المقاطعة في خطر
بسم الله الرحمن الرحيم
بعد صلاة الجمعة كانت نفسي منشرحه و قلت في نفسي خلني اسوي فيها ذيبان و اطلع للسوبرماركتات :d و اسوي مقارنه بين اسعارهم لأني أعرف انهم بياعين مفرد و يسعون لأكبر ربح في الحبه الواحده هذه المغامرة اللي بطلها انا انتهت من اول حلقة و للأسف من عند أول سبرماركت ولكن ابي اسوي فيها فلم هندي و ارجع البطل بعدما مات و أوري الاشرار شغلهم تراها والله شغله انك تروح و تطلع ورقة و قلم بنص الناس و تبدأ تسجل و كلهم يناظرون فيك و شوي تنبطح على الارض علشان تشوف السعر يعني اقلها بقولون عنك "وش يبي ذا" و "مسوي زحمة و على باله اقتصادي" و "وش ذا القعيطي اعوذ بالله" و "شكله مطفر" وبعدين يا أخي بتحس ان فيه ناس يناظرونك من بعييييد و كل اشوي يوقف شعر راسك و تناظر وراك مع هذا كله انا كنت مقوي وجهي و ماعلي من اكبر شنب فيهم الين ما تم القبض علي بالجرم المشهود من قبل مشرف السوق و تعال دورني الوجه صار اشارة مرور كل اشوي لون و لا ادري اتكلم و لا آخذ نفس و اول شي خطر على بالي اني ازبن ، (تعريف الزبنه: هي حركه خطافيه اسرع من الضوء بحيث تعض على شليل ثوبك و تمسك زبيرياتك بأدينك و تصل بيت اهلك في اقل من 5 ثواني) ولكن تذكرت اني انا المستهلك و المظلوم و أن لي الحق اني اقارن بين الأسعار و أشتري بكيفي من المكان اللي يعجبني و على هذا الأساس رديت على اسألته بقوه و بثقه و قلبت الطاوله كلها عليه وقلت له ليه مالي حق اني اقارن بين الاسعار؟ و قال إلا لك الحق إذا كنت زبون و ليس شركة و طلعت له اللي يثبت اني زبون و هو تصريح دخول مجمع الشركة و وريته الختم و اسمي و ذكر لي ان الشركات ممنوعه من دخول الاسواق المنافسه و التجسس على الاسعار بيت القصيد هنا و اللي ممكن أن يؤدي إلا إنهاء هذه المقاطعة هو أننا بطريقه غير مباشره ننشر اسعار بعض الأسواق مما قد يخدم الأسواق الأخرى مع وجود قانون يمنع هذا الشيء يعني المقاطعة تعارضت مع قانون موجود و أنا الحقيقة ما أدري عن هذا النظام و هل يوجد بند ينص على هذا الشيء و لا لأ ولكن اللي أعرفه و متأكد منه اننا معشر المتسوقين لنا الحق الكامل في المقارنه بين الأسواق و الشراء من المكان اللي يعجبنا و هذا هو الحال في جميع الأسوق في البلدان الأخرى وسلامتكم |
ولكن اللي أعرفه و متأكد منه
اننا معشر المتسوقين لنا الحق الكامل في المقارنه بين الأسواق و الشراء من المكان اللي يعجبنا و هذا هو الحال في جميع الأسوق في البلدان الأخرى صح الله لسانك |
والله ياليت تبدأ رحلة المنافسه بين الشركات في تخفيض الاسعار
ولكن اللي نشوفه انها تسير بالعكس يعني اشوف شركه سعرها ريال تقوم شركة ثانيه ترفع نص ريال وش بلاهم الناس ذولا ثانيا من حقي كزبون ومن حقي كمواطن ان اعرف كل ما يدور الوطن ليس ملك للشركات حتى تتحكم فينا على هواها ثانيا نحن الزبائن او المستهليكن المصدر الحقيقي لربح الشركات والا يصرفون بضاعتهم في الخارج ونحن المواطنين نشوف لنا شركات اخرى التجاره نايمه فدعوها تغط بنومها |
بصراحه حركة منك راااائعه
وماعليك المقاطعة سوف تحقق هدفها واكل العنب حبه حبه وشكرا لك |
اخوي بارك الله فيك والبرشورات التي توزع مع الجرائد وجرائد الدعائيه (الوسيله والمبوبة والوسيط ) مافيها اسعار فكل شئ واضح لكن المشرف كان يبي يسوي فيها فاهم .
|
ماعليك من احد قارن واكتب كلها يومين وبتمتلي جيوبنا اوراق فيها اسعار
وكل الشعب بيستخدم هذي الطريقه وهدفنا من نشر الاسعار اساسا هو رفع شركات على حساب شركات حتى تضتطر المرتفعه انت تخفض سعرها والمنخفضه ان تتمسك بسعرها وارجع واقول لن ننجح سوى بالمقاطعه |
| الساعة الآن 08:34 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by