لقيت كيك معفن من لوزين بتاريخ صلاحيه غير منتهيه وش اسوي
 

السلام عليكم
اتمنى افادتي

امس الاثنين 21/10 /1432هـ الساعه 11 ظهرا شريت من بلشرف الي بطريق الملك فهد
كرتون صغير (أصابع كيك لوزين شوكولاته )
تاريخ انتاجه 25/9/1432هـ وينتهي في 1/11/1432هـ

فتحت وحده منها واكلت قطعه صغيره بس حسيت ان طعمها سيئ جدا بعدين اكتشفت ان عليها عفن

اتصلت مباشره بـ 940 قالو بنرسل لك مندوب انتظرت لاكن للاسف مااتصل علي احد بعدها اتصلت عليهم المغرب وقالي جاري التعامل مع بلاغك واذا مر على بلاغك 24 ساعه اتصل علينا مره ثانيه

المهم اليوم اتصلت عليهم وقال برضه انه جاري التعامل مع البلاغ

تقريبا الساعه 10 الصباح ارسلو رساله انه تم تنفيذ طلبي الخاص بـ مواد غذائية فاسدة مع اني ماقابلت احد ولا اتصل علي احد رجعت واتصلت عليهم وقالي ان الادارة المسئوله عنه هي المعني بهذي الاجابه فأخذت رقم الاداره الي هي على مااعتقد صحة البيئه اتصلت عليهم وقالي خلاص بنتصل عليك

بيني وبينكم اصبت باحباط

رحت لبلشرف وبلغتهم بالموضوع على اساس انهم يشيلون الكميات لايجي احد من الاطفال ويشتري وياكلها وهو مايدري فقالو لي هذي مسئوليه المصنع

اتصلت على حماية المستهلك بوزارة التجاره فقالو هذا من اختصاص البلدية


في الاخير اتصلت على نفس الشركه الي هي احدى مجموعة المراعي وسئلت هل عندهم ادارة للجوده او ادارة قانونية مسئوله عن مثل هالمصايب

فقالو انهم بياخذون مني العينه ويفحصونها ويحددون هل الخطأ من المصنع او من التخزين في نفس الهايبر او النقل

انا صورت المنتج وشهدت تقريبا 5 من زملائي في العمل


فكرت انزل المقطع في اليوتيوب او هنا علشان الناس تحذر

وتكون رادع


سؤالي في مثل هذي الحاله وش اسوي

بيني وبينك انت مخالف للمقاطعة وكنت بقول جزاك ماجاك لكن لما عرفت انك اشتكيتهم ماقصرت وقليل اللي يسوون ربع اللي سويته وهذا دليل اخر على صحة المقاطعة وسوء كيل شركة المراعي

ايش تتوقع من لوزين؟؟؟؟؟؟؟

هلا اخوي بويكت ماعندي اي فكره عن المقاطعه

بس ايام مارفعو اسعار الألبان ماشريت منهم لحد مارجعت الاسعار مثل ماهي

سؤالي المكرر وش اسوي في هالحاله

انزل المقطع مع الفاتوره

هل لهذه الدرجه الموضوع مهمل من قبل الجهات المسئوله

المفروض من اول ما بلغت تكون نزلت المقطع .. و مع التبليغ تخبرهم إنك راح تنشره في النت و المنتديات عشان يتحركوا بسرعة.

على العموم .. إذا المقطع عندك جاهز أنشره في اليوتوب و عليه التاريخ و مكان الشراء عشان الناس تنتبه.

اتصلو علي الشركه وارسل مندوب بيجيني بعد شوي

يقول بياخذ العينه لتحليلها

تفاعلهم اسرع من البلدية

للاسف الشديد

جاني مندوب الشركة ووريته الكيك وسجل البيانات وطلب مني ياخذ الكرتون ورفضت


لاني قلت له اني قدمت بلاغ للبلدية وخااااااف يجوني بعد سنه ونص وتصير العينه ماهي عندي

ويسجلون علي اني مقدم بلاغ كاذب


والله اني اصبت باحباط معقوله هذا الاهمال من الجهه المسئوله

اتمنى ان المسئول يتخيل ان ابنه او بنته هي الزبون الي بعدي واخذت من نفس البضاعه واكلت منها وش بيقون موقفه

تصرف الشركة من واقع تجربتي سليم 100%
لا بد أن تأخذ الشركة عينة للفحص ( يعني لا تعطيهم الكرتون كاملا بل قطعة أو إثنتين واضح فيها العفن ) لسبب بسيط لكي يفحص قسم الجودة في الشركة العينة من الألف للياء لتحديد سبب العفن قبل إنتهاء فترة الصلاحية و من ثم يردون عليك ( هذا إجراء قانوني سليم من الشركة مع حرصك على أخذ محضر ضبط عينة من المندوب لكي يثبت الحاله لتقديم شكوى و إجبارهم على الرد ) .
أما موقف حماية المستهلك ليس بجديد ( ما لها علاقه بأي شيء )
أما الأمانة فموقفهم مستغرب و المفروض تظبط الكمية و تحرر مخالفة على المحل و غرامة ).

لوزين احدى شركات المراعي لذلك توقع منهم اي شيء

اجزم ياجماعة الخير لو يوصل الخبر لامين مدينة الرياض العياف

والله ان يتغير الموضوع 180 درجه

اكثر من موقف صار لي وللوالد ولاحد من زملائي

وكان الامين يعالجه بسرررعه فائقه

قبل سنتين تقريبا جت شركه اسمها الجناحين وحفرت حفره قدام بيتي لمد كيبل للارض المجاوره لي جيت من الدوام وهم خالصين
طبعا الحفر كان بالطريقه الحديثه الي هي عرض الحفره تقريبا 15 سم على ماا اعتقد ومدو الكيبل بعدين ازالو الاسفلت بعرض تقريبا متر وقالو بكره ان شاء الله بيجون للسفلته

المهم بكره هذا صار سنه تقريبا اثناءها رحت للبلديه 4 مرات ويطلعون يصورون الموقع فقط بعدين اتصلت على 940 وبلغتهم وبرضه نفسسس الحكايه يتصل علي واحد ويقول حدد المكان مع انهم هم اليييييي مسمين الشوااارع ومرقمين البيوت

ولااا لقيت اي فااايده جلست تقريبا سنه ونص على هالحال

بعدها قالي واحد ارسل فاكس لمكتب الامين

كتبت استدعاء وارسلته للامين

قسم بالله ان الشركه متصله علي يقولون احتمال ماهي شركتنا قلت انا متأكد ومارجعت من الدوام الا وهم مسفلتينها بعد اسبوع اتصلو علي مكتب الامين ياخذون من البيانات قلت علشان ايش قال علشان البلاغ قلت جزاكم الله خير هيبة الامين خلصت لي الموضوع

ماصاااار شي

الحمد لله المراعي وأخواتها بعيدين عني
والله يجزي الشركات الوطنية التي وقفت بحزم أمام طمع المراعي ولم تنساق في رفعهم اسعار منتجاتهم بالمثل خير الجزاء

يقولون ان المراعي تغير تاريخ الصلاحيه لان بضاعتهم قاعده ومتورطين فيها
الكلام هذا من محاسب باحد الاسواق القريبه من سكني ويحذرني وحرصني انشر هذا الكلام
وبالنسبه للبلديه والتجاره ماراح تسوي لنا شي

فعليكم بالمقاطعه وتشجيع الناس على المقاطعه

وعليكم السلام

اما الشركة فلن تحصل منها الا على كرتون بديل !!!!!!

مررت بتجربة مماثلة لك تماما ( قبل المقاطعة !!!! )

هنا تجربتي




وهنا


اما البلدية فعسى ان تجد لديهم حلا

لكن وسع صدرك

انا انتظرت كثيرا مع الشركة فمن باب اولى ننتظر مع البلدية

تمنياتي لك بالنجاح في مجهودك وتحقيق ما لم استطع انا فعله

تكرار هذا الامر دليل على جودة المنتج والاهتمام الحقيقي بالعميل !!!:mad:

والحل الحقيقي هو المقاطعة ولا غير المقاطعة

بس تبي الجد بصراحه المراعي وهي متيقنه انها لن تحاسب تواصلت معي على الاقل حسبت حساب للمستهلك

و البلدية نايمة في العسل

نعم سيتواصلون

وسيعطوك ما يسمونه هدية وهوقيمة ما اشتريت من بضاعة فاسدة

لكن البضاعة التي في المجل لن تحرك

والرد سيكون البضاعة سليمة ومتوافقة مع مواصفاتهم ووو !!

ثم مع السلامة

فما الفائدة !!

ان تواصلوا معك ليتك تشير الى موضوعي معهم وكيف انتهى بلا شيء وبقيت البضاعة في محلها واشتراها المئات وربما اكلها اطفال !!!

وانت كذلك لو تابعت المحل ستجدها كما هي حتى ينتهي تاريخ الصلاحية

يعني امتصاص لردة فعل العميل بلا ثمرة بكل أسف !

وارخص شيء لدينا صحة المسكين انا وانت واطفالنا !!!

لو كنا في الامارات علمتك ايش تسوي وكنت تشوف وش اللي يصير بلا 490 بلا وزاره وبلا بطيخ مصدقين انفسكم انه فيه رقابه ومحاسبه قال 490 هذا الرقم للاستهلاك المحلي علشان يقولون في الاعلام انه عندنا رقابه كل اللي عليك تبلغ ايه هين مساكين مصدقين انفسكم تتصلون عليهم اصلا مجرد انهم عرفوا ان المنتج تابع للمراعي صك القزاز

هذي هدية أخرى من المراعي للزبائن المستمرين معها والذين لم يقاطعوها حتى يعرفون قدرهم عند المراعي مبروك عليكم المراعي

هل جد شي ؟

والله ياجماعة الخير ماااصار شي الى الان

لا البلدية ولا جتني هدية الشركة


بس البلدية ماقصرت ارسلت لي رساله محتواهاااا التااالي ك

امانة منطقة الرياض تدعوكم لحضور الاحتفاء باليوم الوطني في استاد الامير فيصل بن فهد بالملز وتشمل الوان من الفنون والفلكلور الشعبي كالعرضة والعزاوي وعرضة الشمال والمزمار والخبيتي والخطوة وغيرها وكذلك اناشيد وطنية وقصائد وذلك من الساعة 8 مساء اليوم الجمعة الى منتصف الليل علما بان الموقع مخصص للرجال والشباب

بعد الرسالة بصراحه عذرتهم ليه ماتفاعلو معي اثرهم مشغولين كل موظفي الامانه في مناسبتهم

اكيد وش يسوون يالله يقدرون يقومون بالواجب
مراقب بيصب القهوه للضيوف وواحد معه المبخره والثاني يقلط


شكرا يالامانه بصرحه ظنيت فيكم ظن السوء


ان بعض الظن اثم

ههههههههه

الى الان مااااجتني الهدية


متوقع بيعطوني دينا مليانه جبن او عصيرات

ودي ازهم عليهم بس والله مستحي منهم

آآآآخر المستجدات

تم الاتصال من قبل شركة المراعي اليوم الموافق الساعه 6 مساءً

يااااااااااااارب دينّا مليانه كيك وخبز

وبقره لو مريضه مايخالف المهم ااي هديه لي سبع سنين ماجتني هديه واخر هديه جتني عباره عن شنطه بلاستك مااالها داعي من مطبعه

تكفون يامنسوبي المنتدى آزروني في ظل الظروف الراهنه

اقفل المحضر في حينه ووساعته

تم منحي عدد من البساكيت

متنوعه الاصناف والاشكال


العوض ولا القطيعه

قال ايش قاااال اتصل على 940


لو اني متصل على بلدية دبي كان تفاعلت معي اكثر من ربعنا

يا اخت زوزو مدري الاخ زوزو


اذا قاطعتهم وش البديل اذا كانت شركة بحجم المراعي بيصير لها هذا الشي اجل وش بيصير الحال عند اقل مخابزنا امكانيه

انا يكفيني احترامهم لانسانيتي وهذا ابسط شي

المسئولين الي هم مسئولين مسئوليه كامله عن اي خطا ماتفاعلو معي

وهو صميم عملهم ويطلعون من الصبااااح لحد العصر على انهم يراااقبون اي قصور من اي جهه

وفي الاخير مااالقيت منهم ولااا تجاوب

وين البطحي وربعه الي مشخصين بالبالطوات البيض وخذ ياتصوير

والشركه الي قائمه على الربحيه فقط ولاهي مسئوله انها تكون مؤسسة اجتماعية او خيريه

تفاعلت معي واتصلو علي ووصلوني لحد مكاني وقدمو خطاب رسمي يوضحون فيه سبب فساد المنتج بعد فحصه وقدمو لي اعتذار وارسلو مندوب

انا مااابرر لهم هذا الخطأ لكن في ظل الفوضى من الجهات الرقابية

انااا اقول لهم كثر خيرهم

وتبغين الجد انا ماقاطعتهم

لاني اشوفها من انجح الشركات ونجاحهم ماجا من فراغ

استحوذو على كثير من الشراكات

وتنجح بسبب نجاح هالشركه

هذا رايي في هالشركه

وتقييمي للموقف الي صار لي

كان بنظام العوض ولا القطيعه

اشوف محد رد علي لايكون قاطعتوني بعد انا

وين مبدأ الديمقراطية وين مبدأ ( كل واحد ابخص بنفسه) المنبثق من ميثاق جامعة الدول العربية

والذي ينص على أن لكل شخص حر في الخبز الي ياكله سواء بالجبن ولا بالبيض

ولا بتقولون بعد مندّس او عميل للشركه

واقبض نهاية كل شهر خيشة خبز يابس ابيعها لصالحي لاحد مربي الاغنام

بعد ارتفاع اسعار الشعير الى ارقام قياسية

اقووول ترااا ابزعل

والله المستعان