السلام عليكم ورحمة الله وبركاته
اخواني والله ما ادري وش اقول
الفساد في هالبلد انتشر بشكل مو طبيعي والوضع صار لا يطاق
الغش التجاري في كل مكان والله ذبحونا التجار
والقهر ان ماعندك احد لا وزارة التجارة ولا مكافحه غش
ياربع انا بقولكم ايش صار معاي وانتم احكمو
قبل كم شهر كنت ابحث عن سيارة امريكي مستعمله ونضيفه
فقلت يا ولد روح للمعارض الي في الدائري الشرقي اغلب السيارات امريكي استخدام حشمه اكيد
المهم راحت ولفيت المعارض ولقيت عند معرض الموتر للسيارات الي بين مخرج 10 و 11 سياره
نوع اكاديا موديل 2007 نظيفه وممشاها 24 الف ميل وصراحه خشت مخي
السياره من الخارج زي اللوز يعني مافيها اي شيء وتعتبر مو ماشيه بالنسبه لسنة الصنع 2007
توكلت على الله واشتريت السيارة طبعا شامل ضمان المعرض من صيانه وخلافه
بعد ما شريت السياره سمعت ان فيه مواقع متخصصه لعرض تقارير تخص السيارات الي جايه من امريكا
بموجب رقم الشاسي
المهم اشتركت بموقع معروف بمبلغ وعرض علي تقرير السيارة
السيارة الحمد لله مافيها اي شيء
لكن الغريبه اخر تسجيل للعداد وهي خارجه من الميناء متجهه للسعوديه 85 الف ميل
وانا مسجل العداد انه 24 الف ميل
ايش معناته هذا ((اكيد تم تغيير العداد لرفع قيمه السيارة))
اشتركت في موقع ثاني بمبلغ وكمان عطاني نفس التقرير .. السيارة ماشيه 85 الف ميل
كتبت خطاب جدا مؤدب ومهذب لصاحب معرض الموتر
وعنوانه ((استفسار وتوضيح))
وذكرت له في الخطاب ان العداد يختلف عن ماهو مسجل في بلد المنشاء
انتظرت يوم يومين اسبوع ...مارد علي
وارسل له خطاب ثاني بعنوان ((استفسار وتوضيح للمره الثانيه ))
دق علي بعدها السوداني الي يشتغل عنده
قالي / صاحب المعرض يقول انت وش تبي بالضبط
قلتله ياخوي انا مو راعي مشاكل ولا ابي الا حقي
فرق السعر انتم عدلتو في العداد لرفع سعر السياره وانا ابي حقي
يا اخوان الفرق قرابه ال 61 الف ميل
قالي انا راح ابلغ صاحب المعرض
المهم انتظرت فتره على امل القى تجاوب منهم
لكن ماعندك احد (( من امن العقوبه اساء الادب))
ارسلت له الخطاب الاخير عسى الله يهديه وسلمته للصحب المعرض
عصب وقال بالحرف الواحد (( اذا مو عاجبتك السيارة ردها للمعرض ))
بكذا انا قلت مالي الا امشي بالاجراءات الرسميه
واكتب شكواي لادارة مكافحه الغش التجاري في موقع الوزارة
بعد ما لقيت اجراءات صارمه اتجاه الغش التجاري وادخلو وتاكدو
والله ماكملت نصف ساعه الا متصلين علي من الشرقيه يستفسرون عن الموضوع
اكدت لهم الموضوع وقالو طيب راجع الوزاره
قلت طيب شكواي في الموقع ماتنفع قالو لازم تراجع الوزارة
(( انا مادري ليه حاطين قسم للشكاوي اذا لازم نراجع الوزاره ))
المهم كتبت الشكوى وراجعت الوزارة امام مبنى الاحوال المدنيه في الرياض
وقدمت الشكوى للقسم وصلحت لها رقم وارد وقالو اطلع فوق سلمها الادارة قلت ابشرو بس كذا !!
سلمتها عند احد المسؤولين طالع في الشكوى قالي ماراح تستفيد حاجه
قلت نعم ياخوي
قال اقولك ما راح تستفيد حاجه قلتله ليه ياخوي هذا يعتبر غش تجاري اذا هذا مو غش ايش الغش بالله
قال حنا سحبو الصلاحيات منا والان الاوراق تحال الى هيئة التحقيق والادعاء العام
والهيئه (( على كلامه )) مليانه شكاوي زي كذا وانتظر لين يجيك الفرج
قلت انتم طيب ايش دوركم
طالع بموظف عنده وتبسم
عرفت ان ماعندهم سالف
قالي او تطالبه بالمحكمه قلت ياخوي انا مو فاضي مطارده وراح الرجال بالمحاكم على ثلاث شهور و سته شهور
قلت ليه ما تطلع من عندكم لجنه وتتاكد من كلامي
لان الشخص هذا زي ما غير في عداد السيارة راح يغير في عداد السيارات كلها ويغش الناس كلها
وبعدين انا جيتكم بموجب البنود الي في موقع وزارة التجارة والبند مذكور فيه ان اي غش يتم اكتشافه يتم تغريم الشخص
من 100 الى 500 مع السجن سنتين طيب وين الكلام هذا
قال يا رجال لا تصدق كل الي تقراه
وقال انا اقولك الكلام هذا وانا والله ماعرفك لكن عشان اختصر عليك التعب
قسم بالله حطمني
لو احنا في اوروبا او امريكا كان من زمان ماخذ حقي ..هذا اذا تجرء يغش من اساسه
يالربع انا كل اوراقي موجودة والاثباتات موجودة
انا ابي حاجتين من موضوعي هذا
1- رايكم وش اسوي
2- التحذير من المعرض
حسبي الله ونعم الوكيل
-------------------------------------------
صورة تثبت بان العداد لدى معرض الموتر 24 الف ميل


صورة تثبت ان العداد داخل الولايات المتحدة 58 الف ميل
عن طريق موقع معروف وتم الاشتراك لعرض كامل التقرير






احدى الخطابات الموجهه لمعرض الموتر للسيارات



الملصق وعليه رقم الشاسيه



الخطاب الموجهه للوزارة ولم يتم الاستفادة منه



غرامه وبنود الغش التجاري كما هو في موقع الوزارة







انتهى

--------------------------------------------------------

بوجهه نظري اخواني بانه يجب فضح كل متلاعب من التجار ومن يتساهل في موضوع الغش التجاري

فعلا من امن العقوبه اساء الادب

جزاك الله خير

فعلا غش تجاري ، ولكن لا تيأس ، تابع قضيتك مع التجارة ، ولو تمكنت من التواصل مع احدى الصحف الالكترونية لنشر هذا الغش لكان افضل ، لأن الصحف الورقية شريك للتاجر .

اخي الكريم الله يعوض عليك

سعر السياره اصلا مبالغ فيه جدا

تابع قضيتك

تابع
مهما حصل واتجه للقنوات الرسميه مره اخري

الله يوفقك وتاخذ حقك متابعين معك الله يسهل امرك يارب ....

أخوي الكريم في حالة عدم تجاوب الإدارة العامة لمكافحة الغش التجاري معك أو رأيت أنهم لا يريدون العمل وإتعاب أنفسهم من أجل معاقبة صاحب المعرض فيفضل أن تشتكيهم لهيئة التحقيق والإدعاء العام وبالتالي تضرب عصفورين بحجر معاقبة موظفين في جهة حكومية متقاعسين عن أداء عملهم ومعاقبة صاحب المعرض .. وإحتسب الأجر على الله ولاتقف حتى تحصل على حقك كاملاً دون نقصان .. أعانك الله .

الله يخلف عليك ويعوضك خير . ويجزاك خير على تحذيرك لنا من التعامل من هذا المعرض .
---------------------------------------------------------------
. وياليت إذا تقدر تضيف رابط الموقع الذي يفيد كم قطعت السياره لان بعضنا يجهله وشكرآ

ماشاء عليك يا skyguard
عرفت تعرف حركاتهم من غش وضحك على الناس .
والله أكثر الناس تشتري وتدعس بنزين ... وسيارته يمكن لفة العالم ويقول جديدة .

اخوي الحل أعانك الله على بلوااااك.

اكتب خطاب ووضح فيه وش صار معك مع صاحب المعرض و مع وزارة التجارة وتوجة للهيئة حقوق الانسان بإذن الله راح يحلون مشكلتك, او يرشدووونك على حل بإذن الله.
(((( اذكر حصل مع اخوي مشكلة مع شركة تأمين اهلية, صار له حادث والخطأ كان على الخصم وكان الخصم مؤمن لدى الشركة المعلنة للافلاس مؤخراً وبعد جرجرة ومماطلة منهم, مباشرة توجة إلى هيئة حقوق الانسان قدم خطابة وشرح فيه وش الي حصل بينه وبين الشركة, تفهمو موقف اخوي واستلموا الخطاب, بعد يوم او يومين اتصلو عليه شركة التأمين وقالوا تعال استلم فلوووسك كاملة )))).


قدم شكواك واستعن بالله ثم فيهم وبلغنا وش صار معك واستمر في شكواك ولا تتهاون فيها ابد حتى وان اعجبتك السيارة ومقتنع فيها, استمر في النشر في الصحف الالكترونية والصحف المحلية وووووو الخ حتى يعرفون ان الله حق وأي جهة ما نصفتك اذكرها واكتب عنهم.


إذا وزارة التجارة مانصفت المواطن والمستهلك ولا هيئة حقوق الانسان نصفتهم فعلى الدنيا السلام.

وبالله التوفيق.

بسم الله الرحمن الرحيم

ما اقول الآ :
الله يعطيك خيرها و يكفيك شرها
==============
سيناريو متوقع : لو صعدت القضية لأعلى المستويات مهما كانت ( و اشك اصلاً انها تقبل في اللجان او المحاكم ) بيقولون : البيانات اللى انت جايبها من وين ؟
بتقول : من الانترنت .
بيقولون : وشو هذا الارنت !!!
بعد الشرح لهم ...
بيقولون : اصلاً ما نعترف بالأنترنت ، و بعدين انت شريت على بينة نافية للجهالة ( يعني شفت و لمست و قلبت السيارة قبل ما تشتري ) و اي مطالبة بعد هذا الفحص غير مقبول ....
الله يرحم الحال
الله لا يبارك في رزق كل تاجر يغش
موعدنا معهم يوم القيامة ان شاء الله تعالى .

الله يجعلها من النواصي المباركة لك و لا يهمك ممشاها ان شاء الله فيها خير لك .
اخوك
رياض

المشاركة الأصلية كتبت بواسطة riyad2020

بسم الله الرحمن الرحيم

ما اقول الآ :
الله يعطيك خيرها و يكفيك شرها
==============
سيناريو متوقع : لو صعدت القضية لأعلى المستويات مهما كانت ( و اشك اصلاً انها تقبل في اللجان او المحاكم ) بيقولون : البيانات اللى انت جايبها من وين ؟
بتقول : من الانترنت .
بيقولون : وشو هذا الارنت !!!
بعد الشرح لهم ...
بيقولون : اصلاً ما نعترف بالأنترنت ، و بعدين انت شريت على بينة نافية للجهالة ( يعني شفت و لمست و قلبت السيارة قبل ما تشتري ) و اي مطالبة بعد هذا الفحص غير مقبول ....
الله يرحم الحال
الله لا يبارك في رزق كل تاجر يغش
موعدنا معهم يوم القيامة ان شاء الله تعالى .

الله يجعلها من النواصي المباركة لك و لا يهمك ممشاها ان شاء الله فيها خير لك .
اخوك
رياض

=================================

و الله مو قصدي التهبيط من عزمك
و الله انا مستعد لمساعدتك بأي شئ تريده
و ادعمك بالدعاء و اي شئ آخر تطلبه مني
انا بس محبط لأن لى تجارب سابقة
و كتبت التعليق و انا في حالة احباط من هذح الامور
================================
الله يوفقك و تاخذ حقك و تبشرنا في المنتدى الغالي بذلك
مرة اخرى : اخوك رياض