منتجع سياحي عالمي

فتحي حلواني

كل عام وأنتو بخير وصحة وسلامة وسامحوني .. جات متأخرة.

ياسيدي دحين موهما جففوا بحيرة الصرف الصحي طيب وبعدين ؟ ولا بعدين ولا قبلين.. يقولوا والله أعلم إنهم مع بدايه عام 2011 حيسووا فيها منتجع سياحي عالمي زي اللي موجود في بلاد بره وإنه دا المشروع حيكتمل عام 2013 يعني سنتين بالكتيير يكون المشرع جاهز من مجاميعو (وشمس تطلع خبر يبان) وبيقولوا كمان إنه دا المشروع حيسووه في منطقه جبلية فيها حدائق تجنن هدا حسب كلامهم اللي قالوه قبل كم شهر وإنه هدا المنتجع السياحي حيكلف 22 مليار بس للبنية التحتية والله عالم كم حيكلف للبنية الفوقيه .. 22 مليار ياسيدي دا المبلغ ما يسوي بس منتجع عالمي سياحي هدا يسوي مدن بحالها ؟.. ايوه ياستي نحنا ما نتكلم إلا بالمليارات مليار ينطح مليار ويقولوا إنه دا المشروع حيكون على مساحة 120 كيلو متر مربع ويبعد عن مدينة جده بس 25 كيلو وإنه هدا المشروع حيكون فيه 15000 وحده سكنية وفيها كل الخدمات يعني الناس لما حتسكن ما حتشتكي من انقطاع المويه ولا من الكهرباء ولا من طفح المجاري والشوارع حتكون زي المرمر مسفلتة آخر سفلتة ولا حتشوفي مويات المجاري مبهدلة الشوارع زي ماهو حاصل في حي قويزة وفي حي السبيل والعمارية والصحيفة اللي المجاري لها شهور وهيه جالسة تسبح في الشوارع هدا غير الشوارع والأحياء التانية اللي المجاري بهدلتها وبهدلت سكانها، لكن ايش تقولي ما عندك أحد ( مغني جنب أصنج ) ما علينا، نرجع لمشروعنا وقالوا كمان إنه من ضمن هدا المنتجع السياحي العالمي حيكون فيه مجمع تكنيلوجي على مستوى عالمي وحيكون فيه كمان جلسات ترفيهية وحدائق خضراء بمساحات كبيرة وحيكون فيها بحيرات تجنن اللي حيتفرج عليها من جمالها وروعة تصميمها غير الغابات الطبيعية اللي تسر الناظرين وحيكون في كمان مباني تعليمية جديده وملاعب جولف عالمية ومراكز للرياضات المائية ومنتجعات وفنادق على مستوى عالمي وإنه دا المشروع حيوفر 20 ألف وظيفة ( والله عالم وظايف لنا والا لغيرنا ) وبيقولوا كمان إنه الشوارع المطلة على القنوات والشلالات المائية حتكون مليانة بالمقاهي والمطاعم ومراكز التسوق هدا غير إنه متوقعين إنه يزور المشروع خلال 3 سنوات مليون زائر وحيوصل العدد إلى 3 ملايين خلال 20 سنة هدا غير إنه حيكون في مشروع إسكان جامعي يكفي لـ 3000 طالب..
وأنا أقولهم في مشاريع في جدة لها سنيين ولسه ما خلصت حيخلص دا المشروع العملاق خلال سنتين ياريتهم أخدوا الـ 22 مليار اللي قالوا عليها وشافوا جدة اللي صارت تمشي على (الجنط) كيف صار حالها من كتر الحفر والمطبات اللي فيها حتى إنه من كتر الحفر صار عندنا حفر طبيعية لملاعب الجولف واللي بنيتها التحتية صارت أخس وألعن من بنيتها الفوقية.. ياريت أصحاب المشروع دا يفهمونا على قد عقولنا وبلاشي من الكلام، لانه الكلام ماعليه جمرك. نبغى شي تشوفوا العين نبغى مشاريع واقعية يشوفها سكان جدا ويتكلموا عنها عشان نعرف ونتأكد إنه هادي المليارات اللي بيقولوا عليها انصرف كل قرش فيها في محله الصحيح، وما تكون الحكاية كلام في كلام وأمسك لي واقطع لك.. وعيشوا كتيييير تشوفوا كتيييير.

مثل حجازي: مين شايفك يللي في الظلام تغمز.

http://www.okaz.com.sa/new/Issues/20...1203386173.htm

المشاركة الأصلية كتبت بواسطة abuhisham

مثل حجازي: مين شايفك يللي في الظلام تغمز.

التغميز صار في النهار وما أحد يشوفهم