انتي السبب مو التجارة

فتحي حلواني

وبعدين معاكي ياحرمة ما تبغي تبطلي من الحركات حقتك دي كل يوم والتاني وانتي بترفعي في الأسعار هلكتي الناس خافي الله في نفسك كل يوم والناس بتدعي عليكي ما تركتي عازة في السوق إلا ورفعتي سعرها.. الأدوية ورفعتي سعرها والملابس والمواد الغذائية واللحم والدجاج والأجبان والخضروات ومواد البناء كل شيء في السوق ورفعتي سعره خافي الله في الناس شوية خليتي الناس عايشين في هم وغم وكله من تحت طمعك وجشعك وصدق من قال ما يملأ عيونكم إلا التراب.. فرصعت أم فتو عيونها وقطبت جبينها وطالعت فيا مدهووشة ومربووشة وحطت يدها على جبيني.. وقالت: إشبك ياسيدي اليوم شكلك مسخن؟ والا جرى لعقلك حاجة؟ وشكلك كدا والله أعلم شارب سوبيا بايتة؟ إشبك كدا جالس تتهجم عليا وتتهمني إنه أنا اللي رفعت الأسعار اللي في السوق؟ أنا إيش لي شغل في الأسعار.. الأسعار كل يوم بتزيد وكله ببركة وزارة التجارة اللي شايفة وساكتة على كل اللي جالس بيصير في السوق، وبعدين ما لقيت إلا أم فتو تحط حرك فيها؟.. أصلك إنتي منتي عارفة إيش الحكاية؟، إيش الحكاية ياسيدي فهمني؟، أستهدي بالله وصلي على النبي وأنا حقول لك الحكاية من طقطق لباب وزارة التجارة، وفكينا دحين من المناقرة اللي بيني وبينك لا يسمعها (أحمد محسن العمودي ويمتحنا في عمرنا)، لإنه قبل أسبوع زمان نزل خبر في الجريدة بيقول إن وزارة التجارة مالها شغل في ارتفاع ومراقبة أسعار الخضار والفواكه وإنه دا الشي من اختصاص عمل الأمانات والبلديات وكل اللي على وزارة التجارة إنها بس تتفرج وتصفق.. قصدي تقوم بتنظيم وتنمية التجارة والإشراف على حالة الأسواق، يعني بالبلدي كدا أنا أتفرج من بعيد لبعيد ومالي شغل في حكاية الأسعار، لأنه فيه تجار وهوامير ما نقدر عليهم ولا نقدر نهرجهم ولا نقدر نقول لهم تلت التلاتة كم.. عشان كدا بقول والله أعلم إنه السبب في حكاية ارتفاع الأسعار جية من وزارة الخدمة المدنية يعني ما يكفيها إنها معطلة الوظائف والترقيات عن الغلابى وتجي كمان تكمل الناقص وترفع الأسعار على الناس لأنه وزارة التجارة بتقول مو شغلي إنه الأسعار بترتفع كل يوم والتاني.. أو يمكن والله أعلم إنه أمانة جدة هية السبب الرئيسي في رفع الأسعار يعني ما يكفيها إنها مبهدلة الناس بالمشاريع المتعطلة وبالمطبات والحفر اللي بهدلت سياراتهم.. أو يمكن والله أعلم إنه وزارة التعليم هيه السبب في ارتفاع الأسعار يعني ما يكفيها إنها مجمدة الوظائف التعليمية على المعلمين والمعلمات ومن سنوات طويلة وفي كل التخصصات اللي تحتاجها البلد وتجي تكمل الناقص وترفع أسعار الخضار والفواكه.. أو يمكن يكون نظام ساهر هو اللي بيرفع الأسعار يعني ما يكفي حبيبنا ساهر إنه شغال سلخ في عباد الله وما في إلا غرامات وقسايم ويجي كمان يرفع أسعار الخضار والفواكه.. أو يمكن والله أعلم إنه شركة المياه الوطنية هيه السبب في ارتفاع الأسعار يعني ما يكفي إنه الشوارع في البلد متبهدلة بالمياه الجوفية وبمويات المجاري تقوم كمان ترفع أسعار الخضار والفواكه.. ياناس ياهوه إذا كان وزارة التجارة مالها شغل في حكاية رفع الأسعار مين حيكون السبب؟.. ياناس ياهووه لازم يكون عندنا لستة أسعار أسبوعية عشان نعرف راسنا من رجولنا.. ياناس ياهوه لازم يكون عندنا لجنة أو هيئة تهتم بحال السوق والأسعار، وأهم شيء إنها تكون هيئة ولجنة مستقلة يعني بعيدة عن طيبة الذكر وزارة التجارة، وبعيدة كمان عن جمعية حماية المستهلك اللي وجودها زي عدمها وياليت تشوف هادي اللجنة حل لحكاية طمع وجشع التجار اللي ما يخافوا الله في عباد الله.. يامسؤولين: أهل البلد صاروا مخنوقين من كل ناحية وكل واحد منهم بيقول (يايدي فكي حلقي).. يارب ألطف بعبادك يا أرحم الراحمين.. وعيشوا كتيييير تشوفوا كتيييير.

والله كلامه صحيح


السؤال

احنا ايش نقدر نسوي غير المقاطعه؟

مية المية كلامك يا أبوفتو..

و ترى فيه ناس خلاص بطلت تقول "يايدي فكي حلقي" ..

صارت الآن تقول "يايدي أضغطي زيادة عشان نموت و نرتاح".

فتحي حلواني هو بطل الكوميديا الساخره بلهجته الحجازيه الجميله