السلام عليكم ورحمة الله وبركاته

الصراحة الكثير من الناس تشتكي من الوكالات والنصب الزائد والمواعيد الي مالها داعي

ولاااااا حاطين لهم بوستر كبر لوحة صيدلية الدواء الي بالدمام <<< ما عمره شاف خير خخخخخ خدمة خلال ساعة وين ساعة لاقين بلفة الله يصلحك

المهم اني مرة رحت لم الوكالة وكان عندي جيب ربع كان فيه مشكلة في القير ما يعشق الثالث والخامس بعد ما الطعو مندوب مندوبي طلع لك الزول (آآآآآآآآآي معليش يا زول) طلع الموتر دق سلف كم ماشي وايش المشكلة ومن متى بدت المشكلة المهم بعد ما خلص يقول لازم يطلع الفني بالسيارة يجربها قلت اوكي يله وين الفني
طلع الفني بالسيارة ورجع يقول الظاهر القير يبيي له توضيب
يا مسلم غير بدل كم يكلف والله يازول حوالي 3500 ريال
طلعت من الوكالة ورحت صناعية الخبر واطسطس بالورش الي يقول توضيب والي يقول هلالات القير والي يقول الكلتش المهم مؤسسة الإفتاء كلن يفتي على كيفه
رجعت المكتب وأنا منقهر
سالفة من هنا مع الشباب وسالفة من هنا قال لي واحد من العيال الموتر كان واقف يعني له فترة ما تحرك؟ قلت ايه.... قال عطني المفتاح وتعال
نزلنا للسيارة وشغلنا
المهم ان خويي عرف السالفة وقال لي اذا علمتك وش السالفة الغدا على حسابك
عاد انا من الفرحة قلت له اغديك لو تبي شهر بس علمني السالفة تكفى
قال خلاص مشينا الغدا اقولك انواع لحسة المخ الموتر يعشق اول وثاني وثالث ورابع وخامس وريوس
بعد ما تغدينا قال لي معك 30 ريال قلت ايه وش السالفة قال اربخ بس مشينا قطع الغيار الي بالثقبة وقال لي انزل المحل هذا وقول له عطني (جلدة عصا قير) نزلت وجبت الجلدة رجعت ولقيته فاك الديكور الي عند القير ويقول لي امسك امسك الربله هذي <<< الرجال متحمس من جد المهم فكينا الربلة الي تجي على القير وركبنا الجلدة ورجعنا الديكور مثل ما كان ومشينا.
المشكلة وين يا شباب

المشكلة أن الجلدة من كثر ما السيارة كانت واقفة ما وصلها زيت وضربها الشمس لما قالت بس فلما اشتغلت السيارة مع التعشيق اكسرت الجلدة وعصا القير طاحت يمكن مسافة نص سم - ولما أعشق العصا تحك بالصاجة بالثالث والخامس
اما الثاني والريوس والرابع اوكي
تدري ليه؟؟؟
لأنك لما تعشق الـ 2 4 والريوس تنسحب العصا يعني ما تمسك بالصاجة

والوكالة تقول 3500 ريال هههههه والله سالفة

الموووووهيييييم الوكالات انواع النصب والاحتيال ولاااااا تغيير اقمشة امامية وخلفية بـ 1300 ريال والله مصخرة

حاس اني طولت عليكم المهم هذي مشكلتي معهم
تحياتي للجميع

من يدير صيانة الوكالات هم أصحاب الوكالات
يعني سياسة النصب تطلع من الوكالة إلى الصيانة
30 ريال صارت عندهم 3500 ريال
تشكر على هالموضوع ..

جمره غضا
مشكورة على المرور
والصراحة انا رجعت لهم بعد السالفة هذي ومعي فاتورة الشراء وكلمت السوداني والمسؤل عن الصيانة
لكن ما عرفوا وش يقولون

لكن الحمد الله الي جت عى الـ 30 ريال

فعلاً شي يقهر .... على طول ما عندهم وقت 3500 .... وما تلاحظون ان دائما اسعارهم مجبوره ما فيها كسور ابد .....
يعني لا ولما جربها الفني على طول طلعت الفتوى .... ما فكر حتى يفك شي يشوف ..

لكن الحمد لله شف ربي رحمك من هالحراميه ..
حسبنا الله ونعم الوكيل

الله موجود و ربي رزقك بخويك اللي دلك على المشكله و تيسرت

المشكله من اللي ينضحك عليهم كل يوم و مالهم غير الله

حسبنا الله و نعم الوكيل فيهم

سمعت و ما شفت بعيني لكن سمعت

ان كل موظف بالصيانه له هدف شهري لازم يطلعه و هو مبلغ معين

يعني لو السياره ما يبيلها شي يقول لك لااااا يبيلها تغيير القطعه هذى و هذى و هاذيك و يبيلها مصاريف بالالاف و هي ما يبيلها شي لكن موظفين الصيانه مطالبين بتحقيق مبلغ معين او انهم الظاهر يخصم منهم او يدفعون او شي من ها القبيل

مدري

عموما يعطيك العافيه على نشر مثل ها التجربه

لا عدمناك يا الغلا

لا وعبداللطيف جميل يقولي فني الصيانه في الوكاله
تغيير سير وبواجي للافلون 2005 ب 600 ريال

ورحت لورشه كويسه بالصناعية غير السير والبواجي وزود خليته ينظف الاقمشه والهوبات
كلفتني 150 ريال فقط

ؤالله
نصب
عيني
عينك

اصلا ليش تروحون للوكالات
اكيد بينصبون بالسعر كلن يحط من راسه
وانا ماعمري رحت لوكالة رغم فخامة سيارتي
نصابين عيني عينيك
وبعدين عجبتني بها الكلام

والصراحة انا رجعت لهم بعد السالفة هذي ومعي فاتورة الشراء وكلمت السوداني والمسؤل عن الصيانة
لكن ما عرفوا وش يقولون
هذا اللي لازم يصير لازم يعرفون انهم غشاشين ومفضوحين
اياكم وياكم بعدم العقوبة عليهم

تصور لو الواحد عرف بعض الامور اساسية في صيانة السيارات او حتى وجد شباب سعوديين في ورش خاصة لهم للصيانة ..كان ممكن نشوف هنصف الورش الي فيها الاجانب و كذلك بعض مراكز الصيانة التابعة لشركات السيارات يهشون الذباب و انتم كرامة

أزيد من الشعر بيت

كان لدي سيارة هايلكس موديل 95 وصار فيها صوت وزوزة مزعج طبعاً بعد انتهاء الضمان بيومين فقط
ووديتها لفرع الوكاله اللي مقابل مجمع الظهران وطلع ما يسمى المهندس من جنسيه عربيه بالسياره مشوار ورجع وقال لي يبي لها يومين ثلاثه من شان نتأكد من المشكله .. اليومين ثلاثة استمرت أسبوع وبعدها مطلوب مبلغ 1500 ريال مع تغيير مجموعه من قطع الغيار حسب قولهم وإن شاء الله كل شي تمام.
دردبت رويسي على مأمور الصندوق ودفعت المقسوم وخرجت بسيارتي وبعد شوي وإلا موتري مثل ما دخل للوكاله لا جديد سوى المبلغ اللي دفعته لهم بدون وجه حق .
بعدها ركب معاي واحد من الزملاء وسمع الصوت وحكيت له السالفه السابقة , قال ما يحتاج يا أخي مشينا للصناعية الثقبة ووداني لكهربائي فلبيني وسمع الصوت طبعا بعد مشوار مائة متر قال لي ارجع وجبلي سلك كيلو
وبالطبع سلك الكيلو ما تعدى سعره 80 ريال وشغل يد 50 ريال وهذا كان الحل الجذري للمشكله التي نهبتني بسببها وكالة السيد الجميل 1500 ريال ...... الله لا يربحه دنيا وآخره.
وسلامتكم..