تقول :
السلام عليكم
فقط حبيت اعلق على كلام الاخ الدمام و V2
كلامكم منطقي لكن اظن انكم اغفلتم نقطة مهمة برايي وهي
هل تقعد في بيتكم كعاطل تبحث عن وظيفة ؟
او
تمسك وظيفة ب 1500 ريال وتواصل البحث عن وظيفة ترى انها تليق بمؤهلك وشهاداتك؟
الخيار الثاني برايي هو الصحيح
ولهذا ان وجدت على سبيل المثال وظيفة براتب 2000 فانا لا اعتقد ان هذا ظلم او عيب لان البديل هو
صفر ريال في الشهر وعطالة وعدم اكتساب خبرة
صحيح نحن نرغب بان ترتفع الرواتب وان تجبر الحكومة القطاع الخاص على رفع الحد الادنى من
الاجور ( خصوصا وان التجار هنا لا يدفعون ضرائب ) لكن هذا كله في زاوية , والمتوفر في
زاوية

فأقول :
اولا عليكم السلام
ثانيا انت تقول توظف بـ 1500 طيب
انا توظفت بـ 1500 ريال يوميا 25 ريال عشان الليموزين لمده شهر
25 * 30 = 750ريال الناتج اضربه في 2 فترتين دوام صباحيه ومسائيه
750 * 2 = 1500 ريال سعودي

هذا الراتب راح بس على ليموزين

طبعا بما ان هذا ردك يعني المفروض مايكون عندي جوال ولا بيجر حتى عشان مبدأ التوفير ..

انا عمري 26 سنه
تخيل للحظه بس ان هذا راتبي وانا خاطب او اريد ان اخطب ؟؟
تخيل للحظه بس ان هذا راتبي وانا متزوج ؟؟
صاعقه صح <<ان قلت لا فأنت تغالط نفسك ..
لاحظ اني مامعي جوال ولا افصل ثياب ولا اشتري شماغ وملابس داخليه عشان الدوام كل هذا عشان أوفر واقول راتب 1500 يكفيني ..

ثانيا ياعزيزي القطاع الخاص يبي واحد يقول ياعمي سم ابشر على راسي من عيوني ولايهمك لو تخرب مالطا
السعودي مايقدر يقول ياعمي عشان كذا هو غير مرغوب فيه
ثالث شي انا ذكرت لك قصة أخوي المسكين ووش صار معاه بعد كل هالتعب والكرف قالوا له مع
السلامه نشوفك على خير
هذا بالنسبه للشركات الخاصه ..

طيب بالنسبه للوظايف المهنيه سباك نجار و و و و الخ
اعتقد ردي واضح فيها فوق وهو ان السعودي مايعرف لأنه ماتعلمها اصلا ..
لكن معالي الدكتور غافي القصيبي يقول اللي يطلعه الحلاق بالشهر اكثر من راتب وكيل وزاره
طيب شغل عيالك حلاقين بس عطهم دورات تعليميه مع مكافئات للترغيب زي المكافئات اللي في
الجامعات والكليات
بكل صدق اجلس عند اهلي استر لي من هالوظيفه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــ
تقول :
الكرم والضيافة موجودة في العالم كله وليست حكرا علينا , والجود من الموجود , ولو اتاك ضيف
وذبحت له خروف بدلا من الدجاجة فهذا ليس كرما بل اسراف ومباهاة وتقليد للاثرياء

فأقول :
معاك حق ولكن الكرم والضيافه تختلف من بلد لبلد يعني في بلدان اذا جاهم ضيف يجيبون له فروجه من اقرب مطعم بـ 10 ريال وبلدان تعرف حق الضيف تذبح له شي يليق فيه وفي مقامه بتقول هذا اسراف هاذي وجهة نظرك انا اشوفها كرم ورجوله وهذا اللي تعودنا عليه من الله خلقنا
والجود من الموجود هذا ياخوي كلام مثالي خلك واقعي افضل ولو جاك ضيف اتحداك تعشيه بخاري
بـ10 ريال ..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ

تقول :
معلم الشاورما افضل من العاطل يا اخي واجدادنا كانوا يزرعوا ويفلحوا ومنهم الجزار والفوال وحامل
الامتعة في الموانئ والنجار والخ
هذه مو عاداتنا وتقاليدنا هذه ممكن تكون عادات وتقاليد طفرة البترول

فأقول :
طيب علمني كيف اسوي شورما واقلب لي مجتمعنا فكريا وخله يتقبل يزوج البنات لمعلمين الشورما وخل البنوك تعطيني قرووض وانا اول واحد بيشتغل معلم شورما

أجدادنا لما كانوا يشتغلوا مثل هالشغل كان الجميع راضي فيهم لأن اصلا مافي غير هالشغل
لكن انك تشوف شخص من جنسيه ثانيه عربي ولا اي شي موظف بوظيفه انت احق منه فيها وراتبه انت يا ابن البلد ماتحلم فيه فهاذي طامه كبرى ..

والمصيبه نعرفهم عز المعرفه اغلبهم يكره هذا البلد كره العمى ويستخفون في بكل شي ولايعجبهم فيه اي
شي لاثقافتنا ولا كلامنا ولاحتى اغانينا ولاقصائدنا ولا اكلنا ولا ولا ولا شي
بالعربي يشوفون السعودي ثوب مليان فلوس فقط يعني انسان فارغ ...

أخيرا

فكونا من المثاليه ويقول الشاعر الصنعاني :
لايعرف الشوق إلا من يكابده 00 ولا الصبابة الى من يعانـــــيها
لا يسهر اليل الى من بـــه الم 00 لاتحرق النار إلا رجل واطـيها

فأقول :
لايعرف الفقر الا من يكــــابده 00ولا البطـــالة الا من يعــــــانيها
لايسهر الليل إلأ من بــــــه إلم 00 لاتحرق النار الا رجل واطيها


حسبنا الله وكفى