وفر اكثر من الف ريال
بسم الله الرحمن الرحيم ( اكتب لكم اخواني بقلم اسلامي ولونه اخضر ) * اريد ان اشرح لكم ماحصل لي في صناعية الخليج بالرياض 11/4/1431 . ( السالفة ) تعطل المكيف عندي بسيارتي هايلكس ديزل 2006 فذهبت الى كهربائي دلني علية احد من الزملاء فلما اختبر الفيوز وجدها سليمة والكهرباء واصل للكمبرسر فقال لي قبل الفك هذاء العطل من المغناطيس الذي يتحكم بالكمبرسر لازم يتغير وعندي مستعمل مغناطيس كرسيداء بـ 70 ريال ومغناطيس كامري بـ 130 ريال ( ولا ادري ماهي موديل السيارات ) والجديد غالي فقلت له اكيد يركب ( قال نعم ) فقلت له توكل على الله وفك الكمبرسر وأخرج القطعة وذهب يقيسها على التي عنده وتفاجأت بأنه يقول لايركب لآن مقاسه يختلف فقال مالك غير الجديد ( لو اخبرني ان القطع التي عنده لاتطابق ذهبت الى التشليح ورجعت بها اليه قبل الفك والآن ورطني لآن السيارة لاتمشي السير واحد ) ( ماعليهم منك في 60 ..... سعودي فلوس كتير وهم مايدرون ان اغلب راتبي كله اقساط + ايجار+ قسط سيارة + قسط زواج + مصاريف اولاد ومنزل وفواتير ). فذهبت مشياً على الأقدام وسعرتها عند المحلات ولم اجدها الاعند محلين فقط قلت لهم بكم القطعة دق الكمبيوتر وقال لي وهوا يبتسم القطعة بـ 1150 وبعد الخصم بـ 850 ( قلت له هل هذاء السعر بالريال او بالربيه قال لا بالريال ) لآن القطعة الجديدة تجي معها مكره وقطعة اخرى مع المغناطيس ( الوكاد اوجعني راسي ) . فذهبت الى محلات اصلاح المكيفات لعل وعسى اجد عندهم مستعمل ودرت حوالي 15 محل واخيراً وجدت ميكانيكي ( تركي ) جزاه الله الف ومائه وخمسين خيراً شرحت له حالتي آسف حالة سيارتي ( فرحمني ) فقال سوف اقوم بأصلاحه بـ 50 ريال واخذ مني القطعة واصلحها امامي واستغرق التصليح خمس دقائق فقط ( اللي يشوفه يقول يسوى تصليحه 15 ريال ولاكني محتاج ) ماذا عمل ؟ شرح لي عمل القطعة وقال يوجد بها فيوز امان حتى مايتعطل الكمبرسر اذا زاد الكهرباء عليه ( زي الفيوز الصغير الذي نبدله في افياش مكيفات البيوت زمان ) واختبره واشتغل فرجعت للكهربائي فقلت لة اصلحتهُ ركب القطعة ( فهز برأسه اربع هزات ثنتين يمين وثنتين يسار ) وركبها والحمد لله اشتغل المكيف . * * * اربع استنتاجات :- 1 - ماانتشرت محلات قطع الغيار الا بفضل الميكانيكي والكهربائي اللي مايعرف الا ( تغيير جديد فقط ) ويقول بكل ثقة عطلالالالالالالالان . 2 - نادراً ماتجد الفني الممتاز ( وان وجدته عن مجرب عساه يفضيلك ) . 3 – المستفيد الأول شركة تويوتا قسم قطع الغيار . 4 – في نظري 75% من قطع الغيار المستعملة يستطيع الفني الشاطر اصلاحها . النصيحة لاتشتري أي قطعة لسيار الا من التشليح واترك الوكالة وقطع الغيار لأن القطع في السنوات الأخيره غير اصليه . (يوم القيامة ينكشف كل غشاش وحسبنا الله ونعم الوكيل ) ( اترك لهم الدنياء ولك الأخره وماعند الله خيرا وابقى اهم شيء الصبر ) ابو زياد |
حياك ابو زياد ...
اشكرك على هذا الموضوع وماختمت به من نصائح |
وفقك الله لكل خير على هذه المعلومةالمفيدة
|
جزاك الله خير على المعلومة والمفروض أن الواحد ياخذ لفة على اكثر من ورشة ويقارن |
انا من سكان الخليج وبيتنا عند سدر تحديدا والصناعيه اروح لها مشي
ويعلم الله انه انصب من صناعيه الخلييييييييييج بالعالم مافي وجزاك الله خير على النصائح |
حالك حالنا كلنا مع العمال " النصابين "
بالنسبه لى متعود على الحركة هاذي و دواها: أى قطعه فكها العامل ما تم عليها إتفاق هو ملزم يوجد لها حل بطريقته و لو لقيت اصلاح السياره ماهو على مزاجي ترجع له و بيصلحها .. محبه أو غصب |
يثيبك الكريم معلومة حليوة
|
اخى العزيز بالله عليك عطنى رقم الوارشه او جوال التركى والله مكيف الايكو خربان من سنه
ويبى تغير كل ماروح لواحد يقول هذا الكلام وده جوالى لو تكرمت برساله اورد اواتصال0507472452 ابومروان ولك الف شكر وتحيه |
السلام عليكم
اول شيء التركي ميكانيكي ( بنيتة قصير ) ورقم الورشة 163 في صناعية الخليج تفتح شمال وقد اخبرني عن ورش يعرف عنوانهم يقومون بلف المغنطيس ولا يخرب ابدا بأذن الله وبالنسبة للكهربائي آسف لااعرف احد تقدر تسأله |
بارك الله فيك
|
السلام عليكم ورحمة الله وبركاته ، وبعد ،،
أشكر أخونا أبو زياد على هذا التنبيه ، وفعلا أنا حصلي نفس الموقف عندي جمس وخرب فيه منظم الهواء وهو أكتروني ما يتصلح ولاينفك وقالي المهندس أشتره من الوكاله ودخت وأنا أدوره لين حصلته في الجميح بحوالي 400ريال المهم أني أخذته وركبته والله ياجماعه ماقعد شهر وطلعلي نفس المشكلة ورحت للمهندس قال بيغالك نفس القطعة وقلتله توني مشتريها قالي رح أشترها من التشليح بس بعد ويش وأشتريتها 200ريال ولها الآن حوالي 6 أشهر ماشيه تمام . ودمتم ،،، |
أحد العاملين بالوكالات المشهورة
عندما رفضت اصلاح المكيف نظرا لسعره الغالي ذكر لي ان هناك ورش ممتازة على ما اعتقد ان فيها عمالة فلبينية ووصفها حسب ما اتذكر قال لي في نهاية طريق خريص بعد ما تتعدى مخرج مستشفى الحرس |
اقتباس:
وش مصبرنا على دباشه هالعمال ولعانتهم الا ايماننا بما ختمت به كلامك بارك الله فيك اقم |
احيانا التشليح اغلى من الوكالة !!
|
الله يكون في العون
في هالزمن صعب ان تجد ميكانيكي او كهربائي أمين وصادق . |
التشليح مو دائما يكون رخيص
سيارة جدي هايلكس 2001 جتها صدمة في باب الراكب الباب ممكن يتسمكر لكن الأفضل كان تغييره في محلات منيف النهدي الباب عنده قيمته 700 ريال مع الأشرطة 900 ريال وفي التشليح ارخص واحد يقولنا 1400 ريال والله لو اني في مقطعه ومبنشر ما وفقت على سعرك |
صدقت
حتى أن بعض الميكانيكيين يشترون القطعة _ التالفة _ ويخصمون سعرها من تكلفة التصليح ولكن أنا لا آمن قطعة من تصليح أيديهم فأشتري قطعة صالحة من يومها |
اقتباس:
|
اقتباس:
اعجبني ردك وعسى الله يعينك |
| الساعة الآن 02:27 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by