جرت العاده انه لين تبغا سياره بتشوف موديلها القديم و وضعه و سمعته .. لو غير كذا كان لقيت الجاجور و الميني كوبر و التاون كار و الإنفنتي بكل شارع لو كان هذا هو المقياس للشراء التقنيه و القوه و الفخامه فقط لعامة الشعب

و موديلات الألتيما السابقه تقول غير كذا .. مشكلة الكهرباء و الضفيره .. العزم اللى يضعف كل سنة .. العكوس و المقصات و الرمان اللى يضرب أسرع من أى سيارة ثانيه كانت متواجده بالموديلات السابقه ( من 2006 إلى 2008 ) غير سعرها الغالى بالشراء و المتدنى بالبيع و أسعار قطع غيارها اللى قريبه من الإنفنتي و البي إم دبليو و ملاك النيسان يشهدون

نعم استخدمتها - و لم امتلكها - و كل موديلاتها من 90 لين ال 2008 و حضرت مشاكل كثير لها بالصيانه و هى ما كملت ال 3 شهور بالبلد و سعرها غالى ما تستحقه

انت تتكلم بلغة TOP GEAR مقايس و إختبارات ... طيب على كذا الميني كوبر طلعت كريسيدا و إحنا مانعرف >> حسب المقاييس و الإختبارات

ياخى خلى التجارب لأهلها .. خلنا بتجاربنا السعوديه :

- شف بأى إشاره كم ألتيما واقفه مقارنه بعدد الأكورد و الكامرى و الجراند ماركيز و الفكتوريا
- شف سعر الألتيما بالحراج مقارنه بأى سياره جديده من أى شركه >> سوزوكي خارج الموضوع
- شف حال صيانة نيسان مع الموديلات الجديده بعد شهر من الآن >>> صيانة المشاكل ماهو صيانة 1,000 كيلو

الاربعاء الماضي كنت بخط الملك و حضرت مطارحه بين ألتيما 2010 و سيات ليون 2009 ,, اول مطارحه فازت الألتيما بفارق نص سياره و ثانيها جنب بعض و الثالثه الليون ردت الألتيما سياره كامله وراها و هاذي مشكلة أزليه بمواطير النيسان إنها تسخن بكل قومه - عكس تقنية الفيتيك و الدوش بالهوندا اللى مع كل قومه عزمها يزيد .. الكلام هذا معروف و عندك راعين المطارحات يشرحو لك أكثر بالمسائل هاذي

ايه نيسان عملت شكل جديد و تقنيه ووو .. طيب هونداي عملت السيراتو و الأكسنت و التوسكان بنفس الأفكار .. باقي بس تقلب الكراسي جلد و أنتهينا وفرق السعر ما يقل عن 30,000 و الصيانه 8/10 و قطع الغيار أرخص 40% من نيسان .. طيب إيش اللى يحدنى على الألتيما ؟ العشق ؟ أستأجرها أسبوع و أخلص

على سعر الألتيما أطلع لكزس أصرف .. أقلها المقاعد فيها مكيف و صيانتها 10/10 و سعرها بعد ثلاث سنين ما ينزل لأقل من الثلث - بعكس نيسان اللى سعرها ينزل الثلث بعد سنة ولاتنسى إن 100,000 ك باللكزس يعنى جديده

كلامى ما اقصدك به كشخص .. انا اتكلم عن تجربه مثلي مثل الجميع هنا
أظنك عاشق للنيسان .. مثل أصدقائي اللى عايش معهم مسلسل مكسيكي ماله نهايه: بكل مشكله أقول لهم شوفو ,, أتعظو يردون .. عادى عادي على الضمان >> تصريفه .. ادق عليهم الظهر ألقاهم بالصناعيه يدورون قطع

و كل يومين واحد متصل علي من فجر الله تعال وصلنا الدوام تعال وصلنا الشركه ,, شوي و أشتغل عندهم براتب

و بعد خسارة للوقت و للفلوس >> هذا للضعوف اللى ما يحب المشاكل و يصدق الصيانه النصابه حقت نيسان و يدفع ... يرجعون لى و يقولون و الله كلامك صح السياره هاذي فقرتنا ! وينك من باكر و بكم حتبيع ؟ 23,000


عموماً .. لاتاخذ كلامى بصفه شخصيه و كل واحد عقله براسه يعرف خلاصه .. اهم شئ لا أحد ملكها و جا يشغل السياره بعز القايله و ما اشتغلت لا يذكر كلام فيه تمجيد للسياره من أحد فينا علشان لأجل الدعاء اللى راح يصيبه