هل استطيع شراء بيت العمر ... ؟

**panadol** · 21-09-2011, 05:22 PM

السلام عليكم
بخش على طول
راتبي مع البدلات 8 الاف ريال

اخذت قرض من البنك العربي قبل سنتين وقدره 120 الف ريال دخلت فيها مشروع وخسرت واللي هو مشروع صاله رياضيه والسبب الرئيسي بخسارتي بلديه النسيم وما اقول الا الحمد لله على كل حال

بعده فتره فكرت بالزواج لاني خفت اعنس بما ان عمري وصل 30 سنه وبحثت عن طريق لكسب المال من اجل الزواج وسمعت ان بنك الامرات يعطي قرض على التعريف بالراتب يعني بيعطيني مبلغ حلو

المهم رحت واشترى البنك مديونيتي من البنك العربي وتحول راتبي الي بنك الامارات وعطاني مبلغ كويس لكن ما يكفي للزواج

رحت لشغلي وسحبت بدل السكن وعلى مبلغ القرض وقرض الزواج على دين من هنا ودين من هنا المهم قدرت اجمع مبلغ الزواج ولله الحمد تزوجت

وطبعا استاجرت شقه في عماره ومبلغ الايجار 1500 ريال شهري وتسلف حوالي 10000 ريال علشان استاجر والمكتب ياخذ حقه ومنها 200 ريال للمويه وسباكه وخلافه المهم خلصت الشقه وسكنت

البنك ياخذ مني شهريا 2500 ريال

وايجار البيت ياخذ من 1500 ريال
وقرض الزواج ياخذ مني 700 ريال
وهذا غير الديون اللي متراكمه على من هنا ومن هنا
باقي لي 3300 ريال من راتبي يطير منها حوالي 800 ريال ديون ويصفى لي تقريبا 2500 ريال

مدري وش اسدد فيها كهرب ولا جوال ولا مصاريف البيت ولا عروووس ولا عزايم هذا اذا ما خربت السياره

والله اني كنت ادخن وقطعت التدخين علشان اوفر للبيت وطبعا هذي اعتبرها حسنه ولله الحمد
سؤالي: بما اني شجاع وتكلمت ولاني خايف ولا مستحي وطبعا حالي مستور ولله الحمد لاني اهلي مستاجرين قريب مني وكل ما فضت الثلاجه اروح واتسوق من بيت اهلي وببلاش

هل اقدر اشتري بيت العمر ومتى اقدر اشتريه في حال كانت الاجابه بنعم ؟

مع تحيات: مواطن يعيش بالخيال العلمي

**positive saudi** · 21-09-2011, 07:14 PM

لا تشكيلي أبكيلك

حالتك صعبه مثل آلاف الشباب السعودي

بس فيه حاجة إيجابية راتبك 8000ريال ( ما شاء الله ) غيرك ما يعطيه البنك قرض علشان راتبه أقل من 4000 ريال لا و قطاع خاص .
بعد ما تخلص ديونك هذه يمكن تقدر تحسب للبيت بس الحين ما أظن
الله يسهل علينا و عليك و ألف مبروك الزواج

**Mr.English** · 22-09-2011, 02:15 AM

اقتباس:

المشاركة الأصلية كتبت بواسطة panadol

هل اقدر اشتري بيت العمر ومتى اقدر اشتريه في حال كانت الاجابه بنعم ؟

لا , ما تقدر ولا أقدر

الله كريم

**الرئيس** · 22-09-2011, 03:16 AM

ان شاء الله نقدر واقولك نقدر بس متى
متى ماالله اراد
اسمع بس مني يالي انت مثلي
الان قدم على البنك العقاري ومن هنا لخمس سنوات تكون سددت ديونك طلع قرض واشتغل فيه على ثلاث سنوات يعني لو يقولك البنك بنعطيك خمسين وقدم على بنك التسليف اسري بيعطونك اربعين ان شاء الله خير وبركة وبعدها بيطلع اسمك اشتربها شقة واسكن فيها وايني واياك تشتغل في امور تخص البلديات والجوازات
الشباب ماشاء الله عليهم يبغون كل شي في يوم وليل مسوي طالع منها

**أمير المقاطعه** · 22-09-2011, 03:30 AM

الحال واحد أنا واخوك

موظف براتب 1500 ريال طبعا تحت التدريب

طفرت أمس ما بقى الا معي الا 33 ريال

وبكره بروح الرياض والبنزين مولعه لمبته

خلصت الدوام وقلت انا رجال وكل شوي اطلب ابوي

واعبي بعشره وادعس للمطار

واطقها ساعه الا ربع لين جاء واحد وانا خايف من رجل المرور ورى

وكل ما جاء واحد تاكسي وقف واحد وقال الاحساء وقلت 200 ريال

وافق واقرب محطه عبي 20 الباقي وادعس للاحساء

وصلت ونزلته بالموقف

واروح للنقل والقى اربعه يبون ركاب ويقولون المشوار بـ 200 ريال

واكسر السوق عليهم وقلت 100 ومحد يبي يوصل بالمبلغ هذا

رجع معي وبثلاث ساعات 300 ريال والحمد لله

والان ببيت الوالد بالرياض والحمد لله لقيت قيمة البنزين للرياض عالاقل وكم ريال لين يجي 27 ميلادي

**hajmutwally** · 22-09-2011, 02:00 PM

اولا الحمد لله على كل حال .... واحمد ربك على نعمته على كل حال ..

وابارك لك الزواج و بالرفاه و البنين ...... والله يعينك على الحليب والحفايض والزي منه ...

.و تراك احسن من كثير جدا ...غيرك واحد اعرفه توظف ب 5 الاف واقترض 90 يقسط 1800 ريال لمدة حوالي 5 سنوات الف ليشتري سيارة و ويسكن و ياكل بيت اهله .... وبلاه الله بسيارته كل يوم خربانه وهات يبه ابصلح سيارتي مره قير ومره طرمبة بنزين و مره عكوس وهلم جرا

وشوف الأخ الكريم امير المقاطعة وش سوى ..... الله يبارك له ...

يأخي اين ما كنت فأبواب الرزق مفتوحه .....

وكل شغلة لها ربحها وخسارتها ....

لكل مشروع دراسة جدوى اقتصادية وخاصة مثل مشروعك .... لكن لماذا لا تفكر بالسهل و اللي يجيب الرزق السهل ...

شوف لا تقول لي عيب و ما عيب ..... هذي مشاريع لا تكلف كثيرا ..

1- شف لك محل ايجاره رخيص وخاصة أن يكون في موقع بعيد عن اسواق الخضار وفيه تواجد سكاني كثيف أو عمال (كثر فلفل تراهم يحبونه ....هههههههههه ) ....وافتح لك دكان خضار .وبع سيارتك و اشتر ونيت و من بعد صلاة الفجر عليك بسوق جملة الخضار ....(على فكرة فيه موزعين يخدمونك اذا تدفع كاش) وبالبركة ...

والا عب الونيت من محصول الموسم ... يعني جح و الا جراوة .... والا فواكة الصناديق الصغيرة ابو 5 و 10 ريال ... والا تمر ....والا بطاطس و بصل .... طماط و خيار المهم اللي تلاقيه رخيص ....

وممكن تشوف لك محل من محلات المظلات اللي سامحه بها البلدية او اسواق المواسم مثل التمور...

وممكن تتقاول مع مطاعم و الا فنادق أو اسكانات او مستشفيات او بقالات ....

بس هاه و انا اخوك اياك ... والطمع ..............

2-.... اطلع لك ميتين كيلو عن الرياض و احظر حراج غنم معروفة مثلا الرويضة والا رماح 80 كيلو او ابعد شوي الحفر واشتر وبع خاصة يوم الراتب .... والا اذا تبي مر شركات مثل الوطنية و نادك و لبون واشتر لك كم رأس منهم و رح السوق ولا تاخذ اكثر من 50 ريال بالرأس والا نشبت بهن و اكلهن و مبيتهن .....هههههههه

والا شف منزملائك بالعمل و جيران ومنمنهم يريد ذبيحة ... والا اعلان بالوسائل المجانية برقم جوالك مثل الوسيلة والمبوبة وأسواق و ما شابهها

3- يوم الخميس و الجمعة عليك بحراج مثل حراج ابن قاسم .... ادرس كيف يسون قبل تطب و ممكن تتخاشر مع ناس خبراء في الموضوع انا مرة قام و احد و حرج وشروها مني حملة دينا ب 800 .. تشاركو فيها ...وقالوا بع و انا مستعجل ... ابي الفكة منهم ...هههههههه
راعي الدينا قال اصبر لمان تشوف وش يسون فيها حرجو عليها بينهم قطعة قطع و قلبي يتقطع من الآلم ... قلبتها دراما ....هههههههههه ......تدري باعوا الثلاجة بس ب 600 ريال و2 مكيف 1000 ريال ....وما نيب مكمل لكي لا أقلب المواجع ......

سوق جملة الخردوات ... شارع السويلم ......مقصات اظافر و مقاصات و بطاريات (احجار) والذي منه

وامسك لك طريق في محطات مثر طريق القصيم .... وبالبركة ....

سبح ....ابواك ......ميداليات ..... ....... في نفس الموقع ...ومثلها البخور ودهن العود و عطور البخور .وسوقها على زملائك في العمل ..

ومثلها الفصفص و المكسرات و البهارات تشتري بالكيس و تحطها بكيسات وتبيع عليهم بالدرزن ..

اللي يغلف هذه الكيسات بالحرارة تبدأ من 150 ريال اعتقد بشارع الظهران والله اعلم.

رح سوق جملة الملابس قرب عند اسواق المعيقيلية و اشتر من الرخيص من ملابس الأطفال ابو 5 و 10 واقعد عند اي محلات او بأي عاير يمر من عنده نساء وابشر بالخير ... .أو سوقها على زملائك في العمل ..

شمغ و عقل و ملابس داخلية وماشابهها من اللي ثمنها رخيص ومكسبها مضمون ... و العاب اطفال رخيصة ومكسبها حلو ...

قصرت و قفل المخيخ الأيمن ......ههههههههههههههههههه

اللي بعدي يكمل .........

**ابوطلال** · 22-09-2011, 02:19 PM

الاخوان ماقصروا وفو وكفو ..
كان الله في عونك ورزقك من حيث لاتحتسب ..
شكري مع مروري .

**نورة** · 22-09-2011, 06:18 PM

تأثرت بحالك وادعو الله لك أن يعدل حالك..ويقضي عنك الدين ويفتح لك أبواب الرزق الحلال...

أخي العزيز ...لا تقلق من ضيق الحال الذي أنت فيه الآن ،أنت لازلت في مقتبل العمر المهم التدبير ومهم جداً جداً جداً أنك ماتتعامل بأي شكل من الأشكال بمال حرام كثر أو قل فهذا مفتاح أكيد لطرد الخير والبركة في الرزق..
ماقصر الأعضاء الذين ردوا عليك بالاقتراحات ..اعمل بها قدر أمكانياتك ...

البيت لا تستعجل عليه أهم شيء التدبير، فالتدبير نص المعيشة ،ولا تحاول تلجأ للقروض...لا تستعجل الثراء ..كثير من أقاربي كانوا مثل حالتك وفتح الله عليهم والان يسكنون بعمائر ملك لهم وأحدهم عمارته 6 شقق وساكن بفيلا روف والحمدلله بعد أن كان يسكن بأولاده ال6 بشقة صغيرة جداً ...بقي جانب مهم جداً أيضاً وهو رضى الوالدين تراه والله العظيم جالب للرزق ...

أكرر دعائي لك بأن يفرج الله عنك ويرزقك من فضله ويصب الخير عليك صباً...آمين...

**hajmutwally** · 22-09-2011, 06:54 PM

واو ..... غلبتنا هالمره . نوره.. اللي يوفقها ....ويجزاها خير ...

تراي يوم احط الرد كنت جويعان ......<<<<< قاضين قازي ....ههههههه

كما قالت اختنا الحبيبه ....
1- ابتعد عن القروض وخاصة الحرام
2- رضى الوالدين .............
3- الرضى بما قسم الله ....
4- التدبير ....أقتصد

وازيدها .....
5- أبتعد عن المعاصي و حافظ على اركان دينك وخاصة الصلاة على وقتها
6- تصدق بما تقدر عليه في خير وبركة "ما نقص مال من صدقه"
7- لا تشتري الا الضروريات فقط " لإن من يشتري ما لا يحتاج سوف يبيع ما يحتاح"
8-لا تستخدم اي من كروت الكردت كارد أم المصايب حتى ولو بت جوعانا .....
9- ادعوا بهذا الدعاء " اللهم اغنني بحلالك عن حرامك و بفضلك عمن سواك .
10- بدل دفع ايجار ممكن تقسط شقه حتى لوهي بعيدة عن الحي الذي تريد ان تسكن فيه فـ ممكن ان تؤجرها وتسكن أينما تريد وايجار الشقة تدفعه من ايجار شقتك...

ضاقت فلما استحكمت حلقاتها **** فرجت وكنت أظنها لا تفرج

اللهم فارج الهم مزيل الكرب و الغم ....فرج همنا وهم اخونا في الله بنادول وهموم جميع المكروبين ...........

**هذا انا** · 22-09-2011, 07:26 PM

الله يرزقك من اوسع ابوابه
والاخوان ماقصروا