ماعاد افطر في يامال الشام

**الدائرة مستطيلة** · 21-08-2007, 12:36 AM

مطاعم يامال الشام ..

عندهم سنتدوتشات الفطور بيض وشكشوكة .... وإلخ
وعندهم سندوتش مشكل Mix وهي بيض ودجاج صيني وعجة وشكشوكة
وأنواع معها وسلطة ومايونيز وكله فوق بعضه ..

المهم كان سعرها 3 ريال .. وفي أول الصيف صار الدجاج الصيني بـ 4 ريال
ولا يحط منه في المشكل لأن البلدية منعته من طبخ العجة في الصيف
المهم قبل اسبوع رجع الوضع مثل ماكان السنتدوتش كل الأنواع في الـ Mix
زاد ريال وصار السعر بـ 4 ريال

يعني مافيه أي سبب يدفع لرفع السعر .. للعلم النظافة لـكم عليها هالأيام
ولأكثر من مرة قـفاز اليد الشفاف ( مقـطوع ) وأصابع المحترم تلعب في أكـلك

**ضد الطمع** · 21-08-2007, 12:54 AM

يااااااااربي على القرررررف .. زود على الغلاء قرف ..

**المتضامن** · 21-08-2007, 07:54 AM

والله شف يالحبيب
أنا يامال الشام مره طبيته وطلبت فطور سندويش مشكل Mix وتسممت
ورحت عندهم مره ثانيه وسلمت الجرة يعني ساعات تمشي وساعات تصير مشاكل عسر الهضم (بالعربي سكاكين بالبطن) المهم اخر مره رحتلهم وتسممت من نفس السندويش المشكل وقاطعتهم والحين عطوني سبب زيادة لمسح اسمهم من قائمة المطاعم

مستهلك ذكي · 21-08-2007, 11:34 PM

باللة هذي أكلة ..بيض مع دجاج صيني مع مايونيز مع عجة ( اللة يكرم النعمة ) أكيد بتتسمم !!!
يأخي كيس صامولي وجبن أنظف وتأكل منة يومين وأنت مطمن
أنا موظف وكل يوم أخذ معي من البيت سندوش ولا أكل من عمال البوفية ( البنقال )
آكل وأنا مطمن ..........مو كذا وبس ..حتى أوفر !!

**أبو ناصر** · 22-08-2007, 01:07 AM

بسم الله الرحمن الرحيم

أخوي الغالي الدائرة المستطيلة :

هذا مطعم يا مال الشام أكلت منه ثلاث مرات ومرتين تسمم ومرة جت سليمه
ومن بعدها حرمت أدخل عندهم سواء الفرع اللي في العليا او اللي بالقدس او غيره من فروعهم
الفاشله

صراحه ذاك المطعم فاشل بكل ما تحمله الكلمة من معنى

بس خذ وانا أخوك هذي مطاعم حقات فطور دايم افطر فيها والحمد لله كل واحد أحسن من الثاني

المطعم الاول :

مطعم موريان : عاد هذا الطعم عنده مكسيكي ابن حرام يعني راح تفلها وانا اذكر انه الصحن بخمسة ريال اما الساندويش والله ما ادري بكم ما قد اخذت منهم
وهم كمان شغلهم حلو ومرتب

اما الوصف حقه : اذا جيت مع الدائري الشرقي وجاك مخرج حق عبدالرحمن الغافقي اطلع معه ورح يم شارع عبدالرحمن الغافقي وامش مع الشارع وراح يجيك قبل ما ينتهي الشارع تقريبا ب300 متر على يدك اليسار مطعم موريان

المطعم الثاني
مطعم أبو عدنان : وهذا عاد متخصص بالفلافل والحمص بس يعني ما يبيع شيء غير فلافل وحمص وصراحه هم شغلهم أكثر من رائع مرتبين ونظيفين واهم شيء لابسين قفازات حقات الايدين << طبعا ما هي مشقوقة زي خويك >>

المطعم ذا له عدة فروع بس انا ما اعرف الا واحد وهو حول بيتنا ودايم اذا بغيت فطور او عشاء اروح لمه وانت رح وجرب

وصف المطعم : رح لامتداد طريق الملك عبدالله من عند جهة الحمراء واشبيليا مهو من عند طريق مكة
المهم اذا عديت اشارة صحارى << السوق اللي كمان فيه بقالة التميمي>> تروح قدام ويجيك على يدك اليمين مركز الامير سلمان وتمشي قدام الين تجيك اشارة عندها أرض كبيرة مسورة بشينكو كبير وعلى يسارك مدارس الامجاد وفيه مقابل للشينكو هذا مشاتل
اذا جتك الاشارة هاذي رح من عندها يمين على طول واذا دخلت يمين من عند الاشارة تلقى على يمينك ناس باسطين يبيعون خضار وفاكهة وعلى يسارك مشاتل حقات صعايده
المهم خل ذولاء كلهم وراك وتجيك بعدهم اشارة رح من عندها قدام بعد الاشارة تقريبا ب500 متر يجيك ابو عدنان على يدك اليمين

ومائدة عامرة

**ابونوره** · 22-08-2007, 05:00 AM

اللعبة الحين هو تغييرهم للديكور .. علشان يقولون غيرنا الديكور .. لهم عذر يعني !

حسبي الله عليهم وبس

خياس ... وقوه عين

**المتضامن** · 22-08-2007, 07:22 AM

مشكور يابو ناصر عالمطاعم بصراحة ضربة معلم

**الدائرة مستطيلة** · 23-08-2007, 12:02 AM

كل الأخوان لكم مني شكر على ردودكم وتفاعلكم الطـيب ..

وأخص أخوي أبو ناصر بالشكر على ردهـ المميز والمفيد لي ولغـيري ..
وأنا أبـذكر لك فروع للمـطاعم اللي ذكرت وهي في شرق الريـاض

فـلافل أبو عـدنان .. فـلافل وحمص والموقع حي السـلام - شارع الزبـير بن العـوام وأنت متجه غـرب
قـبل إشارة الإمام الشافعي على يدك اليمين وبجـوار سـنابل السـلام ..

وبعدهـ بحوالي 800 متر راح يكون مطعـم موريـان على يدك اليـمين قبل إشارة كلية المعـلمين

ومائـدة عـامرة لك أيضا ً ..

**تلقائي** · 25-08-2007, 09:22 AM

أخوي الدائرة ..
كنت أروح يامال الشام وبعد ماشفت من القذاره اللي وصلت حد الغثيان !!
قاطعتهم نهائياً في كل الوجبات والأوقات !!
وحتى لو بريال

صدقت في ملاحظة القفازات والأصابع .. منظر مقرف جداً ..

تحياتي

**الدائرة مستطيلة** · 25-08-2007, 09:58 AM

أشـكرك أخـوي تـلقائي ..

عـلشان ما أكون ظالمهم ولا أكون الوحـيد اللي شاف منظر ( القـذارة ) بـعينه
أنا أهم شيء عـندي نظافة المطعم .. لكن إنها تـجتمع سـوء خـدمة وغـلاء أسعار

يسمح لنا - يامال الشـام - بالمقاطعة الدائـمة