بديل للجبن السايل محلي
 

السلام عليكم

هذا اول موضوع لي واحترت وين احطه ان شاء الله مكانه مناسب

قريت في احد المواضيع عن بديل للجبن السايل ونوعيه جيده

وللاسف لاحظت ان الجميع مثلي ما لقو بديل

ثم تذكرت ان عـندي في احد كتب الطبخ طريقه لعمل الجبن السايل

قلت في نفسي خليني افيد فيها الجميع ومنها نقاطع الجبن الغالي

مع انه حتى القشطه والزبده بعد زاد سعرهم

------

طريقة عمل الجبن السايل من كتاب ( المطبخ المميز )

المقادير :

كاس حليب سايل

نصف بياله خل ابيض

نصف اصبع زبده

نصف علبة قشطه

-----

الطريقه :

يوضع الحليب في قدر على النار حتى يغلي

يضاف الخل مع التحريك حتى يتكتـل ثم يرفع عن النار

يسكب في مصفاة مغطاة بالشاش ويترك بداخلها تقريبا خمس دقائق حتى يتخلص من مائه

يوضع بالخلاط مع الزبده والقشطه وقليل من الماء ويخلط جيدا

____________

ان شاء الله يضبط معكم

للذمه ترى ما بعد جربته << من زود الحماس ودي اخدمكم

ان شاء الله بجربه واعطيكم النتيجه مع ان هالكتاب كل طبخاته اللي جربتها مضبوطه

تسلمين يا البلورة :)
الزبدة خوذي اللي تنباع بالوزن أرخص من غيرها
القشطة فيه بيتي وفريشكو رخيصات وطعمها ممتاز
فاصلة
كتاب المميز حق من ؟

الله يسلمك

ان شاء باخذ من الزبده والقشطه اللي قلتي عليهم مشكوره :]

الكتاب لـ ام شهد

ما شاء الله تبى تجربين فينا :mad:
لا ما عليش جربيه لا هنتي وبعدين قولي لينا :D

مشكورررررة يا بلوره

مشكورة اخت بلورة

نفع الله بكِ وبعلمك

إللي يجرب و تنجح معاه يبلغنا...

مشكورين جميعا.

جاري التجربه

العفو

العفو اخوي الكريم

امين واياك

جربي يا البلورة الفشل طريق النجاح :)
ان ما نفعت خلكم على شراء الجبن السائل مستمرين .... لكن صنعوا الجبن الابيض واللبنة في البيت فيه طرق مجربه وسهله وتوفر لكم كثير

العفو ان شاء بجربها وتنجح

شاكره مرورك الطيب

لا يسمعونكم التجار ترا يرفعون اسعار المواد الاساسية

مشكورة بلورة

جاري التجربه مره وثانيه

وان شاء الله تنجح

ما راح نسمعهم الا كل ما يرفع ضغطهم

وبندور على بدائل والله يغنينا عن كل تاجر جشع

العفو

اعطينا الطريقة

تفضل
سبق ان كتبتها هنا
https://www.mqataa.co/vb/showthread.php?t=14063

مشكورة جمرة ، ولو تدري عنك شركات الالبان تعاقدت معك ;)

اقتباس:

طريقة وحدة تطلع لك اللبنه واللبن والزبادي اول شي حليب سواء بودرة او حليب بقر طازج يسخن على النار وقبل ما يفور (يغلي )يفقل عليه وتخليه لين يدفى (لا يبرد ) وكل لترين حليب حط عليه علبه زبادي وحركه حتى يختلط مره وغطيه وحطه في الفرن واكيد ان الفرن مهوب شغال بس نبي مكان يساعد على الزبادى على تخمير الحليب وتخليه لمده 12 الى 10 ساعات بعدها يكون عندك زبادي جاهز اذا بغيت لبن تاخذ منه وتحط عليه شوي مويه ويخلط ويصير لبن تبي لبنه تاخذ الزبادي المحضرة وتجيب (انا شارية غترة مخصوصه للبنة ) وتصب الزبادي فيها وتربط الغترة بقوة تصير زي الصرة وتحطها بمشخاله وتحت المشخالة تحط يا بادية او زبدية بس لازم تكون عميقة ماابي الغترة توصل للقاع وتحطها في الثلاجة لمده يومين حتى تنزل الموية كلها من الغترة وتصيرعندك لبنه .. المويه اللي تنزل تسمى شرش فيها فائدة لكن البعض مايفضلها يرميها ممكن تاخذها وتحل فيها الزبادي عشان ا للبن بدل الموية ........................................ الجبن بعد سهل مايبي له شي تجيب الحليب الطازج (اذا ماعندكم بقرة فيه مزارع قريبة من الرياض تبيع حليب بقر طازجة توه محلوب او استخدم اي حليب طازج تلقاه في ثلاجات المحلات خذ كم لتر لانه بعدين يقل حجهم خذ مثلا 4 لتر وخلهم على النار وقبل ماتغلي بشوي حط عليه شوي ملح ون بغيت حبه سودا ووقت غليه حط عليه اقل من فنجان شاهي خل وحركه شوي راح تلقى الحليب تغير لونه وصار مصفر وبدا يتكتل خله شوي وقفل عليه النار جب قدر وفوقه مشخاله وحط على المشخاله غترة وصب الحليب المجبن عليه وضغط عليه عشان تنول الموية وحط فوقه اي شي ثقيل قدر فيه مويه ابريق فيه موية وحطه بالثلاجة يوم كامل بعدها فك الغترة تلقى الجبن جاهز قطعه وحطه في علب وصب عليه من الموية عشان تحفظه وفوقه شوي زيت زيتون (يحفظه عن الهواء) يقعد حول 12 الى 14 يوم وطعمه مرةممتاز عاد انتم بالخيار وقت اكله تخلونه سادة او بنعناع وزيت زيتون او بشطه وزيتون

ركــزوا على الجبنه السـايـله ..
و بعد ماتجربون اعطونا النتيجه لانها مهمة وعليها طلب من الأطفال .
ولا أقدر امنع اطفالي من الجبنه السايله .. يموتون من الجوع

يخلي بركة البيت جدتي وأمي :rolleyes:
اعطوا المراعي والصافي الضربة القاضية واستحلت منتجاتهن البيت :cool:

نصيحة الجبن السائل صحيًا لا يحبذ الإكثار منه
لأنه يفقد الكثير من عناصره غير إنه مليان دهون
الجيد أن تعلم أطفالك على التنوع
اللبنة افضل نوع :)