لاتفوتكم فعاليات العثيم مول المدهشة ! (فيديو بعارين وخرفان المول )

**جمرة غضا** · 24-07-2011, 09:28 PM

مهرجان العثيم فكرة فريده من نوعها
هل فيه احد سبقه عليها ؟
من تدخل العثيم مول الموجود على الدائري الشرقي تعرف ان فيه فعاليات مدهشة

رائحة فعاليات المهرجان تستقبلك من عند بوابة الدمام الدور الارضي

طبعا لا هي رائحه زهور !
ولا رائحة شوكولاتة
وهي رائحة قهوة ولا حتى ريحة ذرة وفشار

الرائحة ريحه بعارين وخرفان

بصراحة الريحه تصك بالراس وتخلف المخ وتشك بانك وسط سوق الثمامة للغنم والبعارين

هذا مهرجان العثيم بطريق الدائري ( بعارين ,خرفان ,وراعي ,وهجيني !)
بمجمع مغلق يحط فيه بعارين وخرفان !

قبل يومين توجهت له للتسوق ولكن هجيت من اول محل دخلت له .. ما تحملت ريحه المجمع ..
خافوا ربكم بالمتسوقين وخافوا ربكم بالبهايم .. بهايم تنحط بمجمع مغلق مكيف ؟!
اذا مره فكرة المهرجان عاجبتكم وتبون تطبقونها
(عندكم المواقف الخارجيه حطوا شبك بها وحطوا البعارين بها )

مقطع صغير صورته قبل ما اهج من ريحه المول ..
التصوير من الدور الاول امام اللفت المجاور لمحل نيو لوك
ومن يذهب للدور الارضي الموجود به البعارين والخرفان ينتبه الارض وسخه من التراب والـدمن ..
ياليتهم على الاقل يفتحون الابواب ويكبون معطرات ومعقمات كودها تغطي على ريحه البعارين والخرفان

على فكرة ركوب البعير مجانا لايفوتكم

**هامور** · 24-07-2011, 09:37 PM

كل هذا من اجل استقبال رمضان والزوار

والله استخفاف بعقول الزوار

اكيد سيكون الجوائز اغنام

**أبوخالد** · 24-07-2011, 10:39 PM

ههههههه زحف العثيم وحاسها.

خبير التسويق راعي خلفات، صرعة والظاهر حسب وصفك إنها صدق "صرعة" خخخخ.

مشكورة عميدة على نقل الحدث الفريد.

**HEMI** · 24-07-2011, 11:11 PM

وازيدكم من الشعر بيت،،
فرع العثيم مول في الدمام جايب لنا بعارين وحاط جنبها خيمه ومعها عامل قاعد يحمس قهوة، تقول والله انك قاعد في البر مو مجمع.

**جمرة غضا** · 24-07-2011, 11:23 PM

حياكم جميع

صدقت يا هامور استخفاف بعقول المتسوقين ..

اقتباس:

خبير التسويق راعي خلفات، صرعة والظاهر حسب وصفك إنها صدق "صرعة" خخخخ.

ريحه تصرع صرع

اقتباس:

المشاركة الأصلية كتبت بواسطة HEMI

وازيدكم من الشعر بيت،،
فرع العثيم مول في الدمام جايب لنا بعارين وحاط جنبها خيمه ومعها عامل قاعد يحمس قهوة، تقول والله انك قاعد في البر مو مجمع.

عندكم بعد

بالمول حاط خيمة لكنها بعيده عن الخرفان .. الخيمة بالدور الاول والخرفان بالدور الارضي ..

**بدر11** · 24-07-2011, 11:42 PM

ههههههههههههههههههههههه

متاكده يالتميميه انك رايحه مول مو سوق الغنم او سوق الابل ؟؟؟

يعني مسوي شي جديد العثيم ؟؟

ياما بنشوف من هالحركات اللي تستهزئ بالناس ...المولات في الرياض كثيره اليوم ابل وغنم وبكره بيطلع لنا مول جديد بحركه جديده بيجيب حمير ( اكرمكم الله ) عشان يوصل الزباين داخل المول ...حركه جديده

**جمرة غضا** · 25-07-2011, 01:27 AM

اقتباس:

المشاركة الأصلية كتبت بواسطة بدر11

ههههههههههههههههههههههه

متاكده يالتميميه انك رايحه مول مو سوق الغنم او سوق الابل ؟؟؟

يعني مسوي شي جديد العثيم ؟؟

ياما بنشوف من هالحركات اللي تستهزئ بالناس ...المولات في الرياض كثيره اليوم ابل وغنم وبكره بيطلع لنا مول جديد بحركه جديده بيجيب حمير ( اكرمكم الله ) عشان يوصل الزباين داخل المول ...حركه جديده

حمير

اي والله رايحه لم العثيم على بالي بسوي شوبنج

يقرفهم على الريحه رديت وجدعت عباتي بالغساله صبغت ريحه الغنم بها