أتفلسفت اليوم وقلت اروح حلقة الغنم بنفسي
عشان اشتري خروف للبيت .....ياليتني ما رحت ......عمالة تتحكم بمصائرنا وارزاقنا وتضع اسعار على كيفها ومتأمرين اقل سعر 1000 ريال ................اقول الله يعين ذوي الدخل المهدود.........ممكن ما ياكل اللحم الا في العيد وبس.
هددتهم بالشرطه والبلديه والتجارة......لكن ماحد حولي:lol: اقول "ارخصوه...........ارخصوه............ارخصوه" |
العيد راح عليه أكثر من أسبوع .... ومارخصت؟
...... الناس لسه في أجازة ==> موسم مناسبات وزواجات ===> الذبائح غالية ....! الحل جرب بعد بداية الدراسة .... بس قبل بداية موسم الحج |
معروف اللي عندنا اذا ارتفع ماينزل هاذي قاعدة تجاريه تختص بها بلادنا عن غيرها |
صاحب الحلال سعوديين لأن صاحب الحلال لا يريد مواجهة أبناء بلده بإرتفاع الاسعار وفضل الوافد ,,,,, مواجهة المواطنيين .... لا يتعرض للإنتقادات وأهم شئ كم سيجني بعد كل بيعة |
ليش تستغرب على هذة الاسعار ترا مالك الاغنام ينفق اموال كثيرة على الاغنام بسبب غلاء الاعلاف ومصاريف العماله ..اتوقع هذا اهم سبب في ارتفاع اسعار المواشي تبعا لارتفاع اسعار الاعلاف والمواد التموينية الاخرى يعني الحل في يد البلدية ضروري تحدد الاسعار حتى يحصل توازن..
|
اول مره اشوف مواطن يشتري خروف الحقيقة اذا شريت خروف يا اخي الكريم الواجب تسوي زفة للخروف في الحارة وهذا يعتبر بطره بالوقت الحالي انك تشتري خروف مره وحده لا وبعد تروح السوق شي كبير اكيد اذا رحت السوق اي واحد شافك ويعرفك بيقول أبو فلان بطران وفلوسه كثير
|
اقتباس:
و تجد الأسواق تبيع الكيلو 40 ريال ؟؟؟ و يحلف إنه نعيمي بلدي ؟؟؟؟ |
اقتباس:
هذه الشماعه اللي سمعتها منهم............الاعلاف تمت اعانتها ورجعت بسعرها العادي............لكن تبقى الشماعه للمبررات. |
اقتباس:
والله يا اخي لا بطر ولاشي..................لكن اخاف من الغش وورطت مرات عديده لأني غشيم ومتعافي:lol: |
اقتباس:
يا اخي يتق الله في رزقه ونعمته ويكتفي بهامش ربح معقول. |
اقتباس:
فعلا وفي كل شئ |
اللهم اننا نعوذبك من الغلا
|
"والله يا اخي لا بطر ولاشي..................لكن اخاف من الغش وورطت مرات عديده لأني غشيم ومتعافي:lol: "
هههههههههههههههههه شوف أخي الكريم ................ هناك شركات مثل نادك و لبون والوطنية لديهم احواش .... السعر عندهم بفاتورة واذا كانت الذبيحة غير صالحة يعطيك المسلخ الرسمي اثبات فتستعيد قيمة الذبيحة أو تأخذ غيرها..... إضافة الى ان الحارس يساعدك في الإختيار ثانيا ... اذا تبي تشتري .. حاول ان تعرف اذا كان البائع جالب للسوق(عادة يكون ماسك سرا في سرا اللي يبون يحرجون على غنمهم أو انه توه جاي وسيارته عادة نظيفه ههههه... وعادة يحاول عمال الأحواش الشراء منه او انه جالبه من الحوش (هج منه ...ههههه ) ... ممكن يساعدك الحمال اللي يبي يشيل لك ويعلمك .. وما تشتري حتى تراقب اللي يشترون وما فيها شىء أسأل أوأستعن بواحد منهم خاصة اللي يعسون و يفتشون(تأكد انه حريف لا يكون عامل نفسه .....هههههههه ..شوف اللي يمسك ظهر الذبيحه وهي على الأرض ماهوب اللي رافعها له البائع ..وكذلك يشوف فمها و يرفع ذيلها ليرى نوع اخراجها و اكلها من بقايا دمنها (اعزكم الله) ويشوف اقدامها ماهي مكسورة و كذلك ما فيها ظروب او جروح و طوالع "خراريج" وتوجدعادة في اليدين و الرجلين و الرقبة او الرأس ونادرا في المؤخره ويفتحون فمها علشان يشوفون عمرها اذا ما فيها أسنان كبيره فهي جذع احسن شىء للثلاجه اذا فيها 2 اسنان كبار بالنص فهو ثني كويس للولائم والأكل 4 أسنان كبيره رباع 6 أسنان كبيره سدس او بدون اسنان . عجوز.هههههههه... كلما كان ظهر الذبيحة طويلا وفي اخره عريضا و شعرها املسا كانت الذبيحة افضل ) ) الذبائح ويتنقلون حتى يشترون من واحد ... والا خذ معاك احد من اللي تعرفهم ويعرفون يشترون .... ولا تنسى ان تأخذ عيالك كي يتعلموا لإنك سوف تعتمد عليهم يوما ما في ذلك .... والا ريح رأسك و اشتري من احد الشركات السابقة ..... والا عليك بالحاشى من أماكن معروفة |
الله يخلي المبرد سواء سواكني أو بربري.
ما كنت مقتنع فيهم لكن الوالد الله يحفظه قال على محلات في جده تبيع ذبايح حقت يومها جاية بالطائرة. و جربت اللحمة في بيته لقيتها أخر حلاوة و الذبيحة صغيرة ما تجي أكثر من 10 كيلو .. عظم الفخذ ما تتعدى سماكته سماكة أصبع اليد الصغير .. و الأهم سعر الذبيحة حول الـ 300. و ترى الوالد عند ماشاء الله عليه من أصحاب الخبرة في الأمر .. أقصد فحص الخرفان الحية .. يعني يعرف يفحص الخروف و يقلبه فوق تحت .. و لمن يروح الحلقة بنفسه يدخل الحوش ويأشر على الخروف أللي يعجبه و يخلي صاحب الحلال يجيبه له لحده و بعدها يبدأ شغله في الفحص و التقليب. |
نسيت شىء مهم شوف الخروف اللي "يعافر " واللي شايف نفسه ويقاوم ويفز الا لمسته تراه بري يعني ما هوب من الأحواش وصحيح الجسم اما اللي تشوفه خامد اما يكون مريض والا من الأحواش
وناظر عيونه اذا هي مغمسة او ان الوانها تختلف ابعد عنه .... كلام سليم من ابو هشام انا نفس الشىء اشوف الخروف اللي يدافر الخرفان و وقفته وهيئته تدل على صحة و عافيه وظهره طويل وشعره ناعم ... اطلب من حارس الغنم يجيبه و اقعد افليه ....هههههههه .... وهو ماسكه على الأرض ما يرفع ظهره اللين أتأكد من سنه و ان ما فيه امراض .. وادي الحارس عشرة و الا عشرين واسئله ايش رأيك ويقولي اذا شايف فيه شىء ما شفته ..... |
طبيعي تصل اسعار الاغنام الى هذه الارقام
هل جرب احدكم تربية الاغنام مصاريف لاتتخيلها الموضوع ليس بهذه البساطه 1- حوش مستأجر ولك ان تتخيل تكاليف الايجار 2- عامل يقوم بالتربيه والتنظيف و التعليف 3- اعلاف برسيم وخبز وتمر 4- الطامه الكبرى (الشعير) واسعاره الفلكية 5- طبيب بيطري وادوية خاصة بالغنم 6- نقل وتوصيل الى سوق الغنم وللمعلومية تكلفت الرأس الواحد من الغنم تصل الى 50 ريال للتعليف (برسيم + شعير) في الشهر هذا غير التكاليف الاخرى المذكوره اعلاه حيث كانت لاتصل الى 20 ريال ايام سعر الشعير 22 ريال للكيس و 14 ريال لبنة البرسيم . وهذا بناء على تجربة عشتها في تربية الاغنام ومازلت مع قريب لي وذلك من اجل الحصول على ذبائح نأكلها نحن واقاربنا ونبتعد عن سوق الاغنام التي لانعرف مصدر اعلافها وهل هي خالية من اي جرعات ادوية لم ينتهي مفعوله وقام التاجر ببيعها علينا. لكن للامانه مصروفات الاغنام عالية في الوقت الحالي و الله يكون في عون صغار المربين |
لماذا لا يكون لدينا اكتفاء ذاتي
يعن مثل استراحه على قدك تزرع فيها ورقيات ــ حمضيات ــ خضار ــ وتربي فها انواع الطيور ـ ارانب ــ اغنام منها تطوير انفسنى من ناحية الاكتفائ الذاتي امشكله عندنى كل شي نشتريه وبنسبه للزراعه بي امكانك تزرع في البيت ايضا |
اقتباس:
الفكرة ممتازة لكن في بلد طبيعي يكون فيه سعر البناء أغلى من الأرض وتصله الخدمات بسهولة وعلى رأسها الماء |
اقتباس:
ياريت تدلنا عليها , الكيلوا يوقف على 30 وصغيرة ماشاء الله سعرها ممتاز |
عزيزي ليش الاغنام داخل المدن اغلى بكثير عن القرى بفارق يصل الى 200 و 400 ريال
لاتوجد خسارة لرعاة المواشي البهم يرضع لين عمرة شهرين بعدين يتعلف 3 اشهر وخسارتة 200 ريال من كل شي ويباع 1000 ريال الى 1200 ريال |
| الساعة الآن 08:54 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by