه المحدد

الله لا يهينك اخوي على هالتوصيف

بس كم سعر الكرتون؟

وبالنسبة لباقي الزيوت وين المكان اللي يبيعهن جمله!