لايردك إلا الشركة الأم .. واترك عنك الوكالة ووزارة التجارة وحماية المستهلك

**فيدل كاسترو** · 27-06-2010, 07:51 PM

السلام عليكم

أقسم بالله العظيم أن ما سأذكره وقع لي ولن أزد عن ذكر الحقيقة

--

أنا أمتلك فولكس واجن قولف - والوكيل ساماكو ويملكها عبدالله هاشم إذا ماخاب ظني - تعامل أجرب وماهو بعيد عن باقي الوكلاء لأن من أمن العقاب أساء الأدب - إلا إنه يتفوق عن بعض الوكلاء بجمال المبنى - والعميل مثلي ماهو مستفيد من تصاميمهم لوكالاتهم يبي خدمة أوادم تحفظ إسم الفولكس واجن .!

موتري كمل معي 10 سنوات - موديله 99 - غيرت طرمبة البنزين 3 مرات وكله من عندهم - قيمته بالصناعية ألمانية 300 ريال لكن عندهم 900 ريال - أيام الدلاخة ماكنت أعرف إلا الوكيل - المهم قبل حروة الثلاث شهور مريتهم فيه ريح بنزين لافللت ويزود لاشغلت المكيف - بحكم خبرة الطل اللي براسي قلت طرمبة - مريتهم وفعلاً قالوا طرمبة - بكم ياولد قال بـ 900 ..!!

لأول مرة بحياتي أحس بالذهانة - دقيت سلف ورحت لسكودا وسألت الفنيين قالوا لي احتمال صفاية بنزين - ليات - شيك قبل تغير .. طلبت صفاية بنزين 37 ريال وغيرته بنفسي وراحت الريحة وضبط الوضع ..!! حسبي الله عليكم وكالة .! وين أروح ولمن أشتكي - أسولف مع الناس اللي برا يقولون لك الله - أدخل عندكم هنا ألقى اللي منغبن - قلت لي النصارى إن قاله الله - حسبي الله عليك نظام خليتنا نهف لليهود علشان عدلهم واهتمامهم بالمستهلك .!

كتبت هاك المعروض البسيط بالفصحى - وذيلته بإيميلي وبرقمي - ورحت لترجمة قوقل وترجمته من عربي لألماني - دخلت موقع الفولكس واجن - توجهت للشكاوي والاقتراحات والله وألصقه - سويت اللي علي والله يعين ماعقب هذي شي .!

يمر اليوم واليومين والاسبوع والاسبوعين - يوم كملت شهر بالضبط .. وأنا بالفصل عند طلابي وهو يدق علي رقم خارجي 971 أعتقد الإمارات - وهو يسولف معي ويسأل عن الوضع وصحة الشكوى وجاوبته وأبديت التذمر - تأسف الرجال ( لبناني ) وذكر إنه من مكتب فولكس واجن الإقليمي بدبي - وان شاء الله ينحل الموضوع - دقايق ويدق علي رقم من جدة - بنت بلهجة حجازية كذلك تأكد من بعض المعلومات والاسم وقالت بالحرف ( أنا أبغى أؤطــّـر المشكلة ) - بعد ماخلصت قالت بإذن الله ينحل موضوعك - دقايق ويدق علي رقم الحبايب 2266..... اللي يعرف ساماكو يعرف هالرقم - لعلي انشغلت شوي ولارديت - ثواني رقم جوال يدق وأرد إلا مدير صيانة ساماكو .!! الله أكبر المدير الأردني براسه يدق - لا ويقول بآخر المكالمة تبغى أي شي لاتدق إلا على الرقم ..!! الله أكبر وينكم قبل الشكوى ؟ عقب ماخرشوكم الحمران العطران جيتوا تقلبون وجيهكم عندي - أقسم بالله إني مواطن عادي جداً - نعم الحال ميسور لكن مالي بالواسطات - لكن ليه ياجرب تجبرون الواحد ياخذ حقه من فوق - بعد مااتصل قلت الموتر سليم لله الحمد بعد ما إنتم مقررين طرمبة بـ 900 ريال قال ولو تعال نشيك على موترك مجاني حق الـ 250 ألف .!! قلت ليه مجاني ؟ قال زعلناك وواجب علينا نرضيك - قلت الله يقويكم وأرسلكم الموتر .

--

يا شباب - كل الوكالات واحد - وزارة التجارة - حماية المستهلك - قال صبة قال احقنة كلهم متجمعين خياط فنيلة - نصيحتي للمظلوم لايردك إلا الشركة الأم - والله لو معك بانشي اشتك وياخذون حقك - 10 سنوات قضيته أتردد على ساماكو ماحسيت بالفرق بالتعامل إلا عقب الخرشة - النية عقب مااشتري موتر جديد من أول يوم أبطقهم بشكوى - وأعيش بينهم ملك
- سلام عليكم

منقول من مكشات

**خالد 1** · 28-06-2010, 01:44 AM

هلا .. فيدل كاسترول
بيض الله وجهك وهذا هو التصرف السليم
ولو كلنا نفعل مثلك .. تشوف تغير في تعامل الوكالات مع المواطن الى الافضل

**هدهد سليمان** · 28-06-2010, 01:48 AM

من جد تعيش ملك

بس فكره حلوه

ترجمة قوقل ،، المواطن دائما غلبان ،، وينغبن زياده اذا لقي بالخارج معاملة افضل وحمايه للمستهلك

تبا لوكلائنا

**ماجد2002** · 28-06-2010, 12:24 PM

السلام عليكم

صحيح
عن تجربة حصلت معي مع نفس الوكيل
ولم تفلح المحاولات الا من المانيا ودبي

**مواطنه عايشه** · 28-06-2010, 08:30 PM

لو كلنا رحنا للشركة الأم وإشتكينا سيعمل لنا الوكيل ألف حساب فكرة معقولة

**مقاطع نت** · 29-06-2010, 12:08 AM

وزارة التجارة منهم وفيهم

شدلي واقطع لك

اخر مايفكرون فيه المواطن

**pass2love** · 29-06-2010, 01:30 PM

بيض الله وجهك

تدري ليش خاف من الشركه الام
لان الوكاله مو مستعده تعطي وكالتها لشخص فاشل ولا يقدر يحافظ علي الزبائن

اي مشكله امطروا الوكاله الام بالشكوي