معاناتي مع مكيف سامسونج والوكيل
 

السلام عليكم ورحمة الله وبركاته ،،،

بداية أسلم على جميع أعضاء المنتدى والقراء الكرام ، وإعذروني إن كان موضوعي التالي ليس في قسمه الصحيح فأرجوا التصحيح ..


إخواني حتى لا أطيل فإن معاناتي مع شركة المتبولي وكلاء منتجات سامسونج في المملكة يطول شرحها ، والقصة بإختصار :

قبل 3 أشهر قمت بشراء مكيف سبليت من نوع سامسونح 24000 وحدة ، وذلك من محلات الكترو في الرياض ، طبعا قبل البيع كان عسل الكلام بإن التركيب على مسؤولية الكترو ، والضمان على مسؤوليتهم اما عن طريقهم أو عن طريق الوكيل ولكن بمعرفتهم .

المكيف تم تركيبه بعد مماطلة في موعد التركيب المحدد ( 9 صباحا ) وتم التركيب ( 5 مساء ) مع أكثر من 10 اتصالات مع أكبر الى أصغر موظف في الكترو !

المكيف إشتغل أقل من إسبوع وبعدها بدأ يصدر أصوات قوية ومزعجة من الوحدة الداخلية ، صوت في مروحة دفع الهواء وصوت مخيف عند بداية التشغيل !

إتصلت بألكترو وأرسلو لي فني بعد 3 أيام من اتصالي .. وبعد فك الوحدة الداخلية وبهدلة أثاث المنزل بتراب وماء المكيف ! وإتساخ الجدران بطبعات أكف وأصابع الفني الذي لا يعرف أن هناك شيء اسمه قفازات مخصصة للفنيين !

وحدد مشكلة من 2 وهي صوت المروحة وقال ان محرك المروحة به عطل ويجب استبداله ( المحرك مع المروحة ) وقال سوف أعود لزيارتك بعد يومين ومعي القطع ! اما المشكلة الأخرى فقال هذا عادي !!

غاب لمدة 5 أيام تقريبا ، فعاودت الإتصال بهم ، وأفادوني ان الوكالة هي المسؤولة عن التصليح ويجب علي أن أراجع الوكيل ! ( وين الوعود أول وقت الشراء ؟ ) ومادامها كده ليه استقبلتو شكواي وأرسلتو فني ووعدني بأن يعود بعد يومين ! ولم يعد ولم تتصلو ولم تعتذرو !!

اتصلت بالوكالة على رقم مجاني ( مرة يردون و10 لا ) ، ردت بنت موظفينها مبرمجينها ما تعرف غير تاخذ معلوماتك وتعطيك موعد ( أما نوع الشكوى - العطل - الرد على طلب مثل رقم مشرف فهذا ما تعرفه ! )

المهم اعطتني موعد بعد اسبوعين !! وانتظرت اسبوعين والمكيف يأن .. وأنا وعيالي نأن منه .

حضر الفني بعد اسبوعين .. ونفس المعاناة .. فك المكيف وبهدل البيت وحدد العطل وقال سوف أكتب تقريري وخلال 3 أيام نعود لك مع القطع .

3 أيام إمتدت الى 10 ولم يأت اتصالهم ! جلست اكثر من يومين أحاول أن اتصل بهم الا أن سنترالهم لا يجيب ! وبعدها وفقني الله ومسك الخط .

وأعدنا الكره من أول وأشرح لهم ما حصل معي ! وطبعا الرد : عطنا 10 دقايق ونرجع نكلم عليك !

10 دقايق تصير يوم .. وطبعا أنا اللي أرجع اتصل .. وأشرح معانتي من أولها ( لأن اللي يردون عليك كل مره موظفه وشكلهم ما يسجلون في النظام عندهم سجل الشكوى )

وعطنا ربع ساعه وعطنا ساعه .. وأخرتها صرخت فيها وطلبت أكلم المشرف وأعطتني جواله ! كأني بناسبه أنا ! ليه ما تحولني عليه أو تعطيني رقم مكتبه ! اتصلت بالمشرف على جواله وقالي انا مشرف المنطقة الشرقية ! وتحايلت عليه يعطيني رقم مشرف الرياض .. واعطاني رقم ما حد يرد عليه !!

دام الحال أكثر من اسبوعين حتى ارسلو فني ( للمرة الثانية من عندهم وقبلهم فني الكترو ) ! قلنا جاء الفرج ، ولكن الفني بمجرد ما دخل المنزل بادرني بالسؤال : ايس مسكلة صديق ؟

بعد هالحوسة وزيارة فني الكترو .. وزيارة فني الوكالة في المرة الأولى .. جاء الفني الآن يسأل عن المشكلة والعطل !!!

سألته ما علموك انت وش هو له جاي ؟ قال لا ! انا أفحص وبعدين أروح أكتب تقرير !! وقال اذا تبي اغير لك المروحة .. معي مروحه فاكها من مكيف خربان .. اش رايك نجربها !!

قلت له شكرا .. الله معك .. انا بجيب فني من الشارع .. ما ابغا صيانتكم ولا ضمانكم ، فقال لي انا انصحك .. لو المكيف تصلح بره الوكالة سوف تفقد الضمان ، ولو حصل خراب ويحتاج مثلا كمبرسر سعره فوق الألف ريال .. الوكالة ما راح تصلحه لك .

هنا وقعت في الحيرة .. وقلت له تفضل فك المكيف بس تكفى خلني اساعدك ، وأساعده وانظف من تحته وأعطيه قفازات !

راح الرجل وهذا قبل 3 أسابيع .. ولم يعاودو الاتصال بي .. وانا وربي طفشت منهم ، أحالو أتصل ما يردون علي .. وانا رجال مشغول في النهار .. وهم يقفلون الساعه 4 العصر !

اتصلت عليهم أم العيال .. والحريم يفهمون على بعض .. اعطت كلمتين للموظفة وقالت خلاص اليوم يكلمون عليكم .. وفعلا اتصلو بس متى ! وانا أصلي العصر !

انتهيت من صلاتي .. اتصلت على نفس الرقم اللي اتصلو منه ، رد السنترال بس ما أحد يرد من الموظفين ! وضاعت علي الفرصة .. ولم يعاودو الاتصال مرة أخرى وهذا !!

هذا من اسبوع .. والآن المكيف شكله انتهى .. تبريد معدوم .. يفصل ويشتغل على كيفه .. أصوات غريبه !
ومع هذا الحر .. وحرقة الأعصاب من كل ما جرى .. ما أقول غير حسبي الله عليهم كل من لم يؤدي الأمانة منهم .. وكل من تلاعب بالناس وهضم حقوقهم .

قراري الأخير .. بروح لأي ورشة وبجيب فني يصلح ما يمكن اصلاحه .. واذا احتاج قطع غيار غالية فسوف أرميه في الشارع .

-----------

آسف للإطالة .. وأرجوا ان تدلوني اذا كان في مجال للشكوى عليهم . أين ولمن وكيف ؟؟

ااااااااايه لاتشكي لي ابكي لك

انا طحت بأخوه ابراهيم شاكر LG

لكن ابقول كلمة الحق صيانتهم بالشباك طبعا تطلبهم يومين بالكثير وهم عندك

بدت مشكلتي بأني شريت للبيت كله مكيفات ال جي طبعا عن تجربه في بيت الاهل قبل 5 خمس سنوات وكانت مكيفاتهم من اروع مايكون
قبل سنه اثثت بيتي وكنت مسافر وموصي الوالد الله يحفظه يشتري لي المكيفات المهم راح للمحل وقالي وش النوع اللي تبي قلت مافيها كلام زي مكيفاتنا ال جي

طبعا لثقتي وتجربتي لها والمصيبه انها الاغلى بالسوق
شراها وركبت وسكنت وعدت السنه الماضيه على خير

بداية الصيف هذا بدت العيوب
واحد من المكيفات قام يثلج دقيت عليهم بعد يومين جا الفني وقال بسيطه يبيله غسيل وفيه تنسيم مواصير ومدري ايش
فكوه واخذوه وجابوه بعد يومين والحمدلله مشى حاله وضبط

بعدها بشهر خرب الثاني دقيت عليهم جاني فني غير الاول وشكله الله بالخير
شيك شافه قال المكيف ممتاز

قلت ياحبيبي بالليل مايصحيني الا العرق وصرت ما اعرف النوم
قال لا هذي حرارة الجو

يعني عذر ماينبلع

قال انا ما اقدر افكه وهو شغال ممتاز لكن انت جرب جيب واحد من برى يبدله لك بواحد من المكيفات الثانيه وجرب

طبعا جبت لي فني من برى عشان يفك حق وحده من الغرف ويبدله مع الخربان
وهو يفك بدت الفضايح

طلع المكيف وقال آآآه صيني
قلت وش اللي صيني
قال المكيف
قلت لا كوري
وانا ماشريته الا ان اللي عند اهلي كوري اصلي :confused:
قال لا صيني شوووف :wounded1:

الا والله فعلا مكتوب صيني
قلت مايهم اهم شئ الجوده :think:
<<< عنده أمل :lol:

قالي لا صديق هذا مافيه مشكله
قلت وش المشكله اجل اذا هذي ماهي مشكله :blink:

قال شوف كمبروسر
قلت وش فيه بعد
قال هذا راوتري صغير :rolleyes:

قلت يعني :mad:

قال يعني توفير كهرب :thumbsup:
قلت ممتاز استفدنا :D
قال لا وبعد توفير تبريد :D

قلت هذي اللي مالها دوا :crying:


المهم بدل المكيفات ومشى بعد ماصفقني بهالمعلومات اللي ماصدقته واروح واسأل الا كلامه صدق
طبعا نرجع للسالفه حقت الصيانه اللي قالوا بدل المكيفات وجرب

طبعا بدله ورجع التبريد زي الاول الحمدلله لكن سالفة الكمبرسر تقرقع بقلبي
دقيت عليهم مره ثانيه

وجوني نفس الطقم الاول قلت انتم قلتوا بدله وجرب الحين الغرفه بردت يعني العله بمكيفكم

قالوا خلاص هات الفاتوره نبي نشوف الضمان
قلت خذ
ويناظر قال ضمانك مخلص من شهر :confused:

قلت انت جاي هنا قبل شهر وقبل لاينتهي الضمان و تقول مافيه مشكله ومدري ايش انت ماتفهم وبصراحه بغيت اكله من القهر

طبعا وطا راسه وقال خلاص اباخذه

طبعا كرهت ال جي وساعتها ورحت شريت نوعيه ثانيه والاول صلحوه ورجعوه والله مدري وش صار عليه لاني قلت طلعوه فوق على الدرج وخلوه لين نشوف له حل

فنصيحه اللي يبي يشتري مكيفات وبيخسر على بيت كامل مثلي لازم يشاور ويتأكد ويعرف وش الزين

بالنسبة لي ومن واقع تجربة LG اخيس من الصيني

ال جي يطلع اصوات وتبدأ الطقطقة فيه تقول صحر اوي مهوب سبيلت

الشكوى لله

والله يعوضنا شركات النصب يمشي بدمها

اول ماتبدا تلقى البضاعه من احلى مايكون والنفس طيبه وخلال ثلاث اربع سنوات بعد ماتبني قاعده تبدا شغل الخنبقه ويالله دور احد يوقف معك

شركات لها سمعة عالمية ومكانة .. ليه إذا وصلت للسعودية أصبحت رديئة ؟؟
لايكون التجار يستوردونا الرجيع والمضروب منها ؟؟؟؟
تشكرون على طرح تجاربكم
ينقل لقسم الأجهزة الكهربائية

أخي بإمكانك تقديم شكوى عليهم

بالاتصال على هالرقم

8001241616

نفس السالفه هذي المرة مع مكيفات اسبليت شيجو
سالفه قريبه من سالفتك وبعد ما جو قامو بتغيير كل ما يوجد في بطن المكيف اتوقع بقولي الجرم الخارجي فقط وابشركم اشتغل المكيف بعدها ثلاث شهور فقط ورجع لعادته القديمه
لكن في المرة الثانيه اصبح خارج الضمان قمت ورميته وركبت بدله مكيف شباكي من نوع عادي ولله الحمد الان له اكثر من خمس سنين شغال عال العال.

:):) نصب عيني عينك , اجل ليش شاري مكيف!!!!

من باب التجربه
سامسونج منذ 7سنوات ويعمل بحاله جيده
ومنذ 3شهور تم تركيب كلاس وهو تحت التجربه

كلاس يعتبر من اكثر الاجهزة رداءة

بصراحة اشتريت مكنسة كهربائية وانحرقت بعد ما استعملتها للمرة الثانية

وصانع الفشار من كلاس انحرق من ثاني استعمال برضو

نصيحتي رجع كلاس تراه رديء وكلمة رديء قليلة في حقه

حل الغش
 

اخي Abu Rayan و الكلام للجميع,,

انا من تجربتي مع بعض الوكلاء اسرع و أنجع حل انك
ترسل ايميل للشركة الأم , في حالتك Samsung
واشرح لهم القصه, وشوف ان ما جابوا خشم مدير الصيانة و كلمك شخصيا ان شاء الله.

انا جربتها مه Axiom واتصلوا قالوا تدلل.

و الله يسهللك

نحياتي

كله زي بعضه ما في حل

سامسونج سيئه صياانتهم اتصلت كم مره مايردون ومرتين ردة بنت ماتعرفت منها الى انها طويلة لسان ولاتعرف الاسلوب كرهتني بالشركه وبالجهاز الامبي ثري كانت مشكلتي مشتري جهاز ام بي ثري وسماعته خربت من اول ماشتريته وعندنا 4 من نفس النوع لافراد العائله وماشيه تمام وقالت بكل وقاحه ماايخصني اتصل بخدمة العملاء يمكن يفيدوك بعد ماستحقرت الموضوع وردت بدون نفس بعدها حرمت اشتري منهم كنت ناوي على سبلت سامسونج وهونت حمدلله خيره اشتريت صيني ماندو رائع ولله الحمد
بعد مارميت ال جي قولدن ماله سنتين عندي عذبني وصيانته زفت ولافيه حيله

ياباني اصلي مافيه الا اسم فقط

كلنا في الهوا سوا
 

اشتريت 12 مكيف شيقو من معرض وكيلها الزقزوق مباشرة طمعأ في خدمه وصيانه افضل ولكن هذا لم ينفعني، ثلاثة ايام فقط وظهرت العيوب من اصوات المراوح وخرخرة المياه الى الداخل والخارج ولما تتصل عليهم، نفس ما حصل مع الاخوان، اول موعد بعد ثلاث اسابيع وبعدها جاء باقي السيناريو.. الى ان يقرفوك حياتك ويكرهوك فيهم:zx:
سألت واحد مصري، ليش تشتري هذه الاجهزه من هنا وتشحنها الى مصر ونفس الماركه بتتجمع عندكم، قال اللي عندكم يعيش اكثر من اللي عندنا مع انها نفس الماركه.. يعني اسم الماركه ما عاد هو مقياس. والله يعيننا على الغشاشين

تبيى مكيف خذ جبسون الاصلي
او مستبيوشي الاصلي
والله يعينك على السعر
بس بعدها راح ترتاح من الصيانة والخراب

كلها تجميع في تجميع , بس اذا اشتريت اذكر الله وعليك بالتسمية

الموجود في السوق ثلاثة انواع :
1-تقليد
2-وتقليدالتقليد
3-وتقليد الاصلي

up

غريبة بيتي ال جي فيه ممتازله الحين اكثر خمس سنوات ما به احسن منه

وببيت اهلي كذلك روعة

يمكن الانواع القديمة

الكثير من الأخوان يبحث عن الاسم المعروف وأنا أقول خلهم عنك والله إن صيني أفضل منهم لأنها مباشرة يقولك صيني لكن احرص على الوكيل المعروف
ولا تغرك الماركات المعروفة لأنها في الأكثر صينية مثل
هاس
كرفت
كراون
سامسونج
حتى إل جي فيه نوع صيني وما أحد يدري

يا جماعة LG تشتغل على السمعة وسامسونج لصوص وكل سنة يسرقون الوكالة وينحاشون كلهم مصارية بما قيهم وكيلهم( المتبولي ) سلمني على العتيبي والقحطاني والسبيعي والدوسري والحربي والشمري والعنزي وغيرهم000