السلام عليكم ورحمة الله وبركاته

صبحكم الله بالف خير

ومساكم الله بالف خير

كل على وقته

في رمضان اشتريت مويه بعدد اربع دبات اول مافتحت الدبه الاولى لقيت فيها ريحه وسخه ومعفنه

طبعا حالي حال كل مستهلك يلاقي له شغله وهو فاضي يبي يزعج المسئولين الله يخليهم للتجار

وسويت نفسي زعلان ومادري وشو المهم قلت لواحد من الشباب عن الموضوع وكانت ردة فعلهـ زي

هالمخلوق بالضبط كاني اشوفه الحين قدام عيني ردة فعلي كانت كذا قلت له ياخي خلي عندك

روح رياضيه وسلك لي انا زعلان ومنزعج جدا من اللي اشوفه قدامي قال طيب اشريلك مزيل رائحة عرق

المهم زي ماقلت بالمقدمهـ روحي الرياضيه لفيتها ولفيتها وحطيتها بمخباتي

بعد العيد قلت حرام اكب المويه للزرع يمكن يتسمم ويشتكيني لاني مستهلك ماعندي ضمير وقلت ابولع فيها

نار علشان امحي اثار الجريمه تذكرت ان فيه عداوه قديمه جدا مابين الماء والنار ولايحبوا بعض قلت ليش اصير

مستهلك ماعندي ضمير المهم (( ياكثر ماقول المهم )) قلت ابرميها بالبحر تذكرت الرياض مافيها بحر ومالها

داعي اروح للشرقيه يمسكوني اخواننا الشرطه وانسجن بتهمة تهريب مويه ريحتها وسخه والمصيبه معاها

مزيل رائحة عرق وهنا الشرطي الذكي بيمسكني على هالنقطه بالذات.

المهم ياجماعة الخير رحت للمويهـ وصراحه كان بعد العيد باسبوع والاقي لي كائنات غريبه داخل دبه المويهـ

وانا اللي صار وجهي كذا واناظر بتركيز شديد لدرجة اني شفت واحده من هالمخلوقات تسوي زي

هالفيس هذا كانه استاذ بابتدائيه يجمع الطلاب بعد الفسحهـ (( ياحبنيلهم مدرسين الابتدائيهـ ))

فديتهم والله, وانا بتركيزي اشوف هالمخلوقات الخضراء يدورون بالمويهـ صراحه اللي قهرني واحد من

هالمخلوقات يناظر فيني من داخل الدبه ويسوي زي هذا لا وكمان مطلع لي إقامه مزورهـ وهو يسوي

الحركه السابق ذكرها انا جلست بجنب الدبه وقمت استرجع ذكرياتي كلها من يوم انا صغير (( اقول اطلع برى ))

وانا بجنب الدبهـ اناظر مقهور الا ومخلوق ثاني مسوي زي كذا للي مطلع اقامه مزورهـ اناظر مو مصدق

وفيه واحد واقف بجنب التاريخ حق المويهـ مسوي كذا شكله دافور . انا حكيت مخي لين طلع لي تلفون

الأمانه بصراحهـ الرقم على انه اطول رقم بالمملكه لكن صعب تحفظهـ 940 لا ويخصمون من رصيدكـ ويلطعونك

ثلاث الى اربع دقايق (( كم أنتم مؤدبون يا كول سنتر الامانهـ )) علشان يطلع لهم دخل ولو شوي لكن يقال لهم

لاعبين علينا اللي صاير بعد ما بلغت على المحل المخالف انتظرت ثلاث اسابيع تقريبا ومافيه ردة فعل انا طبعا

قمت اراقب المحل علشان اعرف من اين يحصلون على الماء ووصلت للمصنع ولها سالفه قلتها لكم بالموضوع

السابق (( يالحبيب هذا اول موضوع لك )) .

معليش اسف على المصالهـ , رحت لبلدية المعذر ودخلت على حق التفتيش حقهم الشيباني ومالقيته

لقيت موظف سئلت عن المدير قال لي وش تبي فيه قلت له سالفتي واني مبلغ على محل مخالف وللحين

ماعلمتهم عن اللي لقيته بالمويه صراحه كان عندهم حفله وماكنت ابي اخرب عليهم (( اللي عندهم حفله

المخلوقات اللي بالمويهـ )) قال لي الموظف عطني رقم البلاغ قلت له سجل عندك وطلع جهاز الايفون وسجل

الرقم وضغط على NO اللي يجيك احمر وقال لي خلاص رح انت وانا ابتابع قلت له طيب ممكن تعيد لي الرقم

قال لي بكل ثقة على الرغم ان عندي اربع عيون وشفت اللي سواهـ يارجال رح انت وماعليك اليوم بيطلع له

مراقب من البلديهـ قلت له اوكيه مو مشكله ماحبيت احرج نفسي معه اكثر من كذا.

المصيبه ياجماعة الخير موظف البلديه مادري هو متعمد او يستهبل ماراح للمحل اللي بلغت عليه راح لمحل

بجنبهـ انا نفس ابو وجه احمر تغير وجهي للازرق والابيض وكل الوان الطيف من القهر هل موظف البلديه

متفق مع راعي المحل ؟ مادري هل موظف البلدية متعمد لاني بلغت عليهم مرهـ ثانيهـ ؟ مادري على الرغم

من ان الموظف حق البلديه ماطلع من مكتبه الا بعد ماسويت بلاغ ثاني تاكيد للبلاغ الثالث .

ادري اني طولت عليكم اخواني لكن من عندهـ واسطهـ او يعرف طريقة اقدر اقفل المحل والمصنع لان

المخلوقات اللي قهروني بحركاتهم (( ))

المحل يبيع مويه صحه وببسي واللي يمتلكه بنغالي اقامته منتهيهـ وينام داخل المحل بمكان سري
المصنع يديره وافد سوري اقامته منتهيه وكان موظف عامل مزور اقامتهـ يعمل بتعقيم الماء

الصور ماعرفت ارفعها لكن لكم هالمقطع باليوتيوب :



اسم الشركه او المصنع موجود عندي والمويه تاريخ تعبئتها كان في : 13 / 02 / 2012 م

اللي عنده قدرهـ على حل هالمشكلهـ ياليت يفيدني او عندهـ طريقه ممكن اقدم على جهه معينهـ

ياليت يفيدني والسلام عليكم ورحمة الله وبركاته

ملاحظهـ (( الثلاث دبات كلها مليانهـ مخلوقات تقهر بنفس اللي بالمقطع وياليت تنشرونهـ لعل الله يفتحها بوجهي والاقي لي احد يقدر يساعدني بقهر هالمخلوقات ))

اخوكم عبدالله

يا كثر هرجك صارت قصه ماهي شكوى لو اختصرت كان وفرت

كتبت سابقا موضوع قد يفيدك لتتجنب مثل هذه الحادثة
أرجو قراءة الموضوع بتمعن عسى أن ينفع الله به

التعرف على جودة الماء المعبأ في القوارير

انتظر شوي وتشوف العجب

حسبي الله ونعم الوكيل ..