بساتين القصيم
 

البارح عقب صلاة العشاء رحت للسوق ومعي نشرة الأغراض .. ويما أن أكثرها خضرة قلت اجل اروح لبساتين القصيم !اخذت الخضرة والأسعار لك عليها ومن قرادتي رحت للرز وأخذت كيس رز المهيدب ( بسمتي ) 20 ك طبعا ما حطوا السعر لكن حظي قال خذ كيس هالرز رغم أني سوف اذهب للعثيم بعدهم على طول.جيت لجبن كرافت كاسات سايل لقيت السعر 21.5 قلت هذا غالي خله عنك ..ورحت للسكر لقيته بـ 23 قلت اتركه .. العثيم قدامك !!المهم يوم جيبت احاسب تفاجأت أن سعر الرز 20 ك بـ 112 ريال !!!!قلت يمكن كل السوق كذا مانيب مهون لو ايش .وحاسبت ومشيت للعثيم ..واول شي سويته رحت للرز لقيت ابو عشره ك وما لقيت ابو عشرين وكان سعر العشرة كيلو بـ 52.5 !!يعني العشرين تطلع بمية وخمسة بس !!!!يعني فرق 7 ريال عن نصابين القصيم يعني بساتين القصيم وما بينهم إلآ خمسين متر !! رحت للجبن لقيته بعشرين وكسر ( نسيت كم ) لكنه أقل من البساتبن ..ورحت للسكر لقيته بـ 21 وكسر يعني اقل كذلك من البساتين حسبي الله عليهم ..المهم ضفيت اغراضي ومشيت ..وزير التجارة يقول ان الزيادة من بلد المصدر والتجار مالهم شغل اجل كيف يكون الفرق بين البساتين والعثيم 7 ريال في نصف الكيس وما بينهم الآ خمسين متر!عموما نصيحة بساتين القصيم خذ منهم الخضرة واللبن اما المواد الغذائية فدور غيرهم ..للمعلومية كان هذا ليل الثلاثاء 8/8/1428هـ بعد صلاة العشاء ..وآسف للإطالة

تمت المقاطعة

من حينهم بساتين القصيم غالين حتى الخضره والفاكهه وبنسبه للعثيم الشهير بكذاب يا خيشه من زمان مقاطعينه بعد ما ضحك علينا بلعبه مقاطعه الدنمرك وهواول من رجع يبيع لهم وفرحان

(((( بساتين القصيم ,,,, من أكبر مصاصي الدماء !!
 

من شريت منهم أول مرة عرفت أنهم حرامية أقل شي يزيدون 10 % على أسعار غيرهم
:mad:
الله لايربحهم

سوق الخضار جنبهم ومثل بضاعتهم وأحسن في بعض الأشياء وأرخص

ايام ارتفاع الخضار شريت منهم خضار بحوالي 500 ريال وقلت اكيييد الخلل من ارتفاع الخضار
لكن رحت بنده ولقيت كيلو الكوسة ب10 ريال وانا شاريه سطل صغييييييير ب24 ويغيت اموت من القهر ومن بعدها كنسلت عليه

بساتين القصيم حراميه من جد انتبهوا

نصابين جنب بيتي ماآخذ منهم

لا بساتين القصيم ولا العثيم ..

العثيم نصاب وصاحب دعايات كاذبة واخرتها سالفة الرز ..

وبساتين القصيم نفس الشي ..

عاد الله من الهم في محلهم .. يا كرهي لـه .. دخلته مره وحدة وبغى يجيني اكتئاب ..

بساتين القصيم حرامية حتى في الخضار ولكن على الأقل خضارهم زينة
أما العثيم فأكبر غشاش يكفي أنه هو والسدحان ما يخفضون غالبا إلا على الأشياء اللي تواريخها توشك على الأنتهاء وها الكلام من تجارب متعددة ولا تنسون الحريم يدققون أكثر من الرجال على هالأمور

واللة حتى بريال ماء ............. ما أشتري منهم !!
 

موضوع يستحق الرفع

اشكر جمبع الأخوه على التفاعل ...

اخي القاصي
ما كل من سكن شمال الرياض صار هامور ..

حتى وان كانت اسعارهم في الخضراوات مرتفع قليل تبقى هي الاحسن ... على سبيل المثال لو اخذت من عندهم سطل طماطم كبير للامانه تجده بالكامل نظيف جداً ولا يوجد فيه حبه واحده خربانه ... اما العثيم وغيرة من المحلات تجد ان الكثير من الخضراوات معفنه وخربانه ... كلمة حق يجب ان تقال ... اما ما يخص الفواكه والمواد الغذائية الاخرى كلامكم صح فيه ارتفاع في اسعاره ...

ملاحظه : ترى يا جماعه عندهم مشكله بعد من عرفتهم الشبكه عطلانه يعني لازم تجهز الكاش قبل يرسلون الى صراف بنك الرياض ... شكلهم ما يثقون في بطاقات الصراف او انهم يموتون في شئ اسمه كااااااش ..

والله من شاف حوسة سوقهم قال الباب الباب ياولد


القاضي مساك الله بالخير

انا من شمال الرياض ومفلس بسبب الخطط الخمسية :cool:


شكل المشرف بيمصع اذني :D