تحذير من استقبال مكالمات من 907
 

السلام عليكم

انتبهوا يا اخوان من اتصال يجيكم من 907 يعرض باقات من الاتصالات لأنه حتى لو ما وافقت على العرض بيفرضون عليك الباقة و يعملون لك اشتراك بعد نهاية المكالمة

و هذا حصل لي اليوم حوالي الساعة 3,11 العصر، جتني مكالمة من 907 على جوالي و عرض علي موظفهم باقة برودباند جود معاك بقيمة 399 ريال شهريا بدل اشتراك الهاتف الثابت بـ 45 ريال و اشتراك افاق شامل 1 ميقا بـ211 و ادفع زيادة 43 ريال، فرديت عليه اني بأفكر و ارد عليهم، يرد الاخ متى نرسلك الشريحة الخاصة بالاشتراك الجديد، فأكدت عليه اني ما قررت اخذ العرض و بأرد عليهم بعدين، بعد ما قفلت تفاجأت ان جتني رسالة تم استلام طلبكم لتفعيل خدمة برودباند، و بعدها رسالة ثانية تم تفعيل اشتراككم، و رسالة ثالثة تم تنفيذ طلبكم لتفعيل خدمة برودباند، على طول اتصلت بـ 907 و لقيت فعلا فيه طلب بأسمي على هاتفي الثابت لباقة برودباند جود معاك و ألغيت الطلب و شرحت الموضوع للموظف اللي نصحني بتقديم شكوى على المجاني 8002444455، المضحك اني اتصلت على المجاني 3 مرات و كل مره التسجيل يقول نرجو الانتظار و بعدها يقفل الخط و المره الرابعة لقيت التسجيل يقول انتهى وقت عمل المكتب.

المشكلة عندي مو مع شركة الاتصالات او اشكالها، اللي مثل الكلب المغلوث اللي بينهش اي واحد يمر من عنده، المشكلة في ان البلد ما فيها نظام و لا فيها احد يرد لي حقي، و سبحان الله لو ينعكس الوضع و يصير الحق مع قوي تلقى عندنا نظام جبار و قوانين و انظمة و لوائح تنظيمية و جهات تنفيذية على اتم استعداد تلعن جدف الشئ الواطئ اللي اسمه مواطن.

حياك اخوي ..

المكالمات على ما اعتقد تكون مسجله .. وهنا يثبت حقك بانك ماوفقت اوطلبت الاشتراك .. مالك الا ان تشكي لهيئة الاتصالات ان ما تجاوبت معك الاتصالات
===========
بصراحة الواحد يخاف يستقبل منهم اي رساله او مكالمه ما تدري الا وهم مفعلين لك الخدمه سواء رضيت او رفضت ؟؟؟؟؟؟؟؟؟؟؟؟؟؟؟؟؟

هي سرقة ، ولكن نقطع يد مين ؟!

المشكلة يا اختي ان هيئة الاتصالات تطلب اني اقدم الشكوى اولا للمشغل!!!! ممكن اتفهم هذا الطلب اذا كانت المشكلة مع موظف شركة الاتصالات بإعتبار ان الشركة هي مرجع الموظف، لكن اذا كانت مشكلتي مع الشركة اروح اشتكيها على نفسها و هي تقرر؟؟؟؟؟؟؟ المفروض الشكوى على اي شركة اتصالات تقدم مباشرة لهيئة الاتصالات و ممكن الهيئة تقترح التفاهم مع شركة الاتصالات لحل المشكلة، لكن يكون نظام فهذا معناه ان الهيئة لا ترغب في محاسبة شركات الاتصالات.

المفروض يا اخوي نقطع يد اللي كتب نظام ان الشركة اذا كان الحق لها توقف كل الخدمات اذا ما سدد العميل و تحط اسمه في سمة و تخنقه حتى يسدد بغض النظر عن صحة و نظامية المطالبة، و اذا كان الحق على الشركة ما تلقى من يرد الصوت.

قدمت الشكوى لشركة الاتصالات قبل شوي و قالوا بيردون علي وش يصير، اشوف و اخبركم.

صراحه لايوجد نظام يحمي المستهلك او المستفيد من خدمات الاتصالات .... وهو يعكس عدم وجود انظمة قضائية وقوانين ولوائح تسير عليها الشركات والمستهلكين ,,,, وهذه هو وظيفة
هيئة الاتصالات والتي للاسف معنمده كليا على ان الشركات لها انظمة داخلية تتعامل مع المستفيد او المستهلك بشكل عادل وحماية للمستهلك يمكن ان تتم عن طريق الشركة وهذا هو الخطا الذي
وقعت فيه هيئة الاتصالات لابد من وجود قواتين مكتوبة ومعلنة للملئ بحيث يعرف كل طرف حقوقه
وواجباته تجاه الاخر واذا تم مخالفة هذه الانظمة من احد الطرفين فمن حق الاخر ان يقدم ادعاء
ضده وتقوم الهيئة بالتحقيق حسب الانظمة ومن ثم اثبات الدعوى واحالتها للجهات المختصة لاعادة الحق الى صاحبه

السلام عليكم ورحمة الله وبركاته

أخوي (Tameem) ولا يهون الأخوان

مثل ما تفضلت في موضوعوك أنا حصل معي نفس الشغلة
هذا الله يسلمك أتصلت على 907 لإلغاء خدمة DSL
وبعد الغاء الخدمة تفاجأت بعد اسبوع بإتصال من 907 يعرض علي عرض مجاني لمدة شهرين 5 قيقا وقلت له طيب في حالة اني ما ابي اجدد بعد الشهرين وش يصير قال يتم الالغاء تلقائي اذا ما اتصلت وقلت ابي اجدد
قلت اذا على كذا اوكي

بعدها بدقائق جتني رسالة التفعيل واليوزر الجديد
وشغال زي الحلاوة

بعد الشهرين جتني الفاتورة فيها قيمة 5 قيقا
عاد انا قفلت واتصل عليهم وتعرفون حركات التصريف الي يسوونها
ارسلت فاكس لهيئة الاتصالات وفيه شرحت الي صار وقلت لهم يرجعون للمكالمة الهاتفية المسجلة
وتم بالفعل ذلك وتفاجأت بعدها بحوال 3 ايام بأن 907 يتصلون على الجوال ويقولون لي ترى راجعنا المكالمة المسجلة وطلع الخطأ من الموظف قلت ما لي شغل في موظفكم تفاهمو معه وسوو لي تسوية بالمبلغ
طبعاً الموضوع هذا صار على نهاية رمضان السنة الي طافت
والموضوع هذا تم البت فيه بعد الشكوى بحوالي 3 اسابيع
وانا مكلمهم في شهر 4 من عام 2010
بعد التسوية رجعت الفاتورة (316 ريال) بعد ما كانت ألف وكسور
يقولون 907 انهم سوو التسوية بالمبلغ الي حوالي 800 ريال ورجعت الفاتورة 316 ريال
قلت الله لا يشكر لكم فضل يا ملاعين الرقبة وقفلت على طول

ومن يومك ما دقوا علي واعرضوا علي شي ابد

شكلي طولت عليكم <<< انت تقولها صادق
تحياتي

مشكوووووور والله يعطيك الف عافيه على التنبيه

مثل ما قال الإخوة هنا

قدم شكوى رسمية للاتصالات

وبالنسبة للرقم المجاني اللي ذكرته يعمل أيام السبت إلى الأربعاء من 8 صباحاً - 4 عصراً،

قدم الشكوى وتابعها معهم وبتلاقي حل باذن الله

لو ما ردو عليك أو تأخروا بعد الشكوى خاطب هيئة الاتصالات وعطهم رقم وتاريخ الشكوى


هم يماطلون ويضيقون خلقك لأنهم يعرفون إن أغلبنا يستسلم بسرعة وما يحب المتابعة بس انشب لهم وهذا حلالك

اعانك الله
اضيف الموضوع على صفحة مقاطعه على الفيس بوك

بأختصار يا جماعة الخير .
إذا كان خصمك القاضي ! مين تقاضي ؟