تنبيه خاص ! (موبايلي)

**أبوخالد** · 14-09-2008, 08:37 PM

السلام عليكم ورحمة الله..

كل من يشترك مع موبايلي في أي من باقاتها المختصة بالشبكة العنكبوتية(النت)
(في مثل حالتي مشترك باقة مفتوحة 350 ريال شهري) (كونكت)،

تعرضت لقصة من ذوات (قهر الرجال) أعوذ بالله منه،
فصل عني الإشتراك فعلمت في نفس الوقت وبواسطة رسالة من موبايلي
أن الإشتراك انتهى ويجب التسديد، طرت في نفس اللحظة للصراف وسددت،
وعدت للجهاز فوجدت أربع رسائل من موبايلي 2 عربي و 2 أنقلش، وحدة
تم استلام المبلغ والثانية تم رفع رصيدك من النقاط.
شبكت والأمور زينة، يومين ويفصل، قلت يمكن مثل العادة مشكلة من الشبكة،
أنتظرت يوم وجربت ماكو فايدة، أتصلت على مركز الخدمة عندهم(1100)
قالوا لي (بعد خبصة كالعادة) أنه لديك مشكلة وهي أنك بعدما سددت لم تطلب
إعادة تفعيل الخدمة، رجاء أنقز لأقرب فرع موبايلي وان كان لك حق بتاخذه
(إيه هين) طرت لأقرب موقع (بعد التراويح) والا العالم ملطوعة قدام الباب
متجمهرين(واذكر الجوازات والأحوال المدنية وفروع الراجحي) وفتحوا الباب
وآخر واحد خذ رقم وأنلطع 45 دقيقة أو تزيد جاء دوري رحت للموظف قال لي
بعد (لخمة واضحة على وجهه) وبإنكسار: أنت مافعلت الباقة بعد التسديد
فأيش صار ياأبو خالد؟!! النظام حقنا شبكك على خدمة النت خارج الباقة
يعني كأنك مستخدم شريحة جوال عادي والتكلفة هللتين لكل كيلوبت/ الثانية !.
وللأسف استنفدت حسابك بهاليومين (بدل شهر) ومالك حل غير انك تسدد
مرة أخرى وتفعل !!!، وين كبيركم ؟؟!! وأروح له ويقعد يتفلسف علي وأنا
"أزمجر" يقول كيف أفهمك وأنت غاضب ! هديت نفسي قدامه(من الداخل مكفهر)
وقلت له غرد، قام يحوص ويلوص وأحنا نعطي المشترك ثلاثة أيام بعد الإنقطاع
وبعدها لازم تفعيل الباقة من جديد، فقلت له متى الإنقطاع رد من يومين! طيب كم المهلة
؟؟!! قال الله أكبر يعني أنت ماقدرت تسدد الا قبلها بكم دقيقة؟؟؟! (عجيب والله).

قال على بلاطة ماأقدر أسوي لك شي، بهذلته وكبر الموضوع ولا ودي أقول لكم على اللي سويته !.

الزبدة: من تاريخ فصل الإشتراك مهلة ثلاثة أيام وان لم يتم التسديد الا بعدها،
يجب تفعيل الباقة مرة أخرى والا الله يخلف على فلوسكم.

آسف على الإطالة.

**alzuhary** · 14-09-2008, 08:54 PM

ابو خالد .. احفظ حقوق القصة لا يلطشونها عليك طاش ما طاش

الصراحة قصة غبية من موبايلي .. يعني لازم افعل الاشتراك .. عجزانين لا يحطونها تتفعل تلقائي

والله بلاهم عارفين أن حق المواطن ضايع .. الله يعوض عليك

وربي قصة تقهر

**ام العيال** · 14-09-2008, 09:57 PM

مافهمت يعني انت سددت ولا قلت فعلوا؟؟

طيب وش الفرق اكيد انك ماسددت الا عشان التفعيل

صراحة شيي غبي مرة والا انا اللي مافهمت

ياسفابكم ياموبايلي والله اني احبهم

**alzuhary** · 19-09-2008, 01:41 AM

اقتباس:

المشاركة الأصلية كتبت بواسطة ام العيال

مافهمت يعني انت سددت ولا قلت فعلوا؟؟

طيب وش الفرق اكيد انك ماسددت الا عشان التفعيل

صراحة شيي غبي مرة والا انا اللي مافهمت

ياسفابكم ياموبايلي والله اني احبهم

جواب يغني عن آلاف الكلمات

ولو قيل لخدمة العملاء أو قدم كشكوا لكان كاف

مشكورة أم العيال

**أبوخالد** · 14-09-2008, 10:45 PM

الزهري

اليوم عندنا من بدايته لنهايته قصص يندى لها الجبين
وش تحفظ وش تخلي !
تخيل تكنولوجيا واستعباط ولازم
تفعل (يدوي) !
عجبي !

أم العيال

نعم سددت ولا فعلت.
بعد ماينقطع الإشتراك مهلة ثلاثة أيام(حسب زعمهم)
التسديد بعد انقضاء المهلة لازم تفعيل
شفهي تتصل عليهم وتطلب تفعيل
(الكترونيآ بالرد الآلي ممكن)
أو يتم حساب المبلغ
بطريقة
سروقية
على العموم موبايلي بكل مافيها أفضل من الإنفصالات
وهذا عن تجربة مني مع الثنتين
لكن الحذر واجب معهم
ومع غيرهم.
شكرآ لك.

**جمرة غضا** · 14-09-2008, 10:58 PM

الرسالة اللي وصلت لك ذكرت ان التفعيل مطلوب ووضحت طريقته ؟
لمبة !!!!
اي شخص له شكوى او تظلم على اي شركة اتصالات او مزود خدمة
يرسل شكوى لهيئة الاتصالات
نائب المحافظ للشؤون القانونية على الفاكس
014618033

**أبوخالد** · 14-09-2008, 11:15 PM

جمرة غضا

لا والله ماجاني تنبيه ولايحزنون
والمشرف يقول لي لو نبغى ننبه المشتركين
يبغى لنا ميزانية خاصة، يقول عدد مشتركي النقال بالشركة
ثمانية ملايين ؟!!!!
والمشتركين بالنت عددهم أربعة ملايين !!!
تبرير عجيب غريب !.
جزاك الله خير وشكر لك إضافتك للمبة !
(لحسن الدنيا ظلما)
فعلآ لازم يعلن هالرقم للأهمية.

**أرخصوه أنتم** · 15-09-2008, 05:25 AM

حسبنا الله يبو خالد على عملتهم فيك
والظاهر إن شركاتنا حول بعض أخوي جرى له موقف مماثل مع الاتصالات لكن بمبلغ مية ، وشكاهم وردوا له المبلغ لكن بعد ما حرقوا أعصابه

**ابو جنــــــى** · 15-09-2008, 05:58 AM

الله يعوضك يابوخالد
والله حاجه تقهر , والتكنولوجيا اصبحت ضدنا وليست لخدمتنا والخطأ على اللي برمجها لتصيد وتتلاعب((وبالقانون)))

**أبوخالد** · 18-09-2008, 10:57 AM

أخوي العزيز أرخصوه أنتم...

العذر والسموحة من كثر المواضيع نسيت هالموضوع !
ياخي أتصالاتنا بالبلد تفشل ! حسبنا الله عليهم.

شكرآ لك على مرورك أخي الكريم.
ــــــــــــــــــــــــــــــــــــــــــــــــــ ــــــــــــــ
أخي الكريم أبو جنــى...

العذر منك أنا نسيت الموضوع راح تحت !
تقهر وبس ؟؟!! الا تقتل الله يكفينا الشر.
وصدقت أي شي بيطلع بهالدنيا الظاهر
بيسخرونه ضدنا !.
أحيانآ أتساءل ((هو حنا ذابحين لهم أحد ؟)).

شكرآ لك على مرورك ياغالي.