اللي اشترى مكيف شباك من فترة قريبة ياليت يتفضل

**الركن** · 15-08-2010, 11:30 PM

السلام عليكم ورحمة الله وبركاته

رحت السوق يا شباب ولو أقول لكم فيه 30 شركة تعرض منتجاتها ممكن تكون قليلة.. الوكيل يجيب له أكثر من اسم ويغيير اسعار كل نوع من المكيفات ومن جد تدوخ لمن كل واحد يعرض لك بضاعته وكل وكل واحد يكذب بضاعة الثاني..

أحتاج مكيف 24 وحدة قوة دفعه قوية تبريده ثلج كمبروسر كبير وأصلي

أنا حدي 1600 لكن لو فيه أفضل يا ليت تعطوني خبر..

ويا ليت أي أحد من أهل المناطق الحارة ومشتري مكيف قريب يعطينا رد باسمه ومزاياه وعيوبه..

وجزاكم الله خير

منقول للفائده

**قاعدلهم** · 16-08-2010, 01:47 AM

1600 ريال تجيب لك 18 وحدة
من المكيفات المعروفة مثل متسوبيشي دايا مع أن جودتها أنخفضت

**رب أسرة** · 18-08-2010, 02:43 PM

ارشح لك مكيف هيوجن ماليزي شباك وفيه تجميع صيني مجربه ومضمون بارد جداً ولو توقف قدامه طار شماغك من قو النفخ 24 وحدة 1300 ريال. شاريه من سنتين.
النوع الثاني اريك صيني برضه سبلت وشاريه من 7 سنوات وحاطه في الصالة وزي الألف بارد ولا في الكلام فايدة.
شكراً

**فارس طيبة** · 19-08-2010, 02:55 PM

ابعد عن شي اسمه تجميع سعودي = صيني

**ليث الغربية** · 20-08-2010, 03:43 AM

مكيف يورك 24 وحده
شريته قبل رمضان بـ1600 ريال
كمبروسر امريكي والباقي تجميع سعودي
تبريده جيد جدا
صوته مزعج جدا
(كنت ناوى اشتري متسوبيشي 24 وحده بس مالقيت وقتها )

**azizamig** · 21-06-2011, 10:37 AM

اقتباس:

المشاركة الأصلية كتبت بواسطة فارس طيبة

ابعد عن شي اسمه تجميع سعودي = صيني

لا وانت الصادق
اذا قيل لك صناعة سعودية معناها قطع صينية تجميع بنجلاديش
خل نكون منطقيين شوي
موب عمال المصانع بنقالية يعني صناعة بنقالية
يعني اسواء شي ممكن تتوقعة
مكيفات الراجحي مصنع الجزيرة صناعة بنقالية 100%
مع احترامي للرواجح بس اي شي فية اسم الراجحي لازم يصير دمار
والسبب
قلة الرواتب
طول وقت الدوام
عدم الاهتمام بجودة القطع المستخدمة في التركيب فيه قطع صينية سيئة
اذا شاهد عامل التجميع كل هذي البلاوي لم يتشجع في التشييك جيدا على ما عملت يدة

**خبير مكيفات** · 31-08-2010, 08:52 AM

اذا مره مش لاقي متسوبيشي دايا , وعلى فكره تبريده افضل من او جنرال مليون مره , اذا كنت تقارن هذا بذاك ...

مالك إلا مالك

مالك إلا كارير 24 او يورك 24 او الزامل 24 , كلهم كمبروسراتهم وحده , هندي كبير ... هذي راح تفيدك ...
بس اكد على حكاية الكمبروسر الكبير , لأن فيه منها انواع كمبروسراتها صغيره .
وفوق كذا سعرها 1600 واقل ...

ليتك اخوي تنزل الرياض , وتحمل المكيف الي ودك فيه بالسياره , وفي ديرتك , اقرب باكستاني تعطيه 50 ريال يركب لك اياه ..

**خبير مكيفات** · 31-08-2010, 08:55 AM

اظاهر مابقي نهائياً شي اسمه كمبروسر امريكي بالسوق , إلا قبسون , ناس يقولون ان كمبروسره امريكي ...

لو فعلاً الأمريكي بالسوق كان تلاقيه يباع بثلاثه آلاف بالراحه ...

**الركن** · 31-08-2010, 09:44 AM

خبير
فيه سعودي صاحب محل
ينصحني ب مكيف ليونارد
يقول الكمبرسور امريكي شد بلد
وان ما اعجبك رجعه

**خبير مكيفات** · 31-08-2010, 11:43 PM

اقتباس:

المشاركة الأصلية كتبت بواسطة الركن

خبير
فيه سعودي صاحب محل
ينصحني ب مكيف ليونارد
يقول الكمبرسور امريكي شد بلد
وان ما اعجبك رجعه

ما اعرف انه فيه كمبروسر امريكي ( نهائياً ) في السعوديه , يقولون لك امريكيه ( تجميع هندي ) يعني هندي في الأخير ...
واعني مكيفات الشباك العادية , الوحيد الذي يزعم ان مكيفاته تحمل كمبروسر امريكي امريكي هو مكيف جبسون .

طيب خله يشغله لك قدامك , وقارنه بمكيف او جنرال او فوجي او قبسون , اذا طلع احسن منهم كلهم خذه ...
في الرياض صافين كل المكيفات في دولاب ويشغلونها لك واحد ورا الثاني تقدر تقارن بينهم بسهوله ...
وبصراحه اغلب المكيفات اليوم تجميع سعودي وصيني تعبانه , وافضل الرديء القبسون , والمتسوبيشي للمناسبه تجميع سعودي جده , لكنه اكثر من عشرين سنه يتجمع وكمبروسره متسوبيشي ماعليه كلام , عشان كذا اثبت جودته برغم تجميعه السعودي ...

كان يمدح لي البايع بمكيفات يورك لأنه آخر الرجال الشجعان والبقية الباقية من المكيفات الأمريكيه في السوق , طلبت منه يشغله مع كارير , طلع دمار ولا تبريد ولابطيخ , وكارير احسن منه , بس شغل لي يورك ابو كمبروسر صغير مع كارير ابو كمبروسر كبير ...

اطلب منه يشغله قدامك وشف , اذا عيا عليك , تراه بايع في الأخير , يعني وده ربح , والبياعين للأسف تجربتهم عقيمه , يعتمد على كلام الناس الي يوصله , اجي اقول له المكيف هذا تعبان , يقول للزبون الي بعدك والله الناس مايمدحون في هذا , ولا يقيس ويعرف ويفهم في التفاصيل , شغالين نقل كلام بين الزباين ...

اعرف صاحب محل مكيفات , جميع مكيفات بيته عبارة عن او جنرال , مع انه صجنا بجودة المكيفات الصينيه وانها ماعادت مثل اول وتطورت ومكيف قري وما قري !