تذوقت الفرق فأعجبني

**صرخة مواطن** · 12-09-2007, 01:23 PM

البارح طلعت من البيت اخذ لي ولعيالي عشاء ... طبعاً كلمت زوجتي قلت وش تبون عشاء ... قالت اي شي ... قلت لا لازم تحددون تبغون بيتزا والا اكل صيني والا وجبات سريعة والا غيرة ... مرة ثانية قالت اي شي ... قلت طيب اعطيني بنتي اكلمها ... ردت البنت وقلت لها وش تبغين عشاء يا بابا ؟؟؟ قالت ما ابغى توني اكلت اندومي بس جيب لي حلاوة !!! قلت طيب ... وجلست ادور وافكر وانا محتار .... وفجأة بدون سابق انذار توقفت عند محل تميس وكانت هذه المرة الاولى منذ تقريباً سنة اوقف عند محل تميس ... قلت في خاظري دامها قالت اي شي ابعلمها وش هو اي شي !!!!

قلت للموظف <<<(داخل بنك انت ووجهك ... متى صار الخباز موظف!!!) عطني بريال خبز هولي وبريال خبز عربي ... وانا انتظر تذكرت ان البنت تبغى حلاوة ... قلت للخباز عطني حبة وحدة تميس بالجبن والسكر ... قال ترى هي بريالين قلت ما يخالف تستاهل الصغيرة ... طلعت من عندة ومريت بقالة واخذت جبن مثلث ب 3 ريال (يعني مجموع العشاء 6 ريال).

كلمت ام العيال وقلت لها انا جايب العشاء جهزي السفرة وحطي شطة وكتشب وصوص للسلطة وسوي لي براد شاهي لان خاطري في شاهي مع العشاء.

طبعاُ دخلت البيت والقى المدام محهزة صحون السيرفس والشوك والسكاكين والملاعق وزيت الزيتون والملح والفلفل وصوص السلطة وخلافة.... طالعت في يدي وقالت وين العشاء !!! قلت هذا هو العشاء مو انتي تقولين اي شي !!! رأيت عينيها تقدح شراراً ... وبنتي جات تركض تقول وين الحلاوة يا بابا قلت في الكيس ... يالله هات الشاهي واجلسوا ...جابت الشاهي وجلسوا ... طبعاً العملية بسيطة ومو معقدة ... امسح الجبن على الخبز وكل لقمة بشفطة شاهي (وربي طعم خطييييييييير) ... ما اخبي عليكم كل العائلة قالوا ان طعمة لذيذ ... بس عاد بعد ما خلصنا الوجبة الدسمة قالت ام العيال انا عازمتك بكرة (الي هو اليوم) على العشاء في مطعم 5 نجوم بمناسبة ان بنتنا دخلت المدرسة ... قلت خلاص ان شاء الله (تحسب الحركات هذي تمشي علي ... ما تدري اني بخلي فلوسي ومحفظتي في البيت ... علشان لا تلزق الحساب فيني)

**ماستر_كي** · 12-09-2007, 01:48 PM

ما شاء الله جبتها صح !!!

ب 6 ريال بس بتتعشى مرتين ... اللهم لا حسد !!! سعبلت

**الدائرة مستطيلة** · 12-09-2007, 01:51 PM

صرخة مواطن ..

الله يحفظك وعائلتك .. دامت عليك حياة سعيدة دائماً و ( خـذ المحفظة معـك )
الظاهر بتـطلع حق عشاء يومين .. بالتوفيق

**جمرة غضا** · 12-09-2007, 01:52 PM

شكل الشعب السعودي اجمع امس على عشاء موحد
تميس وشاهي بالنعناع

**فتاك** · 12-09-2007, 02:03 PM

الله يحفظكم ويحميكم ويحفظ الصغيرة لكم
الظاهر الداخلية اليوم بتعشيك بميزانية امس واليوم وبكرة

**ابو نواف** · 12-09-2007, 02:53 PM

هذا العشاء اللي يطيب الخاطر
و 6 ريال فقط
وتنام خفيف
بلا كبسة بلا دسمة
بالك مرتاح مع التميس والجبن والشاهي

**فني ومفتش صحي** · 12-09-2007, 03:13 PM

أنت ماشاء الله عليك الله يديم عليك الخير والنعمة مريت التميس بعد سنة

ترى غيرك ماسك سراء كل ليله والعشاء اقل من 6 ريال

**ستيف جورج التميمي** · 12-09-2007, 03:27 PM

ههههههههههههه

والله السالفة اعجبتني وترا (( تميس بسكوووت )) يمدحوونه زي شابورة
على العموم التنوع في الاكل شي رهييييب
المهم قصصك مشوقه وننتظر منك الجزء الثاني على احر من الجمر
عندي سوال محيرني

(( اخذت محفظتك ولا لا )) <== ( ملقوف

)

**المراقب العام** · 12-09-2007, 03:21 PM

وهو في احلى من التميس والجبن وخصوصاً بعد 15 الشهر وانت نازل الى 24

**الشبح** · 12-09-2007, 09:51 PM

اقتباس:

المشاركة الأصلية كتبت بواسطة المراقب العام

وهو في احلى من التميس والجبن وخصوصاً بعد 15 الشهر وانت نازل الى 24

الحال من بعضه
دايما اقول لأمي بلاش من الاكل الشامي

تعرف وش احل شي تميز ( البسكوت ) مع جبنه سائله بس ما تكون المراعي
وافضل للصحه يكون العشاء
خبز اسمر مع الجبنه السائله او علبة لبن زبادي ام ريال وماهي المراااعي
وشوف صحتك بعد شهر