رايكم لا عدمناكم بشركة النصب الاتصالات
 

السلام عليكم ورحمة الله وبركاتة

مشكلتي اني عميل للاتصالات مدى 6 سنوات ولا عمري طليت بالفاتورة ماهوثقة فيهم بس دلاخة اللي عندي اسدد عمياني وانا متاكدة انه ماهو مبلغ استهلاكي ومن فترة اكتشفت انهم يحطون لي امور ماطلبتها ولا استخدمتها مثل الرسايل التفاعلية او رسايل ابواب الخدمة التافههة وقنواتها السخيفة لو يقال لي ببلاش ما خذتها وجوال نت وانا جوالي ما هو جيل ثالث ولا شي وعمري ما دخلت نت منه عندي dsl ويمر ايام مافتحتة
والرسايل التبادلية حقت التلفزيون ماعمري ارسلت له وكل خدمة حاطين لي بالفاتورة مبلغ وقدرة اتصلت على 902 واعترضت ومن واحد لواحد مع النفوس الشينة كني ماخذة من جيوبهم شي قالوا اثبت لنا انك مستخدمتها ومشتركة في ابواب طيب ياولد الحلال لو مشتركة وين الرسايل حقت الخدمة ولا بس تحسبون فلوس واشتراكات
وماعطوني عقاد نافع الصراحة حسيت انهم اغبنوني وظلموني وكرهت الجوال
وفي نفس الوقت ابغى رقمي لان الكل يعرفني علية وفي كل تعاملاتي في العمل والبنك والمستشفى ودي تنتهي هل المشكلة ومايحسبون علي شي ما طلبته لانه حرام عليهم وايضا من باب امسك مجنونك لا يجيك اجن منه اقصد موبايلي وزين اكيد بعد مايقصرون
لهم حركاتهم
هاه وشرايكم ياجماعة الخير

حياك المتفائلة
شوفي بكل صراحة "مابالفار فار طاهر" لكن اوقات شركة اخف من شركة ..
اي فيه شركة تصحح اخطائها وشركة تستمر على سياستها ونهبها !
اختي انت مخيرة
اما تستمرين معهم وتحملي مايجيك ..
يعني راح تلقين الرسائل التبادلية وتلقين خدمات ضايفينها بدون طلبك
او انقلي لشركة اخرى وبامكانك نقل رقمك معاك لكن راح ياخذ وقت ويماطلون بك شويتن ..

هوا بامكانك نقل رقمك معاكي
وانا تجربتي معاهم بالمرة مرة ماطلو بيا كتير على نقل الرقم وبالاخر تركت الرقم ليهم

الموضوع بسيط للجميع

راس ماله خط جوال
انا غيرت رقمي وبرساله للجميع وصل رقمي للكل في ثواني

والنت تركته من كم شهر لمشغل ثاني بلافاتوره والحمد لله مرتاح جدا

الظاهر سحر شركه الاتصالات قوي علينا:D

يعطيكم العافية اخواني على الرد
انتو قلتوها مشغل ثاني يبي لها حوسة وروحه وجيه وماطلة ولنا ماحولك احد
انا ابي يخافون الله فيني ويعطوني حقي حرام الراتب يروح كله سداد فواتير

افصلي كل خدماتك + سددي فواتيرك + و خلي الاعتراض رسمي ,, كل ما سبق تعمليه بزياره وحده للفرع الرئيسي و أهم شئ خليكي واعيه لا تخرجي الا و انتى عارفه اللى لكي و الى عليكي و بالمستندات .

شوفي لك مشغل ثاني و طلعي منه شريحه شحن .. و جوال صيني من اللى يدعم شريحتين ( صار برخص التراب ) و استخدمي الشريحتين .. حق الانفصلات استقبال و الثانيه مكالمات و استقبال

اذا لقيتي الخدمه زينه حوليه لمفوتر و منها انه كل اللى يعرفوكي وصلهم الرقم ,, ماهو بذاك المستوى طلعي شريحه ثانيه من مشغل ثاني و جربي خدمتهم ,, طبعاً لا تنسين تركزي على الباقات و تختارى الانسب لكي .

اذا بغيتي تنقلي رقمك : تسددي ولا تستخدمي الجوال الا لاستقبال المكالمات و طبعا تروحي لمقدم الخدمه الثاني و تسجلي معاهم ,, بظرف ثلاث ايام يكون رقمك اتنقل .

و مساءله الكل يعرف رقمك مالها قيمه مقابل الالاف اللى بتصرفيها على حراميه جحلط و اصلاً ايش نهاية رقمك ... محفوظ بذاكرة الجهاز و اللى مخزن اسمك ما يقرا الرقم .. بيقرا اسمك .... خلك واعيه

يعطيك العافية اخوي على الرد
قلت لهم افصلوا الخدمة قالوا انتي اشتركتي في القنوات الغي من عندك
الغي شي ماادري عنه وشقول بس؟؟؟ اخواني حرام اترك رقمي لانه مميز وشريتة بمبلغ وقدرة
والتحويل بنفس الرقم عند موبيلي مايمدحونه يقولون مماطلة ويمكن يرفض الطلب
وانا حاسة خدمة نفس الرقم هذي للاتصالات حصه من فواتير الارقام لان صعب الاتصالات تستغني عن
عميل بكل سهوله اكيد لها نسبه ثابته تحسب علينا المحولين ولا شرايكم!!!

ما ذكرت لك أكثر من طريقه تريحي نفسك بيها ؟ سويتي منها شئ ولا قاعده تدورى عندنا حلول ؟

يا بنت الحلال حقك ضايع مع شركة الفقر هاذي .. ماتسمعي ما تقرئ ما عندك ناس
هياط السروقيه STC ما ينتهي :D ... لازم تروحي بنفسك لأى فرع رئيسي و خذي معكي رجل من العيله و فاهم كل الموضوع ... غير كذا بياكلوكي أكثر

موبايلي ولا غيرها حقك ضايع بس على الأقل فيه حراميه يستحو >> STC ماهو منهم:zy:

اذا بغيتي النقل لموبايلي روحي للفرع النسائي و خذي العلم منهم هم و أتركي عنك كلام جلسة الكيك و دلة القهوه :D

و علمينا وش " صـــــــار معك " >>> يعنى تحركي و أنفعي نفسك :thumbsup:

يسلمواااااااااااااا

ولاكن اختي الكريمة

الاتصالات السعودية هي الشركة الاولى

والتي لها باع في خدمات الهاتف والنت

وقدمت ومازالت تقدم عروض وخدمات جديده وحصرية ومخفضة

على مستوى جميع الشركات وهذا يحتسب لشركة الاتصالات

نتمنى لها المزيد من التقدم والرقي والتطور