اخوي رجاء لا نخرج عن الموضوع احنا جالسين نتكلم عن اسباب ارتفاع السلع الغذائية ومادخلنا في الاسهم ولا العقار. واذا كنت مستغرب ليه ارتفعت اسعار العقار رغم وجود ساحات كبيرة في المملكة رح شوف دولة قطر مافيها الا الدوحه والباقي صحراء ورغم هذا الان يعانون من تضخم في اسعار العقارات والاسمنت .السبب واظح عزيزي (الطلب اكثر من العرض= تضخم) معادلة اقتصادية واظحه واخذناها في الجامعه لكن هل يوجد من يستوعب هذي المعادلة هنا؟؟؟ وبعدين كفاية اتهام لي بأني عايش بنعيم ولا ادري بحال الشعب المسكين, انا اعتبر نفسي من الطبقة المتوسطه وربما اقل.

اختي العزيزة يمكن انتي ماتعرفين ايش معنى الضرايب, وانا مالومك دامك اعتبرتي المبالغ الرمزية اللي تدفعها للجوزات ولا الاحوال المدنية ضرايب. يعني هالمبلغ البسيط هذا راح يهد حيل الشعب ويفقرهم. اختى هل تعلمين ان في امريكا الضرايب تكون على كل شي. واعني كل شي يعني حتى علبة الببسي اللي نشتريها من البقالة عليها ضريبه وعلى اي سلعة غذائية او ادوات منزلية او ملابس او سيارات او جولات اي مبلغ يندفع بأي طريقة كانت يكون عليه ضريبه هذا غير ضريبة استخدام الطرق وحتى الجوائز المقدمة من المسابقات التلفزيونية يكون عليها ضريبة 50% يعني نصفها. اللحين هل فهمتي ايش اقصد ان ماعندنا ضرايب؟. ولاحظي اختى انا جالس اقارن حال المملكة بحال امريكا واللي هي ايضا دولة غنيه والله اعلم ايش حال الدول الاخرى الفقيرة مع الضرايب.

اما عن التعليم انا اتفق معك فا اغلب الدول يكون فيها التعليم من الابتدائي الى الثانوي ببلاش ولو اني اشك في الموضوع هذا لكن اذا اعتبرنا فعلا ان كل الدول يكون فيها التعليم من الابتدائي الى الثانوي ببلاش هل تتوقعين ايضا ان الكتب تعطى بشكل مجاني الى الطلاب مثل حال السعودية؟ لا والله ماتوقع.طيب اللحين نجي الى التعليم الجامعي ابيك تعرفين ان التعليم العالي في اغلب دول العالم يكون بفلوس حتى الجامعات الحكوميه تكون بفلوس. اما في السعوديه ودول الخليج يكون التعليم ببلاش ويصرف له رواتب مثل اللي حاصل لنا في السعوديه. في امريكا مثلا يدفع الطالب في السنه الجامعية( فصلين) معدل 25,000 الف دولار. هل احد منكم يقدر يدفع هذا المبلغ؟ انا ابيكم تروحون لأي جامعه حكومية وتسألونهم عن تكلفة الدراسه في الجامعه اللي احنا ندرسه ببلاش وناخذ عليه فلوس.وراح تحسون وقتها بالنعمه اللي عايشين فيها. هذا غير المشاريع المستقبلية اللي الان تنبني مثل المدن الاقتصادية وجامعة الملك عبدالله للعلوم والتقنية, كل هذا ولسه في تذمر.
وكل واحد يقدر ينظم نفسه على حسب الفلوس اللي عنده. اللي راتبه 6000 يرتب حياته على حسب دخله, واللي راتبه 10000 يرتب حياته ومصارفيه على حسب دخله. اما ان واحد راتبه 5000 ويبي يعيش مثل واحد راتبه 10000 هذا والله المشكلة منه ومن سوء التخطيط والافضل يراجع نفسه ويقلل من مصاريفه مو يلوم الدولة ليش ماتنزل الاسعار وكأن الدولة حاطه تجارة العالم في يدها وتقدر تتحكم فيها مثل ماتبي.

اتمنى ان وصلت الفكرة وتغيرت بعض مفاهيمكم الخاطئة.

اخي انا ادعوك انك تتطلع على هذا القرار, حتى يكون عندك فكره عن جهود الدولة في حماية المستهلك
http://www.alyaum.com/issue/article....12436&I=503342

ووزير التجارة قال اذا كنتوا ماتستطيعون انكم تدفعون سعر السلع الغذائية اللي تعودتوا انكم تشترونها مثل الرز وغيره. ابحثوا عن بديل اخر لان في بعض السلع مارتفعت اسعاراها. وهذا كلام معقول يعني واحد راتبه مو كفيه يجلس يحط نفسه في ديون وحاله عشان بس ياكل الرز اللي يحبه؟.

اما عن الرابط اللي وضعته انا اشوف انه شي يفرح دام ان اسعار السلع الغذائية في السعوديه ارخص من غيرها, الا اذا كان عندك رأي ثاني انا مادري صراحه انا متوقع كل شي.

شف كلامك كله مارد انا عليه ارد انك ترجع لكلام الملك عبدالله يوم زار الاحياء الفقيره في الرياض وامر بأنشاء صندوق الفقر قبل 4سنوات تقريبا وكانت الاسعار ارخص بكثير اجل الحين الاسر هذي وشلون عايشه
و ماعتقد انك تفهم اكثر من الملك في جولاته داخل المملكه الاخيره واستنكاره لاوضاع بعض المناطق والفقر اللي فيها
وما اعتقد انك تفهم اكثر من الامير نايف ومطالبته اللي رفعها لملك عبد الله بطلب اعفاء المتقاعدين من رسوم (ضرائب)الدوله رافه بحالهم مع الاسعار

موسسه جدوى اعضاءها من اي طبقه ينتمون
من طبقه الشعب او المخمليه !!!!




المنتدى هذا يحارب جشع التجار وطمعهم وكل واحد سجل فيه غايته محاربتهم ورح نستمر بمحاربتهم
لاتعب حالك بمواضيع تثير فيها الاعضاء بدون فائده ترجى للمنتدى والمقاطعه

هل فعلا قرأته؟؟

و إن كنت قرأته هلى قرأته بتمعن كما طلبت منك؟؟

هل قرأت هذه الفقرة بالذات بتمعن :

لماذا الإختلاف الشاسع في الأسعار في بضائع يفترض أنها من نفس المصدر أو تصنع في بلادنا ومن ثم تصدر لدول الجوار و رغم ذلك تباع عندنا أغلى.

يعني كل هالأشياء اللي موفرتها الدولة موعاجبتك؟..يعني تبين زياده بعد؟ انا ماادري ايش الدولة تقدر تسوي من انها تريح شعبها من هم الضرايب وانها توفر تعليم ببلاش من الابتدائية الى المرحله الجامعيه والعلاج ايضا ببلاش. مع احترامي الى كل الفقراء انا اقولهم الدولة وفرت لنا فرص كثيره وكل ماعلينا اننا نبادر بأنتهاز هذه الفرص, اما ان واحد يتخرج من الثانويه ولا يكمل دراسته وبعدين يشتغل سكرتي ويقعد يتشكى من قلة الدخل وارتفاع الاسعار هذا والله مشكلته هو ليه ماكمل دراسته الجامعيه وهي موفره له ببلاش!!! وعليها راتب بعد يعني كأنه يدرس ويشتغل في نفس الوقت. والفقر شي موجود في كل دول العالم ولا يكاد توجد دولة تخلو من الفقراء هذي سنة الحياة. وانتوا لما تتكلمون عن السعوديه كأنكم تتكلمون عن افقر دولة في العالم يا اخوان تفائلوا بالخير تجدوه كفاكم سلبيه وتذمر وانظروا الى حالكم نظره خارجيه وسوف تجدون اننا بنعمه ولله الحمد ولكن الشاطر اللي ينتهز الفرص ويفكر تفكير مستقبلي.

هل تقارن الطلب على السلع في دول الخليج مثل السعوديه؟ وهل ضنك ايضا ان هذا تلاعب وغش؟ يا اخي ربما يكون في دولتنا غش وتلاعب لكن ليس بالشكل هذا, وضنك ان الملك عبدالله شايف كل هذا وساكت اجل الملك عبدالله مثله مثل اي وزير متلاعب صح ولا لا؟ بالمنطق عزيزي اذا كان هذا تلاعب بالأسعار وغش كيف لدولة ان تسكت على الشي هذا وهو امر مس الجميع وملحووظ ومشاهد في جميع الأماكن, ليه ماسألت نفسك ليه الملك عبدالله ماتحرك وقال شي عن الموضوع؟ الملك عبدالله يوم طاح سوق الاسهم طلع في الاخبار وتكلم عن الموضوع وعبر عن حزنه عن الموضوع, وايضا لما حصلة ظاهرة نفوق الابل امر بتعويض اصحاب الابل, يعني ايش معنى هالمره لما ارتفت اسعار السلع الغذائيه سكت وما قال شي؟ يعني صعب انه يأمر وزير التجارة بأنه يأمر التجار لكي يخفضوا الاسعار؟؟؟؟...الأمر واظح ومعلوم وانا اقول كفاكم خوض في اشياء انتم في غنى عنها, واللي لاحظته ان اغلب الاعضاء هنا خلفيتهم الاقتصاديه تكاد تكون منعدمه, ويتكلمون عن اشياء بدون اي علم.
تحياتي..

اخوي كاتب الموضوع من وين جبت انه مافي ضرايب امس ملزميني بدفع 27000 الف ريال اجباري يقولون زكاة سنوية
الا كل شي فيه ضرايب عندنا فاتورة الكهرب ماعليه رسوم قرات عداد هذي ضرايب يوم تجدد الاستمارة موب تدفع للبلدية رسوم هذي ضرايب ولس ولس

اين المنطق؟؟؟؟؟؟
 

وش دخل الزكاة في الموضوع؟؟؟ الزكاة فرض ديني وتذهب للفقراء والمساكين وليس الحكومه شوية منطق ارجوكم.
يا اخي لا تخلط الامور انا اتكلم عن الضرايب, واللي هي تعني ان المواطن مسؤول عن دفع الخدمات التي يتلاقاها واعني بالخدمات جميع الخدمات مدارس شوارع انارة تشجير تعليم ضرايب على الشركات اخذ نسبة من الراتب الى صالح الحكومه. مو بس رسوم استخراج جواز ولا بطاقة احوال المدنية.
الرجاء مراجعة ردي على الاخت مقاطعتهم ...

الرجاء من الاعضاء قراءة الموضوع بالكامل قبل الرد منع للأحراج.

يكفينا من الخلفية الإقتصادية أننا نعيش واقع الحال و نرى بأم أعيننا مايجري حولنا .. ولم تعد تخدعنا الشعارات الواهية والخطب الرنانة والتحليلات المزيفة فقد طفح الكيل و بلغ السيل الزبى.

لا أحد منا ينكر دور الحكومة و "كبار المسئولين" في البحث عن وسائل تخفف معاناة الشعب لكننا أيضا نعرف أن تحرك الحكومة بطيء ولن تأتي ثماره في أيام أو أسابيع بل قد تأخذ المدة شهور وسنين يموت خلالها من يموت ويولد من يولد.

أنظر لأهل جده على سبيل المثال .. كم سنة ونحن نعاني ونشتكي من أزمة المياة و الصرف الصحي و الشوارع التي أهلكتنا و أهلكت سياراتنا المتهالكة بحفرها و مطباتها؟
هل حلت هذه المشاكل ؟؟ ... لأ.
هل هناك محاولات لحلها ؟ ... نعم ... ولكنها محاولات لاتعدو كونها حبر على ورق .. لاشيء مرئي ومحسوس على أرض الواقع و إن حصلت فهي حلول واهية لاتخدم المواطنين قدر خدمتها لمصالح شخصية.
فحل أزمة المياه كان بزيادة عدد الوايتات (التي تعود ملكيتها لأناس معينين) و إقتراح فتح أشياب جديدة في مناطق مختلفة من جده "لتسهيل" حصول الموطنين على الماء و بيع تصاريح توزيع المياه لشركة واحدة تتحكم في مصدر المياه الوحيد لأهل جده لذلك تجد أن الأزمة كماهي وطوابير إنتظار الوايتات كما هي .. الفرق الوحيد أننا كنا زمان نقف في طابور واحد نحصل بعده على وايت .. أما اليوم نقف في ثلاثة طوابير للحصول على نفس الوايت.

وبالنسبة لسوق الأسهم الذي ضربت به مثلا .. هل عادت الأمور لنصابها و إرتفع السوق مرة أخرى بعد تدخل الملك؟؟ .. أم حصل العكس و أنهار السوق أكثر حتى تلاشت تقريبا الطبقة المتوسطة من الشعب و أصبح المواطن العادي يشك ان هناك أيدي خفية لا هم لها سوى ضرب كل قرارت أبامتعب التي تصب في صالح الموطن.

نعم هناك جهود .. لكنها و للأسف إن لم تساعد على تحسين رصيد أحدهم البنكي فلن تتجاوز مرحلة الورق وتتجسد على أرض الواقع.

لا أحد ينكر خوف أولي الأمر على مصالح مواطنيهم وسعيهم الدائم لتذليل العقبات أمامهم لكنهم ماداموا محاطين بأناس مثلك لايوصلون إليهم إلا الصورة الوردية الخالية من المشاكل وطالما كانت الإجابة لأولي الأمر عند سؤالهم عن أحوال الشعب : بخير طال عمرك و مايشتكون من شي .. فلن نرى أي خير.

أسف على الإطالة.

تحياتي للجميع.