ابي احد يساعدني ويردني عن الخطأ اذا كنت غلطان
ودي افهم ماهو نضام ساهر وما معنى ساهر وش اهدافه وش اللي يبيه او يبونه من المواطن ومن اللي وضع هذا النضام هذي الاسئله دايم تدور في راسي وانا مايهمني لاساهر ولا اشكاله ولا اللي وراه بس اللي يهمني وش هو ذنب اللي ماله ذنب (؟) المعلومات اللي قدرت اني اوصلها هي كالاتي :
نضام رصد السرعه والتجاوزات المروريه وبعض المخالفات مثل استخدام الجوال او عدم ربط الحزام وهذا وضع لسلامه قائد المركبه ومن معه من الركاب وتقليل من نسبه الحوادث والوفيات حتى نعيش في بيئه امنه وبعيده عن الحوادث المروريه .
يعني نفهم من هذا كله انهم خايفين علينا طيب نبدا في الموضع:
اذا كان النضام يحد من السرعه يعني تساوت سرعه جميع السيارات يعني السياره الصغيره مسموح لها 90 داخل المدينه وصاحب الشاحنه زيه زيك 90 وسياره ساهر متبطحه هي وراعيها في احد الشوارع وترصد فوق هذي السرعه طيب واحد يفيدني اذا انا غلطت بس لاينسى خطر السيارات الكبيره اذا وصلت سرعتها 120 في الخط السريع وانت ماشي120 يعني سوا سوا
اللي بعده:ليش النضام طبقوه في مكه مع بدايه رمضان وطبقوه بس في السيارات الخاصه بساهر يعني اللي في الشوارع ثابته ما اشتغلت الى لحضة كتابه هذا الموضوع انا ارد على نفسي واقول يمكن يخافون على ضيوف الرحمن وحتى يؤدون شعائرهم وهم في صحه وعافيه
اللي بعده:هل بلدنا مؤهله لاستقبال هذا النضام المحترم كما في بعض الدول
احيان اهوجس واقول كل مانقول حاجه قالو موجود في اوروبا موجود في الامارات موجود في الخليج في وفي وفي طيب ابي اقارن الامارات طبقت هذا النضام واستقبلوه الاماراتييين بصدر رحب تدرون وش السبب
السبب الاماراتي ساكن في بيته وواصله جميع الخدمات ماء كهرباء صرف صحي الحي اللي ساكن فيه موجود فيه كل الخدمات مركز صحي مدارس مسجد وفيه جمعه يعني يوم يصحى ما وراه الا شي واحد عمله وبس يروح ويرجع بكامل قواه العقليه واحنا انت في بيت مقطوعه عليك المويه وراك مشوار الين الشيب وتمسك من السرا الين ماتطلع روحك ووراك مديرك في العمل يرجك على الجوال ووراك الحرمه تقلك ابي اروح المستشفى اللي اخر الدنيا لان المستشفى اللي بجنبه مافيه كل الخدمات يعني يخلف الله ووراك الولد يدرس في الشرق والبنت في الغرب وانت عملك في الشمال يعني لازم تصحى من الساعه 3 قبل الفجر ويمكن تلحق او ماتلحق يمكن تلاقي شارع مقفل او تحويله مدخلين شارع على شارع ويالله يطلعونك فوق الرصيف علشان تدخل التحويله وانت ماشي وفي الاخير تدل من شارع تلاقي الشارع مقفل سياره وفي وجهها سياره وكل واحد يبي الثاني يرجع انا ما اشره عليهم اشره على الشارع اللي مايكفي دراجتين ويبغون الواحد مايسرع ويقول اكثر وفيات في العالم في السعوديه طيب ابي اعرف الوفيات هذي كلها من السواق هو السبب ولا فيه اشياء ثانيه لاني هوجست مره ثانيه واقول في نفسي ماقلت لاحد والله في نفسي مدري الكفرات اللي نركبها على سياراتنا مطابقه للمواصفات والمقاييس لاني كل ما اقرا في الجريده يقلك وادت السرعه الزايده الى انقلاب السياره بسبب عطل في احد الاطارات طيب مين السبب الاكبر السرعه ولا الكفر والله انا مادري وش رايكم انتم مين السبب؟
وياكثر ما اهوجس واقول مدري كم عدد الوفيات من مرض السرطان الله يكفيني واياكم وجميع المسلمين ويشفي كل مريض مادري انا كل شوي الاقي احصائيه مادري كم بس انهم اكثر من اللي يموتون بالحوادث ليش هذا كله وش فيه اكلنا وش اللي جالسين يوردونها وبعد فتره يطلع واحد من المسؤلين ويحذر من منتج معين بعديش بعد ماراح اللي راحوا مين السبب في دخول بعض الاطعمه اللي ماياكلها الحمار الله يعزكم ااااااااااااااه على النسكافه من اول مخمخ ساده واليوم مخمخ بزجاج مكسر مين ورا هذا كله ونعيد ونقول حوادث السيارات وحوادث السيارات وننسى وفيات الاخطاء الطبيه اللي عددهم يفوق وفيات الحوادث وكل شي موجود عندي مثبت وانا ما اتكلم من فراغ اذا كان المواطن يهمكم لهذي الدرجه عيشوه عيشه هنيه وبعدين حاسبوه اعطوه وبعدين حاسبوه اما تاخذ وانت من الاصل ما اعطيت من فين اعطيك من فيييييييييييييييين قولولي نوروني مو زي ما قالوا فاقد الشي لايعطيه تحاسبني وتاخذ وانا على باب الله اللي اتمناه هو اعادة النضر في ساهر لاتخاف يالمسؤل ياصاحب الشركه ماراح تخسر لانه اذا سحبوا سياراتكم من الشوارع فيه اماكن راح تشغلوها وراح تطلعون دبل ماتطلعونه من المطيح في الشوارع نبي نحط كاميرا ساهر على باب كل مسؤل وفي جيب كل مدير لان الهدف من ساهر الحد من التجاوزات سواء السرعه اوغيرها اي شي راح يتجاوز النضام راح يكون ساهر بالمرصاد تخيلوا لو طبقنا نضام ساهر على وزير التجاره وش راح تكون النتيجه ولو طبقنا نضام ساهر على باب وزاره العمل كم بيكون الدخل اليومي ولو طبقنا نضام ساهر على صاحب هذا النضام ومعاونيه راح نعيش احلى عيشه
اتمنى لي ولاي مواطن سعودي طيب العيش ورغدها وان يحفضنا من كيد الاعداء ويبعد عنا كل مكروه وكل سؤ
واااااااااااسف على الاطاله والسلام عليكم ورحمه الله وبركاته

100/100

كل الأنضمة هنا ضد المواطن وليست لصالحة

هذا نظام سارق بالحقيقة ، الله وكبر حرصين على سلامة المواطن . نسوا المستشفيات
اللي تعطيك مواعيد تمرضك زيادة على مرضك . وبعدين الحين الواحد يمسي ويصبح
وما يلقى سيارته .. البلد ملعوب فيه سرقات ونهب وفساد إداري وفساد مالي وكل واحد يسرق الكبير والصغير ، حنا يالمواطنين لا سكن ولامديونين لجميع البنوك والبنك العقاري
ورواتب ضعيفة وفقر وحالة ما يعلم فيها إلا الله وغيرنا ما عليه قرض ريال واحد
..
إلا بسألك أخوي الحين نظام ساهر يرصد الشريحة الكبرى من الناس ؟؟ يعني من
عبدالرحمن المقبل وانت طالع يرصدهم ساهر ؟

لاهنتوا شباب اسعدني مروركم
اليوم سمعت احد الشباب يتكلم ويقول انا ماراح امشي الا مع طرق الخدمه وانا اقول يافرحه ماتمت لاني لقيت علي بابا راعي سياره ساهر واقف على الرصيف بين الخطين العام والخدمه وصاد له واحد مسرع في خط الخدمه يا اخواني خليكم ذيابه لا احد يضحك علينا ترا هنا وخلاص

سبحان الله وبحمده عدد خلقه ورضاء نفسه وزنة عرشه ومداد كلماته

اذا تعرف واحد في المرور يمسح عنك المخالفه
يعني اللي يشتغلون في المرور

واهاليهم وربعهم يستثنون من هذا النظام



.

السلام عليكم ورحمة الله وبركاته ..

كل ما قلته صحيح .. ولكن لا يمنع أن ساهر خطوة في الاتجاه الصحيح ..

ومتى ما تم تعميد شركات خاصة لنقل طلاب المدارس وخطوط نقل عام محترمة كما في

أوروبا .. ستجد أن الشوارع فاضية ولن يسوق سيارة إلا من أراد أن يدفع مبالغ خيالية

من تأمين وتصليح وغش من شركات السيارات ..

عزيزي .. سافرت أوروبا وأمريكا وكندا .. الشوارع فاضية ولا يوجد إلا نفاخ النار على قولتهم ..

لأن أغلب الخطوط مرتبة ومنظمة .. ولكن يبقى من يسرع .. هناك كاميرات تلقطهم ..

بل نظام ساهر متساهل معكم ..

والله في بعض المدن الأوروبية يعاقب المسرع بسحب رخصته على الفور ..

ويجلس لشهور حتى يتعلم أدب الطريق .. وبعدها يتلمس أعذار عن طريق المحكمة

لترجع له رخصته ..

لكم

ساهر يعزز تواجده بكاميرات متطورة


أحدث كاميرات ساهر

الرياض - أحمد الشمالي

عزز نظام ساهر تواجده الميداني لضبط وإدارة الحركة المرورية آلياً بالعديد من الكاميرات الثابتة وذات التقنية العالية في خطوة تهدف لتحقيق الانضباط المروري على الطرق والحد من التجاوزات المرورية التي خلفت وراءها العديد من الضحايا والاصابات الخطرة.

وتتميز الكاميرات الجديدة بقدراتها على التقاط المخالفة من عدة اتجاهات ويوفر ساهر من خلال تقنية شبكة الكاميرات الرقمية المتصلة بمركز للمعلومات والذي بدوره يقوم بالتحقق من المخالفة فنياً، ومن ثم يتم طلب معلومات المالك من قاعدة البيانات، ثم يتم إصدار المخالفات ثم يتم إرسال صورة لوحة المركبة المخالفة (لقطع الإشارة او السرعة) إلى مركز معالجة المخالفات ليتم التأكد من المخالفة وإقرارها، ثم يتم الحصول على معلومات المالك من قاعدة البيانات الوطنية، ويتم إصدار المخالفة.

تجدر الاشارة إلى أن نظام ساهر والذي أطلقته وزارة الداخلية قبل خمسة أشهر من العاصمة الرياض سيغطي 16 مدينة ومحافظة ويستخدم عددا من الكاميرات الثابتة والمتحركة والمتنقلة لضبط المخالفات المرورية داخل المدن وعلى الطرق السريعة التي تربط بين مدن المملكة عن طريق نظام دقيق يلتقط صورة واضحة للوحة المركبة وهي تتحرك بسرعة عالية ويستطيع التقاط المركبات المخالفة في جميع المسارات في نفس الوقت.

http://www.alriyadh.com/2010/10/14/article567938.html

لا فض فوك .. اصبت كبد الحقيقه ..

قال الرسول صلى الله عليه وسلم ("إنما أهلك الذين من قبلكم أنهم كانوا إذا سرق فيهم الشريف تركوه، وإذا سرق فيهم الضعيف أقاموا عليه الحد، والله لو أن فاطمة بنت محمد سرقت لقطعت يدها".)