اشكرك جميعاً, البعض منكم يبغى التوظيح اليك القصه كاملة
قبل 8 سنوات كان لي صديق وتاجر المهم الرجال نسافر ونجي مع بعض طبعاً دور البطالة هي الي حدتني اماشي ناس مثل هذا النوع من البشر ولكن اوهمني بانه راح يوضفني وصبرت عليه سنين تقريباً سنتين . الرجال عنده شركات لموزين وعنده خير وكل سنه يطلع سيارة اخر موديل لا تقل قيمتها عن 200 الف ( الله يرزقنا واياه) ولكن الرجال اوهمني انه راح يوظفني عنده لفترة بسيطه وبعدين راح يعطيني وضيفه بمستوى عالي . قالي مبدئاً راح اعطيك 1800 ريال في الشهر قلت تم . بعدها خفت الروحات و الجيات معاه رحت له في المكتب وبعد السلام و الكلام قلت وش صار على الوظيفه قال لي والله يا..... محصل نصيب وشلت فكرة الوظيفه بس انت اصبر علينا ويصير خير . قلت تم , كنت مغفل لاني اثق فيه .
بعدها تعرفت على ناس تجار بالحيل وعلى مستوى روحات وجيات معاهم تعرفت على اهاليهم احترموني وقدروني كثير حتى اني صرت من العائله مو نقص في عائلتي او عوائلكم . العائله هذي قررت تسفر اعيالهم برا يدرسون و ابوهم سفرني معاهم طبعاً بعثات على حيات الملك فهد (الله يرحمه ويرحم المسلمين اجمعين) سافرنا وقعدنا سنه ونصف .
رجعنا للرياض وتزوجوا ومسكوا اشغال ابوهم طبعاً الصداقة من هنا راح تتغير وتخف . قمت ادور على وضيفه ومن مكتب لشركة . تعبت وفريت يمين ويسار مسكت معاي ساندوتش كبدة في الشميسي ورحت وادخل البوفيه وافطر وعين من الله خير جنب البوفيه مؤسسة صرافه دخلت على مديرهم ولقيته قاعد يدخن اقول في نفسي والله ما عندك احد بس اخر شي طلع زكرت وفله قلت ما عندكم وظائف من يوم قال ابشر وانا الي ارفع التلفون الثابت حق المؤسسة و اتصل على الاهل وابلغهم اني لقيت وظيفه وطلبت من امي تدعيله (المدير) واحط السبيكر وتقوم الوالدة وتدعي المهم المدير اجتهد ووضفني صراف وراتب 3000 ريال مكافأة تحت التدريب طبعاً المؤسسة ما سجلت اسمي في مكتب العمل للحين وبعد فترة جاني مدير قسم في احدى الشركات الحكومية المشتركة يغير عمله وعطاني كرته قال كلمني ظروري قلت خير انشاء الله بعد فترة كلمت الرجال ورحب فيني وقال جب اوراقك . اخذت موعد معاه و ديت اوراقي قال وانا ابكلمك قلت خير انشاء الله بعد يومين كلمني وقال انت وين تشتغل قلت في مؤسسة الصرافه قال لا انت تشتغل عند شخص اسمه فلاف بن فلان .... قلت هذا صديق لي من زمان . تلخبطت الاوراق عندي , الرجال قال تعال وقع عقدك وخلال ايام راح تستلم وضيفتك رحت لعملي الاول (الصرافه) وقدمت استقالتي وبديت اشتغل مدير مكتب لمدير منطقة و الراتب ممتاز بالنسبة لمؤهلاتي . الشركة الجديدة الي اشتغلت فيها عطوني اجازة لمدة اسبوع من عند مديري علشان اروح و اجيب خطاب من مؤسسة فلان بن فلان علشان يشيل اسمي من مكتب العمل قابلته طبعاً وشوفت النفس واصله في اعلى خشمه قلت عطني خطاب مخالصه علشان اشيل اسمعي من مكتب العمل . في هذه اللحظة درا اني ما ابي منه شي قام يماطل فيني ... الختم ضايع و ..... وعدني بعد اسبوع انه يشيله قعد شهر يالله شاله . رجعت بعد ما نتهت اجازتي وبلغتهم وش صار معاي المهم سجلوني عنده بعد ما زور فلان بن فلان استقالتي . قررت بعد هذي اللحظات اني اطالب بحقوقي واشغال اسمي .

فلان بن فلان زور و استغل اسم مواطن وهذا الشي الي ما راح احد يرضاه لنفسه .
انا الي ابيه الحين حقي من استخدامه اسمي لمدة 8 سنوات من يعوضها لي ؟ مكتب العمل قال اذا انت بتوكل محامي راح يطلعها لك . قلت وانت قال احنا قاعدتنا لا اجر بدون عمل !

طبعاً لو مكتب العمل شركة كنت لقيت خير ولكن مكتب العمل يدور الي هو يستفيد فيه لنفسه . ولكن حسبنا الله ونعم الوكيل على نضام العمل و العمال.

وظيفتي الحين ما تمسحلي اتابعها .
و الان ابي رايكم ولي راح يتكفل راح اعطيه اتعابه .